ОНАМ ЎГИТЛАРИ Энди сен ҳам катта бир шоир,
Оқил бўлгин ўзингга, болам.
Ҳаёт жуда бешафқат, ғойир,
Эҳтиёт бўл сўзингга, болам.
Сўйлаганда ҳокиссороқ бўл,
Кибр бошин чопиб ёз фақат.
Ҳар гапингни ўйлагин буткул,
Яхшисини топиб ёз фақат.
Гўзал сўзни Аллоҳдан тилан,
Кулдирай деб, бўлмагин беор.
Ҳазиллашма кўнгиллар билан,
Йиғлатай деб, бермагин озор.
Файз берсин Ҳақ мажлисларингга,
Шундагина кўнглинг ҳам тўлар.
Содиқ бўлгин муҳлисларингга,
Садоқатни севишар улар.
Унутмагин иймон шаҳрини,
Саждага ҳам бошинг қўй болам.
Келтирмагин Аллоҳ қаҳрини,
Ўлим ҳақда ёзма, қўй болам.
Не дарғалар ўтди, бетакрор,
Улардан бир сўзи қолмишдир.
Сен ўламан деганинг бекор,
Берганини ўзи олмишдир.
Келганингда дунёга, бахтдан,
Йўргак ясаб, сўнг ўраганман.
Шоир бўлсин деб, эмас Ҳақдан,
Одам бўлсин деб сўраганман.
Соғинтирма, қилмагин жабр,
Сенсиз зулмат кўрингай олам.
Қанча олис кетма, барибир,
Юрагимда яшайсан, болам!
Ўлмасбек Самарқандий.
t.me/Samarqandiy77
