ҚАМОҚДАГИ ШАХСДАН ҚАНДАЙ ҚИЛИБ ИШОНЧНОМА ОЛИШ МУМКИН? @Notari | Notarius_Info / Uyda qoling

ҚАМОҚДАГИ ШАХСДАН ҚАНДАЙ ҚИЛИБ ИШОНЧНОМА ОЛИШ МУМКИН?

@Notarius_info 23-савол:

Assalomu alaykum hurmatli Notarius_info hodimlari. Savolim shundan iboratki, men oilamizga tegishli bòlgan kòchmas mulkni Davlat Xizmatlari Markazi orqali ròyhatdan òtkazmoqchi edim (O'zbekiston Respublikasi Vazirlar Mahkamasining 2018 yil 29 dekabrdagi “Ko'chmas mulk ob'ektlariga bo'lgan huquqlarni davlat ro'yxatidan o'tkazish tartibini takomillashtirish chora-tadbirlari to'g'risida”gi 1060-son qarori), uy-joyimiz dadamni nomida, ròyxatdan òtkazish uchun dadamni pasportining asl nusxasi kerak ekan,afsuski hozirgi kunda dadamlar Jazoni ijro etish koloniyasida( ozodlikdan mahrum qilingan) Bu holatda men qanday qilib uy joyimizni ròyxatdan òtkazsam bòladi? Davlat Xizmatlari Markazida bosh xodim menga shunday dedi—dadangizning oldiga borib uy-joyni oila a'zolaringizning birontasiga davernes (ishonchnoma) qildirib kelasiz dedi, notariusdan tasdiqlangan holatda bòlsin dedi. Jazoni ijro etish koloniyasida notarius mavjudmi?
Men bunday vaziyatda qanday qilib qaysi yòl bilan uy-joyimizni ròyhatdan òtkazsam bòladi?
Dadamning òrniga, onamlar ariza bergan holda ròyhatdan òtkazsak bòlmaydimi? Iltimos batafsil tòliqroq yordam bering.

НОТАРИУС ЖАВОБИ:

Марказ ходимининг гаплари тўғри.

Бу вазиятда уйни рўйхатдан ўтказиш учун ишончнома керак бўлади.

Фуқаролик кодексининг 134-моддасига кўра бир шахс (ишонч билдирувчи) томонидан иккинчи шахсга (ишончли вакилга) учинчи шахслар олдида вакиллик қилиш учун берилган ёзма ваколат ишончнома ҳисобланади.

Эътибор беринг! Ишончнома оддий ёзма шаклда ёки нотариал шаклда расмийлаштирилиши кераклиги ушбу кодекс 135-моддасида қайд этилган.

Бу қоиданинг мазмунига кўра уйни расмийлаштириш учун дадангиз сизга нотариал тасдиқланган ишончнома бериши керак бўлади.

Шу вазиятда саволингиз жуда ҳам ўринли. “Жазони ижро этиш колониясида нотариус мавжудми?” Йўқ мавжуд эмас.

Бироқ унинг ўрнини босувчи шахс бор. Бу Жазони ижро этиш муассасаси бошлиғидир.

Қаранг! ФК 136-моддасида қайд этилишича озодликдан маҳрум қилиш жойларида бўлган ёки қамоқда сақланаётган шахсларнинг тегишли муассасалар бошлиқлари томонидан тасдиқланган ишончномалари нотариал тасдиқланган ишончномаларга тенглаштирилади.

Ўзбекистон Республикаси адлия вазирининг 2011-йил 25-майдаги 111-мҳ-сон буйруғига илова билан тасдиқланган “Нотариал тасдиқланган ҳужжатларга тенглаштириладиган васиятномалар ва ишончномаларни тасдиқлаш тартиби тўғрисида”ги ЙЎРИҚНОМА 24-бандига асосан мансабдор шахс бир ёки бир неча шахс номидан бир ёки бир неча шахс номига ёзилган ишончномаларни тасдиқлайди.

Бунда ишончнома матнида унинг тузилган (имзоланган) жойи ва санаси, ишонч билдирувчи ва ишончли вакилнинг фамилияси, исми, отасининг исми, доимий рўйхатга олинган манзили, ишончли вакилга берилаётган ваколатлар доираси, Ўзбекистон Республикаси Фуқаролик кодексининг 141 ва 142-моддалари тушунтирилганлиги кўрсатилиши керак.

Юқоридагилардан кўриниб турибдики, сиз уйни расмийлаштириш учун ишончномани ёзма равишда отангиздан олишингиз бу ЖИЭМ бошлиғига уни тасдиқлатишингиз керак.

Нотариусга савол юбориш

Қўнғироқ орқали нотариус билан ҳозироқ онлайн боғланиш

Барча турдаги ҳужжатларга буюртма бериш

Расмий каналга уланиш