Қайнота келинга хўжайинчилик қилиши мумкинми? Ассалому алай | Muslimaat.uz
Қайнота келинга хўжайинчилик қилиши мумкинми?
Ассалому алайкум! Ҳозирги кунда айрим қайноталар келиннинг ишига аралашишади. Ўғлига ёки қайнонага: “Келининг бундай қилди, буни қилмади, сен ишлаб келгунингча уйда ётди” ёки “Хотининг буни кийяпти, бунақа иш қиляпти”, деб эр-хотин орасини бузиб қўйишмоқда. Улар келинга хўжайинчилик қилишмоқда. Шариатимизда қайнота келинга хўжайинчилик қилишга ҳақлими? Келиннинг кийиниши, юриш-туриши эрига ёқаётган бўлса, қайнота аралашиши тўғрими? Шунга ҳақлими? Келинлар қачонгача қайнотани деб тинч яшай олишмайди?
Психолог:
‒ Ва алайкум ассалом. Ҳар бир инсоннинг ўзига яраша хулқ-атвори, темпераменти, яъни табиати ва феъли бор. Феъл-атворлар ҳам бир-бирига ўхшамайди. Одамнинг характери унга ота-онасининг берган тарбияси, яшаш муҳити, олган таълими, қандай кимсалар билан муносабат қилгани ана шу омилларга биноан шаклланади. Шунинг учун баъзи кимсаларнинг феъл-атворига эътибор қилиб сиқилиб юриш керак эмас. Айниқса у одам кекса одам бўлса! Чунки одам кексайган сари мия нейронлари шаклланишдан тўхтаган бўлиб, дунёқараши торайиб, чегараланиб бораверади. Ёш бола каби тез хафа бўлиб, кўнгли нозиклашиб қолади. Бундай одамлардан асло хафа бўлиш керак эмас. “Хўп бўлади”, дея бироз ғамхўрлик қилинса, кўнгли эриб, меҳрибонлик қила бошлайдилар. Бир-бирини тушуниб, бир оилада келишиб яшаш учун ҳар ким бошқа оила аъзосини тўғри қабул қилишга, гина-кудурат сақламасликка, кеча ўтган ишларни эсламасликка ҳаракат қилиши керак. Негаки буларга амал қилинмаган ҳолда ҳар кимнинг ичида хафагарчилик энергияси, яъни қуввати ҳосил бўладики, буни атрофдагилар ҳис этиб турадилар ва қилинган яхши муомала ҳам самимий бўлиб туюлмайди. Сохтадек туюлиб, бу каби яхши муомаладан ҳеч кимнинг кўнгли юмшамайди. Катталарнинг ёшини ҳурмат қилган ҳолда гина-кудурат қилмай яшалганда бу сабр ва чиройли муносабат учун савобларга эришилади, иншааллоҳ. Инсон ўзгалардан қанча хафа бўлса, шунча соғлигига путур етади. Бегона уйга келин бўлган аёл шу уйнинг қонун-қоидаларига бўйсунмай иложи йўқ. Албатта, шу уйнинг катталари нима деса, шунга итоат қилинади, агар шариатда ножоиз деб ҳисобланган ишларга буюрилмаса. Келиннинг турмуш ўртоғи аёлини деб ўз отасига қарши бормайди. Чиройли сабр қилинса, келин оила аъзоларининг барчаларини меҳрини қозонади. Аммо зулмга сабр қилиниши керак дегани эмас бу. Валлоҳу аълам.
#САВОЛ_ЖАВОБ
Савол бериш учун: Savollar.muslimaat.uz
T.me/muslimaatuz
