“Сенат ҳам совуқ, Сенатда ҳам свет ўчяпти”, деган сенаторларни | Муҳрим
“Сенат ҳам совуқ, Сенатда ҳам свет ўчяпти”, деган сенаторларни кўриб, ҳув пастдаги эронлик руҳонийга ўхшаб йиғлагиси келади одамнинг. Ўзи ўтирган бинони мунтазам электр ва иссиқлик билан таъминлай олмаган бу номи улуғ “халқ вакиллари” қандай қилиб халқ манфаатларини ҳимоя қилиши мумкин?
Сенаторларимиз (ёки уларга шундай қилишни буюрган, ўргатган кишилар) одамларга яқинроқ бўлиш, улар ҳам халқнинг ҳозирги муаммоларни ўз танларида ҳис қилаётганликларини кўрсатиш учун шундай дейишган, албатта. Лекин, билмадим, ҳозир бу сенаторлар тугул, нафақат Сенат раиси (дарвоқе, Сенат раиси чиқолмаса керак, бир вақтлар “контекстдан юлиб олинган” бир машҳур видеоси сабаб), балки ҳатто президентнинг ўзи чиқиб: “Менинг уйимда ҳам свет ўчяпти, уйим совуқ”, деса ҳам (ҳа-я, президент шунақароқ деган ҳам, бир вақтлар) халққа енгил бўлмайди. Аксинча, энди бир мен эмас, бутун мамлакат бояги эронлик руҳонийга ўхшаб йиғласа арзийди.
Биринчидан, амалдорларнинг бундай сўзларига ишонч кам. Ҳозир энг осони: “Уйимда свет йўқ, уйим совуқ”, дейиш – ана, энергияга энг масъул вазир деярли ҳар интервьюсида буни айтяпти. Лекин мамлакатда свет ўчмайдиган, совуқ бўлмайдиган жойлар борлигини одамлар билади, билмаса ҳам борлигини тахмин қилади. Фақат бирор жамоатчилик штаби йўқ-да – ўша “свети ўчмайди” деб тахмин қилинадиган маҳалла ва мавзеларда туну-кун навбатчилик қилиб, амалдорлар рост гапиряптими ё алдаяптими, шуни текшира оладиган. Иккинчидан, мабодо эртага энг юқори раҳбарлар ҳам шу гапни гапира бошласа, унда урди Худо – тамом бўлибмиз: 2003 йилги Грузиядан фарқимиз қолмабди.
Йиғлашдан тўхтагач, шу “Сенат ҳам совуқ, Сенатда ҳам свет ўчяпти” деган сенаторлардан жаҳлинг чиқа бошлайди, алам қилади-да одамга. “Сенат ҳам совуқ, Сенатда ҳам свет ўчаётган” бўлса, сенаторлари, халқ-ку майли, ҳеч бўлмаса ўзига ўзи қулайлик ярата олмаса, ёпақолайлик, тугата қолайлик бунақа Сенатни, дегинг келади. Тўғри-да, эртага бир бало бўлса, биринчидан, барибир ичидан бирорта “тажрибам етарли” дейдигани чиқмайди, иккинчидан, шу “сенаторлар” ва уларнинг Олий Мажлисда ўтирган “депутат” ўртоқлари ҳал қилади мамлакат тақдирини, аниқроғи, шуларнинг қўли билан қилинади ҳаммаси (кириш бору, чиқиш йўқ ЕЕОИга кузатувчи бўлиб қолганимиздек). Тақдирни 250 та “қўғирчоқ” ҳал қилди нимаю, 150 таси ҳал қилди нима – барибир “қўғирчоқ”-ку. 100 та кам бўлса, алам ҳам камроқ, ҳеч йўғи.
Бир бутун, ҳай, сал бутунроқ парламентимиз, сал жонлироқ депутат ва сенаторларимиз бўлганида эди, эҳтимол, аҳволимиз ҳозиргидек йиғлагулик бўлмасди, жонлироқ сенаторлар халқ учун бўлмаса ҳам, ҳеч бўлмаса ўзи учун Сенатни иссиқроқ ва чароғонроқ қилиб олган бўларди. “Ўзини ўзи эплаяпти шулар ҳам”, деб хурсанд бўлиб юрардик.
Тавба, “Сенат ҳам совуқ, Сенатда ҳам свет йўқ”муш... Лекин, тан олайлик, кеча шу гап чиққанидан кейин ташқарида ҳаво анча илиди – табиатнинг ҳам раҳми келди шекилли бечораларга.
#ХайпҲуқуқиАсосида
