2022-06-26 15:15:33
MARDIKOR 2(Hazil she'r)Kipriklaring qor qilib nechun,
Qovog'ingdan qor yog'ar yana?
Kokillaring dor qilib bugun,
O'lmoqdaman qarshingda, mana.
Yana shu hol, yana shu ahvol,
Turibman jim, bosh egib, so'zsiz.
Tergovchilik qilmay qo'yaqol,
Charchab keldim, soat ham to'qqiz...
Birpas uxlay, ertaga tongda
Ishga jo'nab ketaman, mayli.
Seningcha pul topish oson-da,
Seningcha men yuribman daydib?!!
Ishlayapman har kun to'xtovsiz,
Narx-navo ham o'sar kun sayin.
Turolmaysan bir zum o'qlovsiz,
Bu turishda o'lish ham tayin.
Unning narxi oshgan, bilasan,
Topgan pulim yetmas yarmiga.
Janjal qilib nima qilasan,
Kirgizmayman deysan kamiga.
Menda ham bor or-nomus, g'urur,
Mening ham bor yetarli kuchim.
Besh, olti kun og'zing yumib tur,
Rossiyaga ketaman uchib.
Zora, shunda sendan butunlay,
Bir umrga qutilsam edi.
Sen ham eri o'lgan xotinday,
"Ketmang" deya o'tinsang edi.
Bilsang qarzim ko'payib ketgan,
"Qaytar" deya qilishmoqda do'q.
Ko'chadagi faqat shu itdan
Qarzga suyak so'raganim yo'q.
Charchab ketdim to'g'risi men ham,
Yashash qiyin, hayot murakkab.
Bu tashvishlar qotirib ensam,
Tushmasaydi bir kun yurakka.
Bir kun infarkt, yo insult bo'lib,
O'lib qolsam mabodo birdan.
Shu payt o'zing asragin gulim,
Pulsiz qolish kasalligidan...
2022-yil
Shohrux Erkinov
@Shohrux_Erkinov_adabiyot
373 views12:15
![Telegram kanalining logotibi shohrux_erkinov_adabiyot — Shohrux Erkinov [Official]](https://logos.telegram-store.com/channels/shohrux-erkinov-adabiyot/telegram_logo.jpg){kind=logo}
S
