Давлат бюджетидан (яъни, халқ ҳисобидан) кун кўрадиган давлат | Муҳрим

Давлат бюджетидан (яъни, халқ ҳисобидан) кун кўрадиган давлат телевидениеси ҳозир, дейлик, нефть ва газ конларимиз кимларнинг қўлида экани, учта Ўзбекистонга етадиган газимиз нима учун сал совуқ келган қишларда йўқолиб, халқ свет ва газсиз қолиб кетаётгани ҳақидаги муҳокамалар ёки нима учун бир ғижжакчининг юбилейи учун ҳокимликлар фалон юз миллион сўм ажратиши кераклиги ҳақидаги баҳс-мунозаралар, “агар шу ғижжакчининг маънавияти бўлса, юбилейдан ҳам, юбилейига ажратилган миллионлардан ҳам воз кечсин – ўзбекчиликда юбилей деган нарса йўқ!” қабилидаги чорловлар майдони бўлиши мумкин эди. Бўлиши керак ҳам эди.

Аммо, тарки одат амри маҳол деганларидек, давлат телевидениеси мавжуд тизим, тузум ва тутумлардан сал бўлса-да норозилигини билдирган ёшларни “мирзолар қўриқловидаги маънавиятни синдиришга уриниш”да, оддий қилиб айтганда – маънавиятсизликда айблаш воситаси сифатида фойдаланилмоқда. Бир томондан хурсанд бўласан киши –қўйиб берсанг, булар ёшларни ўғрилик, юлғичлик, порахўрлик ва “маънавият номли антивирус” шунча вақтдан бери йўқ қила олмаган яна бошқа иллатларда ҳам айблаши мумкин эди (буниси ҳам тушунарли – “маънавият қўриқчилари”нинг тиғи бу иллатларнинг ҳақиқий ташувчиларига – тўмтоқ, ёшларга келганда эса ўткир).

Биринчидан, ёшлар ҳар доим ҳамма жойда норози (ҳатто ҳозирги ёшларни маънавиятсизликда айблаётган катталар 50 ё 60 ёш бўлиб туғилмаган ва ёш вақти норози бўлган), энг ривожланган мамлакатларда ёшлар ҳам нимадандир норози, ниманидир ўзгартиришга ҳаракат қилади, ҳамма яхши ўзгаришлар айнан шу норозиликлар ортидан – тўғриси, норози бўлмаган ёшлардан қўрққулик. Иккинчидан, маънавият худди булбулнинг овозидек гап – қорнинг том маънода тўқ, шароитларинг бадастир, эртанги кунингга чин ишонч бўлсагина қулоққа ёқади, мияга киради. Йўқса, ёқимсиз бир шовқин, холос.