«ШУКУР ДЕЙМАН» Бисмиллах деб, бошлаб ишим, Кўп бўлсада ғам та | SHERLAR

«ШУКУР ДЕЙМАН»

Бисмиллах деб, бошлаб ишим,
Кўп бўлсада ғам ташвишим,
Нолимоққа йўқдир хушим,
Берганига шукур дейман.

Озми, кўпми ризқим териб,
Яхши ёмон куним кўриб,
Кибрланмай қаддим кериб,
Юрганимга шукур дейман.

Ёмғир, қорми ёки шамол?
Пешона тер тўкиб ҳалол,
Ҳеч кимсага келмай малол,
Топганимга шукур дейман.

Рўзғор ками тўлмас ахир,
Соғинч эзсса қилиб сабр,
Ўзга юртда мен мусофир,
Бўлганимга шукур дейман.

Кўзи очиқ, кўрлар бисёр,
Билаги зўр, зўрлар бисёр,
Тўғри йўлда доим ҳушёр,
Турганимга шукур дейман.

Кимдир бойлик дардида маст,
Кимга соғлик орзу, ҳавас,
Тонгда туриб эркин нафас,
Олганимга шукур дейман.

Нафсига қул бўлган қанча,
Жисми тирик, ўлган қанча,
Виждоним бут сақлаганча,
Қолганимга шукур дейман.

Иш битгунча севганлар бор,
Севиб фидо бўлганлар бор,
Ҳақ йўлида мен сизни ёр,
Севганимга шукур дейман.

Синовлардан тўлса бардош,
Кутманг сира тўкмам кўзёш,
Фарзим билиб саждага бош,
Қўйганимга шукур дейман.

Отам, онам зўр давлатим,
Улар бор тик, эр савлатим,
Фарзанд бўлиб бурч, зимматим,
Билганимга шукур дейман.

Аллох бериб бир истеъдод,
Шеърлар битиб қилдим ижод,
Ёлғон қолиб, ҳақни  бот-бот,
Ёзганимга шукур дейман...

Абдумуталиб Эргашалиев


https://t.me/joinchat/AAAAADwROIl2Eg9zT1-n5Q



anba: @sherlar


        #like_boss