2022-08-21 12:05:17
#МУЛОҲАЗА
Йиғилиб қолган воқеалар бор эди. Уларни ёзай деб қўлимга телефонимни олдим. Хали бошлаб улгурмасимдан, экранни юқори тарафида келган хабар кўринди. Расми ҳам бор. Аслида, хабарларга жавоб беролмайман. Вақт етишмаслиги бор менда. Лекин бу мактуб қизиқтирди мени. Водийлик Насибахон синглимиздан экан. Хатни қисқача мазмуни шундай. - Сизга хавас қиламан. Чет элда мазза қилиб юрасиз. Мени ҳаётим барбод. Эрим билан хар куни уришамиз. Иккита ўғлим бор. Тўполонидан бошимни кўтаролмайман. Кийимларини кир қилиб ташлашади. Мазали овқат қилмайсан дейишади. Массалиқни тўкиб қўйса, мен ҳам ширин овқат пиширишни биламан. Жонимдан тўйиб кетдим. Ҳаётни қизиғи қолмаган. Мен ҳам ишлашни хохлайман. Чиройли кийинишни, ўзимга қарашни истайман. Эрим бошқасини топиб олган шекилли. Хар куни жанжал қилади. Ажрашиб кетолмайман. Ота онам ўтиб кетишган. Акамни уйига сиғмайман. Келинойим ҳам мени ёқтирмайди. Мени ўрнимда бўлсангиз нима қилардингиз?
Расмингизга қараб ўйланиб қолдим. Сизни ўрнингизда бўлсам нима қилардим. Ишни аввало, устимдаги кўйлакни ювиб, дазмоллаб кийардим. Сочларимни ювиб, чиройли турмаклардим. Орқангизда бир туп атиргулга раҳмим келди. Ўтлар ичида қийналиб кетибди. Ўт босиб кетган шу кўримсизгина боғчани, дунёнинг энг гузал боғчасига айлантирардим. Гул, райҳон экардим. Сабзавотларни энг сарасини етиштирардим. Фарзандларимга тоза кийим кийдиришга эринмасдим. Гўштсиз бўлса ҳам, ширингина таом пишириб, оиламни ҳурсанд қилардим. Ширин овқат пишириш учун аввало меҳр керак. Орамизда ўн ёш фарқ бор экан. Демак сиз ҳам 1994-1995 йилларни яхши эслайсиз. У йилларда мен қийналмаганман деган одам бўлмаса керак. Нон учун, шакар учун, ёғ учун соатлаб навбат кутилган кунлар эди. Уйда бир ҳафта гўшт бўлса, бир ҳафта бўлмас эди. Иккитагина товуғимиз бўларди. Кунда иккита тухум ҳам рўзғоримизга мадад бўлган. Бир кун ош қилдим. Тўшакда ётган онам, салатни нима қилдинг дедилар. Хеч нарса йуқку десам, аёл киши бир дона пиёздан ҳам салат қилишни билиши керак дедилар. Онам пазанда аёл бўлганлар. Пиёзни артиб, нима қилсам экан деб ўйландим. Кейин катта катта қилиб тўғраб, уксусли сувга ивитиб қўйдим. Икки тиш саримсоқ, бир тутам укроп, бир қошиқ ёғ, бир чимдим туз билан бинойидек салат бўлди. Айниқса, дадамга ёқди. Бу қанақа салат деб сўрадилар. Она салати дедим кулиб. Ишонасизми, ҳозиргача ош қилсам она салатини тайёрлайман. Уйда бўлган помидор, бодрингдан қилинган мукаммал салат ҳам уни ўрнини босолмайди. У менга онамни эслатади.
Сизга насихат қилишга ёшлик қиламан. Хаддим сиғиб,маслаҳат берсам майлими.
Гўзал синглим сиз бахтлисиз, аммо буни хис қилмайсиз. Икки ўғлингизни тўполонидан шикоят қилманг. Дунёда тирноққа зор инсон қанча. Турмуш ўртоғингиз, сиз суянган тоғ бўлади. Ишдан чарчаб келиб, бир ширин тассалига, бошини қўядиган бир елкага зор ёлғиз аёлдан, ёки кунлаб эрини кутадиган, хадик билан яшайдиган иккинчилардан бахтлироқсиз.
Дунёни гўзаллик қутқаради. Ўша гўзалликни эса инсон ўз қўллари билан яратади. Келинойингиз билан дўст бўлинг. Акангизникига борсангиз, шикоят кўтариб борманг. Кичкина бўлса ҳам ширинлик пишириб олинг. Икки соатдан ортиқ қолманг. Обрўйингиз билан қайтиб келинг. Бирор иш қилаётган бўлса, бир учидан тутинг. Ишонинг, хар хафта сизни чорлаб чақирадиган бўлишади.
Насибахон, буларни ўзлаштириш учун сизга атиги икки, уч ой етади. Кейинги ҳаётингиз ҳақида менга албатта ёзинг. Сиз билан кўришмоқчиман дебсиз. Мен ҳам, райҳон хиди гуппилаб турган боғчангизда, бир пиёла чой устида суҳбат қуришни ният қилдим. Кўрушгунча.
Ҳаёт жуда қисқа. Қалбларни парчалаш бизга ярашмайди. Сизларни яхши кўраман. САБО.
Интернетдан олинди.
Facebook саҳифасидан…
Бизнинг канал:
@PsihologGoar
@GoarMentor
604 views09:05
Қ
