Rauf Parfi

2022-07-30 15:46:42 УЙҚУ КЕЛМАЙДИ. ҲЕЧ НАРСАГА БОРМАЙДИ ҚЎЛИМ. МАЖОЛ ЙЎҚ,
тинсиз ҳурар қўшнимнинг ити, йиғлар, балки хастадир,
соғингандир бирор кимсани, балки занжирдан бўшатишни эсидан чиқаргандир эгаси. Мажол йўқ менда,
Ўша итга айланиб қолишни истайман шу пайт.

1979

Рауф Парфи Ochish/sharhlash

2022-07-30 09:24:11 ТЎХТА, ДЕЙМАН,
ҳайбатли бўшлиққа боқиб,
Тўхта, тўхта, дейман холос,
Тилимда ўзга сўз
Ўлган.

1982

Рауф Парфи Ochish/sharhlash

2022-07-29 18:21:41 ҲАЙКАЛЛАР КЎП БИЗНИНГ ШАҲАРДА,
Паррандалар билмайди холос
Кимнинг бошига ўтирганини.

1981

Рауф Парфи Ochish/sharhlash

2022-07-29 17:52:52 МИКЕЛАНЖЕЛО СЕВГИСИ

Севгим, мен нақадар севаман сени.

МИКЕЛАНЖЕЛО

1. Муқаддас тош менинг севгим, андуҳим,
Радди бало бўлур бу ишқ ханжари,
Дунёни тўлдириб учадир руҳим,
Сен қайси маконда? Манзилдан нари?!

Уфққа бош урар денгиз девори,
Юракда исённинг иссиқ хунлари,
Жимирлар шафқати ёлғон ғамхорим,
Келур очқорлоқнинг аччиқ унлари.

Денгиз, очқорлоққа тилайман бардош,
Унга лочин шиддатини бер, қани,
Бағрингга олмай тур қаноти синган...

Саодат бағишла эй, муқаддас тош,
Бу чексиз оғриқдан халос эт мани,
Менга илҳом керак, мангулик сенга.

2. Ичимдаги ёвга қараб тураман,
Йиллар ўтган сайин у ҳам беқайғу...
Мангуликнинг ҳассасига ураман,
Тақдирнинг ёлғончи шевасидир бу!

Қиш қуёши кезар хаёлга чўмиб,
Ёлғизлик йўлида ёлғиздир ўзи.
Ўзи яратгандир кетмас кўз юмиб,
Ҳар нарсани кўрар осмоннинг кўзи.

Тул қолган кимсадек осмон азали,
Мозор – дунё узра қилар ибодат,
Мен ҳам унинг каби кўп бор тутилдим.

Ё йиқилмас ёки кулмас тузалиб,
Ер – ё ҳаёт ё мамотдан иборат...
Инсонни севдим мен Инсонни билдим.


3. Билингиз, қуролим севгимдир фақат,
Унинг ўқларидан бўлдим бахтиёр.
Неки қаҳру ғазаб, макру қабоҳат,
Севгимнинг йўлида мағлуб, тор-мор.

Борлиқ ёнса, қуёш айланса кулга,
Юлдузларни тугма каби юлсалар,
Менинг буюк севгим, бир бора кулгин,
Қаҳқаҳанг йўқликни даҳшатга солар.

Аллоҳнинг ишига ҳайрон қоламан
Қонли товушларнинг рангги: Ўлдир, ос...
Ўтларнинг ичинда куйиб толаман.

Ичим ёнар, ҳар нафасим – эҳтирос,
Фиръавнга сиғинмайман, оломон,
Аллоҳга сиғинаман, севгимга холос.

1979

Рауф Парфи Ochish/sharhlash

2022-07-29 05:53:53 ДЎСТИМ, МЕНГА ДОИМО ОЧИҚ ЮЗ БИЛАН БОҚАР ЭДИНГ-КУ алдамас эдинг-ку, риёкорлик қилмас эдинг-ку.
Нима бўлди сенга, нима бўлди ахир. Нечун менга ўзингнинг шахсий касаллигингга қарагандек қарайсан.
Нима бўлди сенга?

1970

Рауф Парфи Ochish/sharhlash

2022-07-27 17:53:49 * * *

Манда сиғар икки жаҳон, ман бу жаҳона сиғмазам,
Гавҳари ломакон ўзим, кавну макона сиғмазам.

Aрш ила фаршу кофу нун, барчаси мандадир бугун,
Сўзлама, қўйгил энди ман шарҳу баёна сиғмазам.

Кавну макондур оятим, зоти анинг бидоятим,
Истар эсанг нишонами, мен бу нишона сиғмазам.

Шубҳа гумон ила киши, ҳақ била бўлмагай иши,
Ҳақ таниган билурки ман шубҳа гумона сиғмазам.

Сурата боқ-у, маънини сурат ичинда сан тани,
Жисм ила жон ўзим, вале жисм ила жона сиғмазам.

Ҳам садафу ҳам инжуман, ҳашру сирот ўтувчиман,
Бунча матою мол ила мен бу дўкона сиғмазам.

Ганжи ниҳон менинг ўзим, айни аён менинг ўзим,
Гавҳари кон менинг ўзим, баҳраю кона сиғмазам.

Гарчи муҳити аъзамам, Одам отимдир Одамам.
Кунфаякун бўлиб ўзим, ман бу макона сиғмазам.

Жон била ҳам жаҳон ўзим, даҳр ила ҳам замон ўзим,
Кўр бу латифани ки ман даҳру замона сиғмазам.

Aнжум ила фалак манам, ваҳй манам, малак манам,
Сенки тилингни тий, бугун мен бу лисона сиғмазам...

Зарра манам, қуёш манам, чор ила панжу шаш манам,
Сурати кўр баён ила, чунки баёна сиғмазам.

Зот ила сифот ила, қадр ила, барот ила,
Гулбашакар навот ила, баста даҳона сиғмазам.

Нор манам, шажар манам, арша чиқан ҳажар манам,
Кўр бу олов тилин, ки ман, ушбу забона сиғмазам.

Шамс манам, қамар манам, шаҳд манам, шакар манам,
Руҳи равона мандадур, руҳи равона сиғмазам.

Гарчи бугун Насимиман, Ҳошимию Қурайшиман,
Бундан улуғдур оятим, ояти шона сиғмазам.

Насимий Ochish/sharhlash

2022-07-27 12:14:53 МЕН ЎЗ ГАВДАМГА БОҚИБ
Ҳайратга тушдим букун.
Бу гавда ичинда
Мозорлар кўп
Нақадар.

1982

Рауф Парфи Ochish/sharhlash

2022-07-27 09:10:07 ҲУЖЖАТ

Керак. Варақ-варақ қоғоз, сенинг инсонлигинг ҳали оз,
Варақ-варақ қоғоз, керак. Шарт. Ортиқча бир матоҳ
доимо сен билан, доимо. Кер-ак. Кера-ак. Вассалом.
Ҳаёт – ҳужжат. Ҳужжат?! Ҳаёт яшар қўйнига ҳужжат солиб, қайга кетай сендан
бош олиб, энди. Чекил, варақ-варақ “керак”. Чекил,
кўзларимдан ҳар қандай қоғоз. Менда эрк деб аталган
бир ҳужжат бор холос. Марҳамат. Эркнинг ҳужжати солинган ҳужжат.

1965

Рауф Парфи Ochish/sharhlash

2022-07-26 20:28:25 АЛЕКСАНДР БЛОК

Билурман, хун ҳақи, ҳалокат ҳақи,
Барибир мен сени қутлайман, ҳаёт.

А.БЛОК

1. Қора булутларин ўйнар осмон,
Олис юлдузларнинг сирли шуласи.
Туманли соҳилдан ундар бегумон
Бу сўлғин шаьмларнинг игналик саси.

Ташналик сасидир, бу – туш, бу – олам,
Кимдир тишлаб олган оловни унда.
О Рус, сен – ёрим, сен – синглим, сен – Онам,
Қандай олиб чиқай ман сени тундан?

Сира қувиб бўлмас бу қонли тушни,
Куйдиргувчи юлдуз сапчир дафьатан,
Ҳеч синмас руҳ ичра осмоннинг ҳусни.

Томоққа тиқилган кўз ёшим – Ватан.
Ўт ичиндан термакдаман товушни,
Куйиб бўлган нарса куймас қайтадан.

2. Мадор йўқ, қанот йўқ. Тамом. Чарчадим,
Чўқир жигаримни бу ўтрук, ёлғон.
Бу таьна қадимий, бу сўзлар қадим,
Бу совуқ сайёддир кўҳна палаҳмон.

Ёлғиз менми ахир?! Дард бор, ҳамдард йўқ,
Бу ёлғон дунёда мен ёлғиз эмас.
Нақадар тиниқдир, зангоридир кўк,
Нақадар шириндир, узундир нафас.

Русия! Йиғлама, кўз ёшингни сот,
Сўйилган ой кезар, у менинг хуним,
Сен билурсан холос. Бошқа ҳеч бир зот.

Жисмим совуб борар сўнмоқда уним,
Гирдоб қўйнида мен, қўлингни узат...
Хайр! Бу кун менинг охирги куним.

3. Қайда, қайда қолди ўзғир ғалаён?!
Наҳот унинг синмас қиличи синди,
Титра чексиз уммон, сен мудроқ жаҳон,
Темир дарбозангни тепарман энди.

Қара, қўлларим қон, тирноқларим қон,
Тургил, ғафлатингни ётмагил босиб,
Эшикни очсанг-чи эй, ялқов посбон,
Қаршингда мана мен, жаҳон садоси.

Ваҳмзор жаҳонсен қалбимни ёқиб,
Шеьрият қаьрига шўнғирман ношод.
Русия, Русия, севиб, ютақиб,

Шўрлик омон бўл, деб топиндим бедод,
Билурман, хун ҳақи, ҳалокат ҳақи,
Барибир, мен сени қутлайман ҳаёт.

1981

Рауф Парфи Ochish/sharhlash