АЙТИНГ, МАДИНАГА ҚАЧОН БОРАМИЗ?
Неча минг чақирим бугун орамиз,
Хатларнинг қатида кўнгил оламиз.
Эй мени дуоси йўқлаётган дўст,
Айтинг, Мадинага қачон борамиз?
Ишқида йиғладик, ишқида ёндик,
Ишқи деб дунёнинг ишидан тондик,
Умидга суяндик, унга ишондик,
Айтинг, Мадинага қачон борамиз?
Кўнгиллар қорайди, тош қотди, дўстим,
Киприклар учида ёш қотди, дўстим,
Яна умидворлик асқотди, дўстим,
Айтинг, Мадинага қачон борамиз?
Шарофат йўлини соғинди юрак,
Шафоат йўлини соғинди юрак,
Аллоҳ Расулини соғинди юрак,
Айтинг, Мадинага қачон борамиз?
Бори ғуссалардан қочсак баробар,
Салом эшигини очсак баробар,
Йиғласак баробар, тошсак баробар,
Айтинг, Мадинага қачон борамиз?
Қароғим ичига тўлмоқчиман мен,
Вужуди муҳаббат бўлмоқчиман мен,
Уммати Муҳаммад бўлмоқчиман мен,
Айтинг, Мадинага қачон борамиз?
Эй Набий, юрагим тўлди дегани,
Дардимни бир Худо билди дегани,
Мана, ғарибингиз келди, дегани,
Айтинг, Мадинага қачон борамиз?
Қалбимиз ажиб бир соғинчга тўлмиш,
Йўлларни ғовлаган аламлар кулмиш,
Иккимизда армон минг битта бўлмиш,
Айтинг, Мадинага қачон борамиз?
Йўл бўйи салавот айтиб кетгани
Дилни май, кўзларни соқий этгани,
Мени Бақий ичра боқий этгани,
Айтинг, Мадинага қачон борамиз?
Ўткирбек Муҳаммадсобир
Истанбул, Умрания
30.01.2021
14:00
Манба: habib_uz
https://t.me/joinchat/AAAAAEzXDnu6k6kDD1hUUg
