2023 йил кириб келди. Кўпчилик яхши ният билан режалар қилади, | Muhammad's blog
2023 йил кириб келди. Кўпчилик яхши ният билан режалар қилади, янги ҳаёт бошлайди. Қайсидир режалар қолиб кетса, қайсиларидир албатта амалга ошади.
2023 йил учун дўстларимизга бир кичик мурожаат қилмоқчи эдим. Атрофимизни, дунёни яхшилаш учун кичик яхшиликларни кўпайтирайлик. Биз учун осон бўлган кичик яхшиликлар аввало ўз кайфиятимизни яхшилайди, ундан кейин улар сони кўпайган сари жамият ҳам яхшиланади. Кимнингдир қўлидаги юкини кўтариб юбориш, кимгадир эшикни очиб туриш, кўчада ётган баклажкани ахлат қутисига ташлаш, касал болага пул йиғилганда ҳеч бўлмаса 2000 сўм пул бериш, совуқда автобус кутиб турган одамни уйига ташлаб ўтиш, қийналиб қолган оилага бир марта бозорлик қилиб бериш ва ҳоказолар. Ҳар ким имкониятидан келиб чиқиб қўлидан келган кичик яхшиликларни кўпайтирса жамият ҳаёти шунчалик яхшиланади. Ва бу ҳар кимнинг қўлидан келади. Яхшилик доим моддий бўлиши шарт эмас, маънавий бўлса ҳам фойдали бўлади. Масалан, кайфияти йўқ одамни кайфиятини кўтариш, атрофдагиларга жилмайиб боқиш, мақтаб қўйиш, комплимент қилиш. Сиз қанчалик яхшиликни кўпайтирсангиз, ҳаётингиз ҳам шунчалик яхшиланади.
Келинг, комментда кичик яхшиликларни ёзамиз, шу орқали қилишимиз мумкин бўлган яхшиликлар рўйхати шаклланади. Шунингдек, сизга бегоналар қилган кичик яхшиликлар ҳақида ҳам ёзиб қолдирамиз.
Йилни яхшилик билан бошлайлик, худо хоҳласа яхшилик билан давом этади.
