Нимадир. Онам икки инсоннинг орасини битиштириш учун ёлғо | 🌸СОЛИХА АЁЛ🌸
Нимадир.
Онам икки инсоннинг орасини битиштириш учун ёлғон гапирса мумкин деб айтгандилар.
Мисол сифатида бир ҳикояни айтиб берганлар. Икки ёш ажрашган. Ажрашгандаки, келин келмайдиган бўлиб кетган, куёв эса қайтиб ярашмайдиган бўлиб тескари бўлган.
Онам иттифоқо поликлиникада келинни кўриб қолади. Қизи қўлида. Дарди ичида. Аммо сир бой бергиси йўқ.
"Умаржон роса сиқилиб юрибди. Ярашиб олсаларингиз бўларди, ўртада мана бу кўзмунчоқдек қизчаларингиз бор..."
"Э, ая феъли қурсин Умаржонингизни. Уйини елкамнинг чуқури кўрсин деб келганман."
"Қўйинг, унақа қилманг Умаржон бу бир ота-онадан эрта қолган йигит бўлса. Икки оғиз ширин гапни топиб гапира олсангиз керак, Хосиятхон?"
"Билмасам..."
Онам уйга келиб қўшни йигитга ҳам ўзига яраша йўл-йўриқ қилган эканлар.
"Умаржон яхшимисиз? Ўзингиз қийналмаяпсизми? Ҳосиятхонни кўргандим, қизингизни поликлиникага олиб чиққан эканлар. Омонат гап. "Қўшнингиз яхшими?" деб сўради. Шуни айтиб қўяй дегандим.
Табиийки, ёлғизликдан зерикиб турган эркак бу гапни эшитиб, ўйланиб қолган. Балки қизчасидан ҳам ҳавотир олгандир.
Онам шу воқеадан кўп ўтмай Умаржон бориб Хосиятхонни олиб келган деб бу ҳикояни якунладилар.
Хосият хола билан Умар амаки қўша қариб улуғ ёшларни кўриб яшашди. Иккиси ҳам онамни ўзгача ҳурмат қиларди.
Онам оламдан ўтгач, бизникига чиққан Хосият хола гапириб туриб йиғлаб юборди. Мен ўйлардимки, онамнинг яхшилик умидида гапирган ёлғони фош бўлмаган деб...
Бари Ҳосият холанинг эсида экан. "Аввало Худо, аммо яна қайта битишиб кетишимизга аям сабабчи бўлганлар!" деб гапириб қолди.
Эътибор қилсам, бугунги кунда ажралишлар сони кўпайган. Кундан-кунга отаси тирик етимлар сони ортгандан ортиб бормоқда.
Ўйланиб қоламан, наҳотки оила катталари ҳали суяги қотмаган, ақли жойига келишмаган икки ғўр келин ва куёвни бир хатосини кечириб, бирига кўз юмиб, тирик етим бўлиш эҳтимоли остида турган болани кўз олдига келтирган ҳолда бағрикенглик қилишга ожизми?
Уларни битиштириб юборишга рост гаплар етмаяптими ёки яхшилик умидида айтилиши мумкин бўлган ёлғонлар?
Биз ҳавас қилган оилаларда ҳам қачондир муаммолар бўлган, тушунмовчиликлар ҳам албатта...
Улар кечишдан кўра кечиришни маъқул кўриб яшаётган бўлиши ҳам мумкин. Бир куни ҳамма гап- сўз унутилади, хўмрайган кўзлар, аччиқ тирсиқ гаплар бутунлай хотирадан ўчиши мумкин.
Ишонинг, энг ёмон аччиқчи эр билан яшаган аёл ҳам ундан ажрагач номига бўлса ҳам йиғлайди. Чунки биз кечираётган умр-фақат дилхираликлардангина иборат эмас.
Ummu Zaynab Ummu
@Solixa_Ayol
Яхшилик учун яқинларингиз билан баҳам кўринг!
БОСИНГ!
https://t.me/+SirEm-hvsXrdKMKK
