🌊 OKEAN 🌊 Guloro Yusupova blogi

2022-10-30 19:23:26 #dard

Yaqinda siqilib yurgan dugonam bilan gaplashgan edim. Yangi ishga o'tgani, oyligi yaxshimasligi, o'zini xarajatlarini qoplay olmayotganligi, uyidan hadeb pul so'rayotganiga xijolat bo'layotganini aytib biroz noligan edi. Nimaga xijolat bo'lasiz, ota-ona farzandiga pul berishdan og'rinmaydi, poytaxtda yashash oson emas, uni ustiga biz qiz bolamiz, qanday qilsak ham ota-onamizdan olmasak o'zimizni pulimizda baraka bo'lmaydi, yanayam biz talabamiz, asosiy vazifamiz ishlab pul topish emas, o'qish, hali umrimiz davomida ishlaymiz, pul topamiz xullas shunga o'xshash gaplar bilan o'zimcha nasihat qilgan bo'ldim. Lekin dugonam ota-onasiyam pul so'raganida unchalik ham yaxshi muomala qilmayotgani, shundan g'alati bo'layotganini aytib, ko'zida yosh aylandi. Eh hamma narsa o'z qo'limizda bo'lsa ekan, birovdan pul so'rab o'tirarmidik deb kulib qo'yudim. Lekin, baribir, fikrim o'z kuchida ota-ona farzandi uchun malollanmaydi. Qo'lidan kelsa-kelmasa qayoqlardandir topib bo'lsayam farzandi begona shaharda qiynalmasligi uchun mablag' yetkazib turadi.

Ammo, bugun shunday vaziyatga guvoh bo'ldimki, ba'zida ota-ona ham farzandining kamchiliklarini to'ldirib berish uchun chindan og'rinarkan. Balki, bu holat o'g'il bola bilan bo'lganda bunchalik erish tuyulmas edi. U bir kun oila boqishi kerak, har qanday holatga duch keladi, bunga ruhan tayyor bo'lishi kerak. Lekin qiz bola o'zini-o'zi eplashi fikriga hech qachon qo'shilmaganman. Qiz bola o'qishi kerak, ishlashi kerak, pul bilan muomala qilishni bilishi kerak. Lekin bu faqat dunyoqarashi keng bo'lishi, o'z avlodini munosib tarbiyalay olishi uchun, aslo o'zini-o'zi eplab yashashi uchun emas!

Agar qiz bola, ayol kishi o'zini-o'zi eplab yashashni boshlasa, keyin uni odatiy jamiyatga yot bo'lgan ego qamrab oladi. Unga mas'ul bo'lgan erkaklar otasi, akasi, erining xohishlari bilan hisoblashmay qo'yadi. Nima desangiz ham bu har bir ayolning qonida bor. Qiz bola, ayolga o'zini eplay olmayotganligi, kam pul topishini ta'na qilgan erkak nomard bo'ladi. (Endi bu umuman boshqa mavzu. Gapirsa gap ko'p.)

O'tkan yil bir qiz ham ishlab, ham o'qiydigan qizlarga qoyil qolishi va bir vaqtda rahmi kelishi haqida maqola yozgan edi. Maqolani o'qib o'z hayotim ko'z oldimdan o'tgan. O'qib turib ishlagan hamma ham zo'r maosh ola olmaydi. Buni har bir ota-ona to'g'ri tushunishi va farzandiga adolat qilishi kerak. Balki, ota-ona ham xohlamagan holda moliyaviy sharoitidan kelib chiqib ba'zida malollanib qolar. Lekin farzand uchun ham buni qabul qilish oson emas. Zero, har biringiz o'zingiz farzandingizni shunday o'zbekcha qadriyatda tarbiyalagansiz.

Agar fikrlarimga qarshilar bo'lsa, shunchaki ularning ham fikrini hurmat qilaman. Bu hammasi to'liq mening shaxsiy fikrim.

@okean_Guloro Ochish/sharhlash

2022-10-29 20:54:16 Onang nam yerdan ismaloq terib berganda, buving Buxorodan Toshkentga ko'tarib kelganda, uni dadang sengacha yetkazganda, senga faqat pishirish qolib pishirmasang ham uyat bo'lardi. O'xshasa, o'xshamasa o'z qo'ling bilan tayyorlagan har bir narsa qadrli

@okean_guloro Ochish/sharhlash

2022-10-26 10:23:46 Ba'zida juda qadrli xotiralarni yodga olish uchun kichik bir narsa sabab bo'ladi.

Bugun ertalab yodomarin icha turib rahmatli bobom yodimga tushdilar. Bobom xuddi shunday shishachada doimiy qandli diabet(saxr)ga qarshi sariq dori ichib yurardilar. Har kun ertalab shu shishachadan bitta dori olib berish uchun opam bilan talashardik. Vaqt o'tishi bilan shishachadagi dori kuniga ikki mahal uriladigan insulinga almashdi. Endi bobomga insulin urish uchun opam bilan navbat qilardik.

Bobom har yakshanba bozor borib bizga qand lavlagi bilan xo'rozqand olib kelardilar. Bu ro'yxatga yana nimadir qo'shtirmoqchi bo'lsak bobomni oyog'ini yuvishimiz yoki uqalab qo'yishimiz kerak bo'lardi. Bobom saxr bo'lgani uchun oyog'i ko'p og'rirdi va terisi qotib qolardi. Biz qaychi bilan qirib yuvganimizda ham sezmasdi deyarli.

Aqlimni taniganimdan bobomni har yil o'n kunlik davolanishga borib kelishini eslayman. Oxirgi yillarda esa bu ikki-uch barobarga ko'paygandi. Buni eslashni xohlamayman. Chunki bobom meni hayotimdagi eng birinchi do'stim edi. Undan menga juda ko'p qadrli xotiralar qolgan.

Bobom har hayit bayrami yoki xotira kunida men bilan opamni mozorga olib borardi. Bu 4-5 yoshlarimdan boshlangan adashmasam. O'sha vaqt hech nimani tushunmasak ham bobom fotiha o'qiguncha jim eshitib turardik. Keyin qabrlarni ko'rsatib bu yerda kim yotibdi, bunisidachi deb so'roqqa tutardik. Bobom erinmay bizga ularni tanishtirib ketardi. Mozorga borguncha va qaytguncha yo'lda kimni uchratsak bobomga salom berardi. Shunda bobom bizni urushib: "Sanladan yoshi katta odamlaga manga salom berishidan avval salom beringlar. Mani uyoltirmangla. Yusup boboni naveralari beaql ekan deydi", - derdilar.

Bobom bilan amakimni fermalarida qo'y boqardik. Qo'y boqib yurib bobom har xil hikoyalar, qo'shiqlar aytib berardilar. Yo'l-yo'lakay o'tdan tortib xasgacha buni oti nima deb so'rab ketardik. Bobom bilganini nomini aytar, bilmaganiga o'zi to'qib nom aytardi. O'shanda ko'p o'tlarni bobom aytgan nom bilan tanib qolganman.

Bozorda uyga borib buvimdan gap eshitishlarini bilsalar ham doim oldida kamgina narsa olib o'tirgan, mahsuloti yaxshi bo'lmasayam muhtojlikdan savdoga chiqqan qari chol, kampir yoki kelinlardan xarid qilardilar. Hozir bu xarakter deyarli oilamizning barcha a'zosiga o'tgan. Hatto buvim ham bobom o'tgandan keyin shunday savdo qiladigan bo'lganlar.

To'y-tomosha bo'lsa davrada o'tirib olishimizni yoqtirmasdilar. Asabiy yuz bilan tur ishlarga qarash ma'nosida imo qilardilar. O'sha payt bobomni yomon ko'rib ketardik. Lekin bu ham bir katta dars ekanligini vaqt o'tib tushunib yetdim.

Bobomning bizga bergan hayotiy saboqlari juda ko'p edi. Bu dunyoni tark etganlarida eng katta suyanchig'imdan ayrilganday bo'lganman. Lekin aniq bilaman hali bobom haqida chevaralarimga ham gapirib beraman.

@okean_Guloro Ochish/sharhlash

2022-10-25 21:40:05 Shamolli ob-havodan qo'rqaman. Go'yoki shamol men turgan uyni uchirib, qulatadiganday. Agar yomg'irli shamol bo'lsa yanada qo'rqinchli, Endi uyim qulasa, yomg'irda erib ham ketadi. Keyin tuzatolmayman. Hozir ham qo'rqyapman. Uchinchi qavatdan uy bilan qulash qanday bo'lsa? Ochish/sharhlash

2022-10-24 13:13:03 Arab shaharlarining birida ikki yigit juda xandon qahqaxa otib kulayotgan edi. Ularning oldidan o‘tib ketayotgan shahar mas’ullaridan biri bu kulgining sababini so‘radi. Yigitlar:
  — Biz shaharning butun muammolariga bir yechimni bilamiz” - deyishdi.
Mas’ul:
  — U nima ekan?
Yigitlar:
  — Butun xalqni bitta umumiy qabrga dafn qilamiz, ularga qo‘shib bir eshakni ham.
  Mas’ul dahshatga tushib so‘radi:
  — Eshakni nega ko‘mamiz?
Yigitlar yana qahqaxa otib kulib yubordilar, hatto kulgidan ko‘zlardan duv-duv yosh keldi va bir-biriga qarab shunday dedilar:
  — Aytdim-ku hech kim xalq haqida so‘ramaydi deb!

@okean_guloro Ochish/sharhlash

2022-10-23 21:30:09 Ochish/sharhlash

2022-10-22 21:22:55 Ruhiyat...

Yuragimdan quvib chiqardim
Hislarimni, borsin sen tomon.
Manzilingni topib borarmi,
Va yo yo'lda adashar... tamom!

Xayollardan erkini oldim
O'ylamasin ortiq nelarni!
Qayerda baxt? Qayerda orzu?
Senchi uchratdingmi ularmi?

Tubsizlikdek tuyg'ular chuqur
Va shunchalik istaklar chalkash.
Ketmoq uchun kerak ko'p toqat,
Qolmoq uchun bir intiq qarash...

Yetmagay hech nihoyasiga
Yozay desam umrim maktubi
Va yo sen deb istaganlarim
Nasib etmagani hech taqdir

O'ylayversang o'ylar ham uzun
So'zlay desang so'zlar ko'p chunon
Faqat hayot turmadi kutib,
Faqat qabul qilmadi zamon.

@okean_guloro Ochish/sharhlash

2022-10-20 21:34:44 Bu sanani bilasizmi?

Talaba va o‘quvchilarning ma’naviy yuksalishiga ko‘maklashish markazi Media jamoasi 21-oktabr “O'zbek tili bayrami kuni” munosabati bilan Talabalar shaharchasida ijtimoiy so‘rovnoma o‘tkazdi va savollarga to‘g‘ri javob bergan talaba-yoshlarga kitob ulashildi. Batafsil yuqoridagi videolavhada tomosha qiling.

YouTubeda HD formatda ko‘rish

Rasmiy sahifalarimiz: Telegram | YouTube Ochish/sharhlash

2022-10-19 20:50:29 Yaxshi tushlar ko'ringlar

@okean_Guloro Ochish/sharhlash

2022-10-18 11:12:51 Universitetga taksida borsam yoki qaytsam doim bir xil ssenariy takrorlanadi.
Taksichi: - Bu yerda universitet bormi?
Man: - Ha bor.
- Qanaqa o'qish?
- Jurnalistika?
- Ha, jurnalistmisiz?
- Shunaqa.
- Nechanchi kurs?
- 4-kurs.
- Bitiruvchi ekansiz-da. Oilalimisiz?
- Yo'q hali.
- Yigitiz bormi?
- Yo'q.
- Haaa, turmushga chiqish ham muammo bo'ladi hali kasbingiz bilan.
- ....(boshlandi)
- Endi aytamanda, singlim, hech bir yigit xotini ertalabdan kechgacha erkaklar orasida mikrofon ko'tarib yurishini xohlamaydida.
- Mani ishim unaqamas.
- Babibirda, singlim. Qiyin soha tanlagansiz. Budjetmi kontraktmi?
- Budjet.
- Ha demak o'ziz qiziqib kirganmisiz? Lekin baribir qiz bolaga o'qituvchi, tikimchi yaxshida.
- Ha o'zim xohlab topshirganman. Hozir zamon nisbatan erkin, oilalar ham juda avtoritar emas. Kasbimni to'g'ri tushunadigan inson topiladi deb o'ylayman.
- Ha kasbizni tushunib uylanishiyam mumkin. Lekin baribir, ishlashga qo'ymaydi. O'qiganiz qoladi 4 yil qiynalib sarson bo'lib. Ota-onayiz ham kuyib qoladida qizimni shuncha qiynalib o'qitdim deb .......................................................................................................................... xullas singlim shunaqa. Haliyam bo'lsa ikkinchi mutaxasislik bir nima o'qishlar bor o'qib oling.
- ( sanga nima og'irim sanga tushyaptimi yo'lingga qarab yursang bo'lmaydimi.......) Insha Alloh unaqa bo'lmaydi. Tushunadigan odamlar topiladi. Menimcha taksichiga turmushga chiqmasam kerak katta ehtimol bilan.

Shunaqa bo'lishini bilsam, avval taksichilar bilan maslahatlashardim qayerga topshiray, qaysi yo'nalishda o'qisam tezroq erga tegib ketaman deb.

@okean_Guloro Ochish/sharhlash