Уйимда кеча соат 20:00 лардан бери свет йўқ, қанча уринсам ҳам | Муҳрим

Уйимда кеча соат 20:00 лардан бери свет йўқ, қанча уринсам ҳам, қанча юрсам ҳам, қайта улата олмадим бугун (айб ўзимда - етарлича, яхши ҳаракат қилмаган бўлсам керак). Ҳоким ва яна бошқалар ишдан олинганини телефонни мошинада зарядга қўйиш имкони пайдо бўлгач, пешинга яқин билибман. Хўп, шунча одамни ишдан олиб ташлашибди – шу билан нима ўзгаради ҳозир? Тўғри, хабарлар лентасида ҳоким ва энергетика замминистри ишдан олингани ҳақидаги хабарлардан кейин “Ўзгидромет: Ўзбекистондаги қаҳратон аста-секин ортга чекина бошлайди” сарлавҳали хабар турганини ҳам кўрдим, лекин, менимча, бу икки ҳодиса ўртасида боғлиқлик йўқ, сиз ҳам фахмлаб турганингиздек.

Ўзи шунча кундан бери бугунги ньюсмейкерлар қаерда эди? Энг қаҳратон кунларда мен фақат шу, ҳозир ҳаммма муҳокама қилаётган ҳокимнинг “газ бўлмасакан, икки кун чидаб беришимиз керак экан, чидаб берайлик”, деган ғалатироқ, лекин шу ҳокимгагина хос мурожаатини эшитдим, холос – бошқа бирор мутасадди ҳақиқатан ҳам газ бўлмаслигини, шунинг учун электр ҳам бўлмаслигини, ҳақиқатан ҳам дабдаламиз чиқишини, ҳақиқатан ҳам ҳеч нарсани эплаб бўлмаслигини айтгани ҳам, тушунтиргани ҳам йўқ. Ҳамма, ҳатто энг жим ўтиролмайдиганлар ҳам жим ўтирганди шунча кундан бери... Ҳай, гапиргандан гапирмаган яхши, акс ҳолда ёзганим ҳокимга марсияга ўхшаб қоляпти.

Лекин мен барибир бу ўзгаришлардан бирор маъно, мантиқ тополмадим (аслида бу нарсаларни қидиришнинг ўзи-да хато-ку, ҳай, ҳамма ҳам хато қилади). Менимча, бизнинг шароитимизда шунча вақтдан бери иш бериб келган садоқатли одамларни бирдан ишдан ҳайдаш учун бизга айти(б бў)лмайдиган жиддийроқ, шахсийроқ сабаблар керак. Ҳар ҳолда, ўтган беш-олти йиллик тарихимизда аномал совуқдан-да арзирли сабаблар бор эди бу одамларни ишдан ҳайдашга, лекин улар ҳайдалмаганди.