Шифо бер, Роббим!Онамнинг бошига тушди бир синов,
Бу синов айлади сочимни қиров,
Қировнинг сабабин билмайди биров,
Не қилай деб чуқур хаёлга толдим,
Онамнинг дардига шифо бер, Роббим.
Наинки уйқу бор, на таом роҳат,
Оғриқнинг кучига қиляпди тоқат,
Волидам танини этгин саломат,
Булутдан йиғлашни ӯрганиб олдим,
Онамнинг дардига шифо бер, Роббим.
Офтоб чиқса ҳамки зулматдир гӯё,
Қанийди, ӯнг эмас бӯлса бу рӯё,
Ажабо, бу дардга бормикин даво,
Курраи заминга сиғмайин қолдим,
Онамнинг дардига шифо бер, Роббим.
Онанг оғриб қолса бирёндир юрак,
Кӯзингга тор бӯлар замину фалак,
Оҳимни Роббимга етказ, эй малак,
Ҳатто тушларимда дод-фарёд солдим,
Онамнинг дардига шифо бер, Роббим.
Эркин ҚУДРАТУЛЛОҲ https://t.me/Qorirovotuz
