ИСЛОМ АСОСЛАРИ БЕШИНЧИ БЎЛИМ: ИБОДАТЛАР Ўтган бўлимда | Qur'on va Hadis

ИСЛОМ АСОСЛАРИ






БЕШИНЧИ БЎЛИМ: ИБОДАТЛАР


Ўтган бўлимда айтганимиздек, Муҳаммад алайҳиссалом бизни қуйидагича беш нарсага ишонишимизни буюрган: Шериксиз, ягона Аллоҳ таолога, фаришталарга, китобларга, хусусан, Қуръонга, пайғамбарларга, хусусан, уларнинг охиргиси Муҳаммад алайҳиссаломга, охират ҳаётига. Исломнинг асоси мана шудир.
Сиз мана шу беш нарсага ишонганингиздан кейин мусулмонлар қаторига қўшилиб, улардан бири бўлиб қоласиз. Лекин бу билан тўла мусулмон бўла олмайсиз. Зеро, инсон Пайғамбар алайҳиссалом Аллоҳ тарафидан келтирган ҳукму фармонларига итоат этмагунча тўла мусулмон бўла олмайди. Иймондан кейинги мана шу итоат қилиш Исломдир. Аллоҳни ўзингизга маъбуд деб иқрор бўлганингизнинг маъноси, У Зотнинг буюрадиган, таъқиқлайдиган, хўжайин экани, сиз эса, Унинг буйруғи ва тақиқига итоат этадиган, хуллас, айтганини қиладиган қул эканингиздир. Мана шундан кейин Унга осийлик қилсангиз, хўжайинга бўйсунмаган қулнинг жиноятини қилган бўласиз. Қуръон Аллоҳнинг Китоби эканига иқрор бўлдингиз, Қуръоннинг ҳар бир сўзи Аллоҳ тарафидан юборилган ҳақиқат эканини эътироф этдингиз. Демак, ундаги ҳар бир фармон ва тақиққа риоя этишингиз лозим. Муҳаммад алайҳиссалом Аллоҳнинг пайғамбари эканига иқрор бўлдингиз, бу билан у киши буюрган ёки тақиқлаган ҳар бир нарса Аллоҳ тарафидан эканига иқрор бўлдингиз. Демак, у кишига итоат этишингиз вожиб. Мана шундан кўриниб турибдики, қилаётган ишингиз иймонингизга мувофиқ бўлгандагина комил мусулмон бўласиз. Қилаётган ишингиз билан иймонингиз орасидаги фарқ қанча катта бўлса, иймонингиз шунча камаяверади.
Келинг, сизга ҳаётимизни Аллоҳнинг розилигига мувофиқ ҳолда ўтказишимиз учун Муҳаммад алайҳиссалом белгилаб берган йўлни баён этайлик. Қуръондаги бирламчи буйруқ сифатида фарз қилингани-Ибодатлардир.







http://t.me/Quron6