Qazaqda’rya Ernazar Alako’z babamnin’ ruwxina estelik #3 . | Kitapxana

Qazaqda’rya
Ernazar Alako’z babamnin’ ruwxina estelik

#3

... Watanlas, jerles degenler,
“Ant iship” alma jegenler,
Shetinen satqin demen’ler ...
Al shinliqqa sharan’ bar ma?
Qurban bolip satqinlarg’a,
Sheyit o’ldi Ernazar biy.
Qazaqda’rya,
Qazaqda’rya.

... Sa’ten saray tu’lkisinin’ —
Tutqin boldi duzag’ina, —
Bizin’ qansha “ala g’arg’a”
Ala awizliq iyti kelse
Alinbag’an qala bar ma ?
Tek sol iytke “ta’slim” bolg’an
Ernazardek danalarda ...
Qazaqda’rya,
Qazaqda’rya.

Satqin bop tuwg’an qay kisi?,
Satilmas jani bay kisi
Jaxildur adam tu’lkisi,
“Xannin’ isi shaytan isi”
Degen eken Aydos baba.
Duris ga’p pe Qazaqda’rya?
Buris ga’p pe Qazaqda’rya?

“— Ol duris ga’p qara jerdey,
Ol shinliq mina qa’birdey
Meni bunsha tergey bermey,
Ilaj eter shaman’ bar ma?”
Dedi mag’an Qazaqda’rya.

Awa, shamam ma’lim menin’,
Da’rtim jerdey qalin’ menin’.
Berdaq, Shamshetler watani,
“Aq qala” , “Gedey” bir ati
“Aq qum awil” — elim menin’,
“Qirqala” dep qorg’an salip,
Batir babam panalag’an —
Aral— ten’iz, ko’lim menin’,
Ax, o’tmishi o’kinishli. —
Ata-anam tuwilg’an jer,
O’zin’ ha’rne barim menin’.
Qazaqda’rya,
Qazaqda’rya.

Usinday ulli insang’a,
Usinday a’ziz adamg’a,
Qilapliq qilg’an qas qaqpay,
Payani joq yalg’an du’nya
Bu’gin ha’m bar sol halinda.
Eki ju’zli ala g’arg’a, —
Ele de ko’p aramizda.
Zeynim ilgenin aytaman.
Qulaq sal mag’an qaytadan,
So’z ber shayir balan’izg’a,
Qazaqda’rya,
Qazaqda’rya.

... O’zge jurttin’ bunday adami,
Ornag’ali “Sovet zamani”
Granitten gu’mbez bu’rkenip,
Gu’l jamilip jatir mudami,
... Al, bizler-she, usi zamanda
Xalqin su’ygen ulli adamg’a
Qulpi taslar saldirmaq tu’we
“Taba almadiq on’li bag’an da...”
Qazaqda’rya,
Qazaqda’rya.

A’skerbay A’jiniyazov


https://t.me/Qq_e_kitapxana