2022-12-23 18:29:10
ШУКРОНА
Тўйлар қилдим ёронлар отамнинг паноҳида,
Элга ёздим дастурхон онамнинг паноҳида,
Одам бўлдим халқимнинг наздида, нигоҳида,
Шукур дейман Аллоҳим етказганинга шукур,
Ота онам этагин тутқазганинга шукур.
Дўстни дўст деб атадим, душман учун жим турдим,
Ҳеч кимсани туртмадим ,урсам нафсимга урдим,
Сабр таги олтин деб, бошқасидан юз бурдим,
Ғолиб бўлдим ҳамиша, ютқазганингга шукур,
Ота онам этагин тутқазганинга шукур.
Ўтди ёзим қуёшли, қишларимчи қор билан,
Кун, тунларим файзли ,номус билан, ор билан,
Ҳаммасига эришдим ёнимдаги ёр билан,
Юрагимдан дардларни кетказганингга шукур,
Ота онам этагин тутқазганинга шукур.
Дунё менинг ичимда, кўзларимда порлади,
Орзуларим оқ бўлиб, осмонларга чорлади,
Ҳисларим шамол бўлиб ,булутларни орлади,
Илҳом бериб шундай шеър биткизганингга шукур,
Ота онам этагин тутқазганинга шукур.
Кўнгилим сира тўлмайди сиз кўнглингиз тўлмаса,
Розимасман ғамларнинг жони тинчиб ўлмаса,
Муҳаббат боғларини тиконлари сўлмаса,
Юракларга меҳрни ўтқазганингга шукур,
Ота онам этагин тутқазганинга шукур.
Хуршид Карим
https://t.me/Shermuhammadkarimovich
799 viewsedited 15:29
P
