Ўйғон Борлиғим сақлай десанг илму ҳунардин қил яроқ! Йўқ эса | Раббимов Жасур (𐱅𐰇𐰼𐰜)
Ўйғон
Борлиғим сақлай десанг илму ҳунардин қил яроқ!
Йўқ эса олғай борингни қилмайин ҳеч ким сўроқ.
Ер юзи ўзгарди аммо ўзгаришдин бизда йўқ
Синди Туркистон элининг бошида юз минг таёқ.
Ҳар ўғул ворис бўлур қолғон отонинг молиға
Бўлди Туркистон элининг вориси юзсиз қароқ.
Бахтсиз бўлғон кишига ўз уйи ғурбат бўлур,
Мол эгасидур қароқчи бу ажойиб ишга боқ.
Бахт очилмас ул кишиларким эрурлар илмсиз,
Илмсизлар хўр бўлур, хоҳи қародур хоҳи оқ.
Қайси миллат устидин ҳокимлик этса бошқалар,
Бу каби хорлик ҳаётдин ўлганидур яхшироқ.
Илму иймон иккисидин баҳралик бўл, эй ўғил!
Бу икковлон бирла олғайсан қўлингга шамчироқ.
Алихонтўра Соғуний. 1968 йил, Тошкент.
-----------------------------
Жасур Раббимов
Telegram | YouTube | VK | Instagram
