2021-08-31 05:41:02
#Мулоҳаза
Ўзбекистонда медалсиз, аммо барчага суюкли бир зот бор эди...
Шу кунларда юртимиз Мустақиллигининг 30 йиллиги муносабати билан бир гуруҳ юртдошларимизнинг давлат мукофотлари, ордену медаллар, кўкрак нишонлари билан тақдирланаётганларига гувоҳ бўляпмиз. Ижтимоий тармоқларнинг ўзбек сегментини мукофотлар ва уларнинг эгаларининг суратлари тўлдириб юборди.
Шу алфозда бир зотни эсладим. Бутун умрини, чуқур илмий фаолиятини, шу халққа бахшида этган, бир асрдан зиёд даҳрийлик давридан динини унутаёзган ҳолда чиққан миллатга дину диёнатини ўз она тилида тартиблаб, мукаммал ўргатган зот, буюк маърифатпарвар олим, халқимизнинг чинакам ифтихори – Шайх Муҳаммад Содиқ Муҳаммад Юсуф ҳазратларини эсладим. Ўзбекистоннинг кичик бир кўкрак нишони ҳам берилмаган экан ҳазратга... Кимдир айтиши мумкин, у даврларда тузум бошқача эди, фалон-фалон эди, деб. Бироқ ўша даврда яшаб, ҳозир орамизда бўлмаган кишилар вафотларидан кейин ҳам мукофотланганлари ҳақидаги хабарларни ўқияпмизку...Тўғри, ҳазрат бунақа нарсалар учун яшамадилар, ўйламаганлар ҳам мукофтларни. Мукофот фақат Олий Зотдангина умид қилинган.
Ҳазратимиз ҳаётлик чоғларида Ливия, Миср, Россия давлатларининг нуфузли орден ва медаллари билан тақдирланганлар. Бироқ улар сафида ўз она юртининг нишони йўқ...
Бир вақтлар дунё уламолари йиғилишиб, анжуманга битта автобусда кетаётган вақтларида улуғ олимлардан бири Шайх Муҳаммад Содиқ Муҳаммад Юсуф ҳазратларини кўрсата туриб: “Мен бу инсонга ҳавас қиламан, у бир қанча тилларда ёза олиш имконига эга бўла туриб, асарларини фақат халқи учун, ўз она тилида ёзади”, дея таъриф берган экан. Ана шундай зотнинг ўз юртидан бирорта эсдалик нишонига лойиқ кўрилмаганига бугун миллат ачиниши керак. Ҳазратнинг таржимаи ҳолларини ўрганаётган мусулмон авлоди бу зотнинг олган дунёвий мукофотлари рўйхатини ўқиб туриб, ўз юртида тақдирланмаганини ўйлаб, бизнинг юртга қайси назар билан қарар экан, билмадим?!
Бугун у кишининг оилалари акалари, фарзандлари, қолаверса, шогирдлари, издошлари мукофотланганликларини кўриб, бироз кўнглим таскин топсада, лекин бир фикр хаёлимни тарк этмади: Ўзбекистонда медалсиз, аммо барчага суюкли бир зот бор эди...
basmalatv
7.4K viewsMenglibaev Nurkuyash, edited 02:41
Q
