НЕГА ПРЕЗИДЕНТ МИРЗИЁЕВ БОБОМУРОД АБДУЛЛАЕВНИ “ҚЎЙИБ” ЮБОРДИ? | Qora Mergan
НЕГА ПРЕЗИДЕНТ МИРЗИЁЕВ БОБОМУРОД АБДУЛЛАЕВНИ “ҚЎЙИБ” ЮБОРДИ?
(12+ ёшдагилар ўқиши мумкин)
22 август, шанба куни ДХХнинг “оперлар” гуруҳи “Qora Mergan” деб гумонланган журналист Бобомурод Абдуллаевни қора учоқда Бишкекдан Тошкентга олиб келди.
Мен ўтирган оқ кабинетга етиб келган хабарга кўра, Қирғизистон ДМХҚси Бобомурод Абдуллаевни президент Сўўрўнбай Жээнбеков буйруғи билан экстрадиция қилган.
Журналистни Тошкентга юборишни ундан шаҳсан президент Мирзиёевнинг ўзи илтимос қилган.
Шунинг учун президент Жээнбеков Бобомурод Абдуллаевни қўйиб юбориш ҳақидаги ўнлаб халқаро ташкилотларнинг очиқ ва гизли илтимосларини сариқ чақага олмади. “Катта оға” амри – вожиб.
Мен “Усмон Ҳақназаров”нинг Шавкат Мирзиёев томоғига тиқилган “суяк”ка айланишини Бобомурод Абдуллаев қўлга олинган тундаёқ яхши билгандим - журналист Бишкекда қўйиб юборилса ҳам, Тошкентга келтирилиб зиндонга ташланса ҳам, Мирзиёевннинг ҳалқаро обрўси бир тийин бўларди.
“Qora Mergan” оқ кабинетдаги юмшоқ курсисига ўтириб олиб, бир неча кун сокин кузатди.
Бобомурод Абдуллаевнинг “Qora Mergan” эмаслигини у ҳибсга олинганидан бир неча кун ўтиб тушуниб етган Шавкат Мирзиёев вазиятдан обрўсини тўкмай чиқиш йўлларини излай бошлади. Ва нихоят ДХХдаги маслахатчи ва таҳлилчилари тавсияси билан авторитар давлатларда синалган эски, аммо самарали ҳийла – “Адолатли Подишоҳ” ҳийласини қўллади.
22 август куни Бишкекдан Тошкентдаги ДХХ биносига келтирилган Бобомурод Абдуллаев, ДХХ оперлари тарафидан ярим тунга қадар сўроқ қилинди.
Темур Якубов бошчилигидаги жаллодлар группаси журналистни ярим тундан кейин уйига қўйиб юборди.
Худди шу группа Бобомурод Абдуллаевни тасаввур қилиб бўлмас қийноқларга солганди. МХХ ДХХга ўзгаргани билан жиноятчилар ўзгаргани йўқ.
Орадан бир неча дақиқа ўтиб ДХХ чизган чизиқдан чиқмайдиган Kun.uz сайтида Бобомурод Абдуллаевнинг Мирзиёевга уни иккинчи марта қўйиб юбораётгани учун миннатдорчилик билдирган видео мурожаати чиқди.
Руҳий босимлардан ҳориган журналист ДХХ оперлари ўнгида камерага ён қараб, унга олдиндан тайёрлаб қўйилган текстни ўқиди. Журналист онасининг илтимосини ерга қолдирмагани учун президентга раҳмат айтди.
Бу орада мухолифат лидери Муҳаммад Солиҳ фейсбукда ўзининг издоши Бобомурод Абдуллаевнинг қўйиб юборилиши муносибати билан унинг “озод қилинишида ҳиссаси бўлган барчага” ташаккур айтди.
“Албатта, журналистни озод қилиш қарори Ўзбекистон давлатининг энг юқори мақомида олинганидан шубҳамиз йўқ. Бу адолатга ташна халқимизга кичик бир тасалли бўлди. Адолат сари юришимиз бошланган бўлсин” – деган Муҳаммад Солиҳ Мирзиёвнинг сиёсий ислоҳотлар ўтказишига зимдан умид билдирди.
Лекин Муҳаммад Солиҳ билибми-билмайми бир муҳим жихатга эътибор қаратмади - Мирзиёев ва унинг командаси ўйин қиляпти! Бобомурод Абдуллаевни қўйиб юборди, лекин унга нисбатан қўзғатилган жиноят иши тўхтагани йўқ. Мирзиёев Бобомурод Абдуллаевни ҳеч қандай асоссиз эркин ҳаракатланиш ҳуқуқидан маҳрум қилди, мухолифатга қарши курашда уни гаровга олди.
Журналист захарлаб кетилмаслигига, автомобил ҳалокатига учрамаслигига ёки ўз уйида осилган ҳолда топилмаслигига ҳеч ким кафолат бермайди.
“Qora Mergan”ни топиш ҳаракатлари халиям тўхтагани йўқ. Мен деб гумон қилинган бир гуруҳ шахсларни қандай бўлмасин тутиш ёки жисмонан йўқ қилиш қарори олинган. Бу амалиётга Мирзиённинг қудаси Ботир Турсунов раҳбарлик қиляпти. Бу ҳақда келажакда батафсил ҳикоя қиламан.
Муҳаммад Солиҳ!
Бобомурод Абдуллаев устидан тергов тўхтатилмас экан, Акром Малик сингари қамоқларда қолаётган ўзбек миллатининг ўнлаб асл фарзандлари бутунлай оқланмас экан, “адолат сари” Мирзиёев ва унинг командаси билан бирга бўлиш ва юришга ҳали эрта.
Шавкат Мирзиёв!
