Карвон (Усмон Азим шеърига пародия) Карвон кўрдим - мошинлари | Mr. Muhammadali

Карвон
(Усмон Азим шеърига пародия)

Карвон кўрдим - мошинлари музлаб турар,
Ҳар мошинда битта шопир бўзлаб турар.
"Навбат", "инсоф" деган сўзлар эсдан чиқиб,
"Безочеред" кирар йўлни кўзлаб турар.

Пешонангга ЖиЭм ёзган, ўкинма ёр.
Жонинг чиқар бензин қуйсанг, сўкинма ёр.

Асфальт бўйи ''метан"гача мошиназор,
Сиқилмагин, сиқилгандан не фойда бор.
Нос-пос чекиб, сабр қилиб туравергин,
Тўлов қилиб, ойлаб мошин кутгансан зор.

Пешонангга ЖиЭм ёзган, ўкинма ёр.
Жонинг чиқар бензин қуйсанг, сўкинма ёр.

Қаҳратон қиш, қаҳр билан тўзиб келдинг.
Заправкага навбатларини чўзиб келдинг.
Ғирт палакат  ё шумқадам меҳмон каби,
Йўл-йўлакай газ-светни узиб келдинг.

Пешонангга ЖиЭм ёзган, ўкинма ёр.
Жонинг чиқар бензин қуйсанг, сўкинма ёр.

Ўн чақирим наридадир ўзга метан,
У ерда ҳам мошин тўлиб-тошиб кетган.
Сендан олдин бошқалар ҳам борганида,
"Напор йўқ" деб заправкани ёпиб кетган.

Пешонангга ЖиЭм ёзган, ўкинма ёр.
Жонинг чиқар бензин қуйсанг, сўкинма ёр.

Мен-чи? Менга метан, бензин нахи даркор?
Ахир, ЖиЭмдан бошқа ҳам улов бисёр.
Ўйламагин, Тесла-месла эмасми деб,
Уйда Теслабоп свет йўқ. Велигим бор.

Пешонангга ЖиЭм ёзган, ўкинма ёр.
Жонинг чиқар бензин қуйсанг, сўкинма ёр.

Пародия by @habikatura