2023-05-11 22:20:27
Муносабат: кредит тарихининг салбий эканлиги, кредит ажратилинмаслигидан далолатдир!
Жорий йилнинг 9 май санасида
“@SizdanTelegram ” номи остидаги телеграм каналда
“Туронбанкнинг Қашқадарё вилояти Қарши филиали ёлғиз аёлга турли баҳоналар билан ипотека кредити ажратмаётганлиги” иддао қилинган видео форматидаги пост эълон қилинди.
Шунингдек, хабарда
“Ипотека кредити ажратишни рад этган банк ходимлари қонун доирасида иш тутганми?” деган савол ҳам ўртага ташланган ва бу масала бўйича
“Президент порталига мурожаат қилинганлиги” келтирилган.
Мазкур ҳолат юзасидан "Туронбанк" АТБ матбуот хизмати қуйидагиларни маълум қилади.
Шу йилнинг 14 апрел куни Қашқадарё вилояти Қарши шаҳрида истиқомат қилувчи фуқаро С.З. ипотека кредитини расмийлаштириш учун “Туронбанк” АТБга қарашли
“Қарши” банк хизматлари марказига мурожаат қилган. Молия муассасаси мутахассислари эса белгиланган тартибда Ўзбекистон Республикаси қонун ҳужжатлари ҳамда банк кредит сиёсатига мувофиқ мижознинг ҳужжатларини тўлиқ текширувдан ўтказган.
Натижада ипотека кредити учун ариза қолдирган фуқаро С.З.нинг кредит қайтаришлилик ва тўловчанлик қобилияти
“Кредит ахборот таҳлилий маркази” тизими орқали андеррайтингдан ўтказилганда, аввалроқ ҳам бошқа банк кредит хизматларидан фойдалангани ҳамда у бўйича
5 маротаба 90 кундан ўтган қарздорликка йўл қўйгани аниқланган.
Эслатиб ўтамиз, Фуқаролик кодексининг
746 моддасида “Кредитор қарз олувчини тўловга қобилиятсиз деб ҳисобласа, кредитни беришдан бош тортишга ҳақли” эканлиги қайд этилган. Шунингдек, “Туронбанк” АТБ Бошқаруви томонидан тасдиқланган
“Аҳолига ипотека кредити ажратиш тўғрисида”ги Тартибнинг III боб, 18 – қисм “e” бандида мазкур кредит 30 кундан ортиқ муддати ўтган қарздорлиги мавжуд бўлмаган фуқароларга ажратилиши қайд этилган.
Айни шу жиҳатларни инобатга олган ҳолда “Туронбанк” АТБга қарашли
“Қарши” банк хизматлари маркази ходимлари фуқаро С.З.га ипотека кредитини ажратиш бўйича рад жавобини беришган.
Шундан сўнг фуқаро ушбу масала бўйича Ўзбекистон Республикаси Президенти порталига мурожаат йўллаган ва унда қўйидаги фикрлар важ сифатида келтирган.
“У ёлғиз аёл эканлиги, Туронбанк ходимлари фуқарога асоссиз равишда кредит расмийлаштиришдан бош тортаётганлиги ёки кредитларни фақат ўзларининг таниш - билишларига ажратишаётгани”.
Йўлланган мурожаатдан сўнг банк ходимлари вазиятга ойдинлик киритиш ва фуқарога яна бир бора кредит тарихи ҳақида маълумот бериш мақсадида унинг яшаш манзилига ҳудудий маҳалла фуқаролар йиғини мутасаддилари билан ташриф буюришган. “@SizdanTelegram ” номи остидаги телеграм каналда эълон қилинган видео айни шу вақтда исм – шарифини очиқламаган фуқаро томонидан суратга олинган.
Ҳурматли мижозлар ва ОАВ вакиллари!
Ҳар қандай тижорат банкининг асосий мақсади ва олий қадрияти бу мижозларга сифатли қонуний ҳамда тезкор хизмат кўрсатишдир. Айниқса, ажратилаётган кредитларнинг ўз вақтида қайтарилиши бошқа фуқароларга ҳам молиявий кўмак беришда муҳим омил ҳисобланади. Барча тизимлар автоматлашаётган бугунги кунда эса бу борада инсон иштироки кескин камаймоқда.
Ўз навбатида ижтимоий тармоқ фаоллари ва интернет нашрлардан эса вазиятга баҳо беришдан аввал масаланинг асосий моҳиятини чуқурроқ ўрганишларини ва албатта тўлиқ таҳлил қилишларини сўраймиз.
“Туронбанк” АТБ матбуот хизмати.
Аъзо бўлиш
https://t.me/turonbankmatbuotkotib
3.6K views19:20