ЖАХОНГИР ЗИЯЕВ; Масалан, Қирғизистонда устозларнинг коммунал в | Ўқитувчилар
ЖАХОНГИР ЗИЯЕВ;
Масалан, Қирғизистонда устозларнинг коммунал ва яшаш харажатлари маҳаллий бюджет ҳисобидан имтиёзли қопланаркан...
Жар солишига арзигулик қонун бўлсин!
Ниҳоят, куни кеча Олий Мажлис ялпи йиғилишида 2 йил олдин тайёрланган “Педагог ходимнинг мақоми тўғрисида"ги қонун лойиҳаси муҳокама қилинди. Жараённи онлайн кузатиб, ҳақиқатан ҳам қонун мақташга арзигулик бўлмаганини кўрдим ва бу ижтимоий тармоқда ҳам норозилик келтириб чиқарди.
Қонун ташаббускорлар ўшанда лойиҳада педагогларга умумий белгиланган ёшдан 5 йилга қисқартирилган ҳолда имтиёзли пенсия олиш ҳуқуқи, уй-жой, машина сотиб олишда имтиёзлар бериш, йилда бир марта соғлигини тиклаш учун моддий ёрдам ажратиш, педагог ходимнинг базавий лавозим маошининг энг кам миқдорини белгилаш ва кўп йиллик хизмати учун устама тўлаш режа қилинганини айтиб, жар солган эдилар. Лекин айни лойиҳада уларнинг ҳеч бири йўқлиги ажабланарли.
Тўғри, қонун лойиҳаси ҳозирча концептуал, яъни бу қонун керакми, йўқми деган маънода маъқулланди, холос.
Бир кун олдин ўтказилган фракция йиғилишида “Миллий тикланиш” депутатлари ҳам “ўқитувчилар кутган қонун бўлмабди” дея жиддий эътироз билдириб, ҳатто лойиҳани қайтариб юбормоқчи ҳам бўлдилар.
Аслида 2 йил олдин ваъда қилинган юқоридаги имтиёзлар ҳам бугун арзирли бўлмай қолди. Хорижий тажрибани кузатинг, ҳатто қўшниларимиз ҳам бу борада биздан олдинда. Масалан, Қирғизистонда устозларнинг коммунал ва яшаш харажатлари маҳаллий бюджет ҳисобидан имтиёзли қопланаркан. Уй-жой қуриши учун фоизсиз кредит бериларкан. Қозоғистонда ҳам коммунал тўловда, ёқилғи сотиб олишда имтиёз бериларкан. Уй-жой қуриши учун ep ҳам ажратиларкан.
Хўш, бизнинг қўшниларимиздан қаеримиз кам? Устозларга ҳозирча “отнинг калласидек ойлик” беролмас эканмиз, бошқа енгилликлар берайлик. Бу борада биздан ўрнак олсин.
Ўқитувчилар ҳар йили мажбурий тартибда санаторийларда бепул дам олсин, заруратга қараб бепул даволансин. Бошланғич бадали бюджетдан қопланиб, уй-жой билан таъминлансин. Фоизсиз кредит олсин, коммунал тўловда имтиёз берайлик, жамоат транспортида бепул юрсин. Навбатсиз машина олсин. Фарзандлари олий ўқув юртида имтиёзли шартларда ўқисин.
Ҳозирча бу имтиёзни жуда бўлмаганда олий тоифали ўқитувчиларга берсак, бошқа устозларга мотивация бўлармиди. Яъни, қолганлар ўзининг устида ишлайди, ўқийди, изланади, ўрганади ва олий тоифа олишга интилади.
Бундай имтиёзлар бериш биз учун янгилик эмас. Ҳарбийлар, қайсидир соҳа вакиллари, ҳатто ёшлар етакчилари учун шундай имтиёзлар жорий қилинган. Лекин устозларнинг меҳнати уларникидан кўп бўлса кўпки, асло кам эмас.
Ўқитувчиларнинг иш ҳақини бир неча баробарга оширдик, деб жар солишни ҳам тўхтатиш керак. Статистика агентлиги маълумотига кўра, таълим вакилларининг маоши ҳамон ўртача кўрсаткичдан ҳам паст. Банк, суғурта соҳаси вакиллари ойига қарийб 11 млн сўм иш ҳақи олади, устозларники эса атиги 2,6 миллион сўм. Қани, адолат? Аслида тескариси бўлиши керак эмасими?
Иккинчи ўқишда қонун лойиҳасига юқоридаги каби имтиёзлар киритилмас экан, нафақат устозлар, балки бутун жамоатчилик норози бўлиши табиий.
Хуллас, устозларга имтиёз беришнинг айни вақти ҳозир. Давлат келажаги таълим-тарбияга боғлиқ экан, аввало ЎҚИТУВЧИЛАРНИ РОЗИ қилайлик.
facebookdan
