АЛЛОҲ ДЕЯ УРАР ЮРАКЛАР.

2022-09-01 03:23:32 АССАЛОМУ АЛАЙКУМ АЗИЗ ЎЗБЕК ХАЛҚИМ!
БАЙРАМИНГИЗ МУБОРАК БЎЛСИН!


Ўзбекстон, сенга тилак, олқишим бордир,
Қадрингга етмаган ҳар жойда хордир.
Сени бир кўрмоққа ҳар диллар зордир,
Қутлагани келдим сени ўзбегим,
Сен менинг қалбдаги гўзал ўзлигим.

Сенда яшагайдир чин Алпомишинг,
Асло эгилмагай шу мағрур бошинг.
Аллоҳим тўкмасин кўзингдан ёшинг,
Тожик элидан сенга келтирдим салом,
Бағрингга бир бор бос, кел дея, болам.

РАҲИМА МЎМИНОВА. Ochish/sharhlash

2022-08-30 16:19:17 Сокин кузнинг тонгидек гўё,
Секин дилга кириб келурсан.
Ишқинг гулли баҳормиди ё,
Қалбга оташ билсанг солурсан.

Сенга деган туйғулар уйғоқ,
Тунда юлдуз ила сирлашур.
Орзуларнинг қанотлари оқ,
Сенинг исминг ила бирлашур.

Чақнаб кетар маюс кўзларим,
Йўғрилгандир ишққа қоришиқ.
Телба дема, сенга сўзларим,
Ортиғидан кетса-да ошиқ.

РАҲИМА МЎМИНОВА 30.08.2022 Ochish/sharhlash

2022-08-29 07:23:10 Тонгда саболардан келди хўш хабар,
Елвизак шамоллар сочим силади.
Юрагимда ажиб сеҳр мавжланиб,
Туйғулар қиқирлаб шодон кулади.

Бисотимда бори сўзларни жамлаб,
Бир нома битай деб ушладим қалам.
Кўзимда учқунлаб шодлик келди-ю,
Салгина сурилди мендан ғам-алам.

Сендан дарак келмоқ асли менга бахт,
Сўзлар қалашади дилимдан кўчиб.
Кабутар мисоли парвозлаб бирдан,
Кўкка интиламан мисоли учиб.

Орзулар рост қатлаб қадди-қоматин,
Ҳаёл уммонимда сузади беҳол.
Ҳислар кўзларини очади бир-бир,
Гўё тонг олгандек атиргулдан бол.

Гўё қўлларингдан тутиб кезгандек,
Муҳаббат боғида юраман сармаст.
Қара, қувончларни ишқни сезгандек,
Юриш бошлаб келди ғамга қасдма-қасд.

РАҲИМА МЎМИНОВА 29.08.2022 Ochish/sharhlash

2022-08-22 08:35:08 Қўлимни узатсам самодан узоқ,
Эҳтимол йўлингга фироқлар тузоқ.
Саволлар занжири узундир бироқ,
Кимни дединг гапир, менми, бошқами?

Етиб бормадими, номалар битдим,
Минг йиллар йўлингни интизор кутдим.
Ҳижроннинг кўксини майдалаб титдим,
Кимни дединг гапир, менми, бошқами?

Сен деган висолнинг йўли йироқми?
Муҳаббат нима у асли сўроқми?
Ишқ қолиб ҳижроннинг бўйлари оқми?
Кимни дединг гапир, менми, бошқами?

Кута-кута гул сочиб кетди баҳорлар,
Сабо сочин силаб отди наҳорлар.
Йўлингга сув сепиб оқди анҳорлар,
Кимни дединг гапир, менми, бошқами?

РАҲИМА МЎМИНОВА 22.08.2022 Ochish/sharhlash

2022-08-19 07:36:17 ЖУМА МУБОРАК АЗИЗ ИНСОНИМ!

Бугун Аллоҳимга илтижойим бор,
Саловатлар айтгум Расулимга мен.
Ўзинг асрагайсан кўнгил торликдан,
Ахир қара бу дунё қулочлари кенг.

Бугун бир зўмгина Онам ҳаққига,
Дуолар ўқийин шодлансин мендан.
Отам боқиб турар кўкдан термулиб,
Хавотирланганми нега у недан?.

Кеча тушларимда келиб у деди,
Болам кўзларингда бироз ёш кўрдим.
Шунгами тинчгина ўтиролмасдан,
Тонгда юзларингни кўрай деб турдим.

Сизни соғингандан бўлса керак-да,
Отажон, тинч бўлинг юрибман омон.
Қаранг, сиз экансиз улкан бир тоғ-да,
Ўйлаб йўлларингиз буриб мен томон.

Дуолар ижобат бўлар кун бугун,
Жумангиз муборак азиз диндошим.
Оталар ҳаққига тиловат ўқинг,
Десинлар бор экан менинг издошим.

РАҲИМА МЎМИНОВА. Ochish/sharhlash

2022-08-18 16:20:07 Қўлимиздан маҳкам тутганча,
Боғ сайлига чиқамизми, ёр?
Хазонларнинг шитир-шитири,
Зора қилса дилни бахтиёр.

Ерда хазон, тепада хазон,
Сочқи мисол тўкар дарахтлар.
Сен ёнимда юрганда ҳар он,
Кулиб боқар, қарагин бахтлар.

Қаршимизда тиз чўкар олам,
Гул ўрнига сочиб хазонлар.
Бизни четлаб ўтади ҳатто,
Гардга қунган шамол-тузонлар.

Биз шундайин мағрур пойма-пой,
Ишқ йўлидан борамиз ўтиб.
Ҳавас билан кўкда боқиб ой,
Висол ила туради кутиб.

РАҲИМА МЎМИНОВА 18.08.2022 Ochish/sharhlash

2022-08-18 09:56:19 УКАЖОНЛАРИМИЗГА ЖУНАТАМИЗ

Укам, бииир суҳбат қўрайлик кел,
Кулгумиздан дунё қолсин лол.
Ўтган-кетган гапни эсласак,
Аламлар ҳам бўлсинлар беҳол.

Укажоним, сени соғиниб,
Соғинчларга эгдим бошимни.
Билдирмай деб дардим тўкмадим,
Яширдим мен кўзда ёшимни.

Ҳасратларим сўзламай дедим,
Сенгинани қийнагим йўқдир.
Чарчагансан дунё ташвишдан,
Қара, улар кўзлари ўқдир.

Укажоним, ўтган кунларни,
Ҳар кун бир-бир, кўп бор эслайман.
Қувончларни рангларга бўяб,
Расмин чизиб ҳар дам туслайман.

Эсингдами, бизга сўқланиб,
Шодлик нари кетолмас эди.
Армон лабин буриб сўз демай,
Югирса-да етолмас эди.

Бугун сенга дардим айтмайман,
Кел кўнгиллар яйрасин шоддан.
Ширин сўздан асло қайтмайман,
Юрак безор беҳуда доддан.

Қунғироқ қил, овозинг тинглаб,
Зора дилим тополса таскин.
Кўргим йўқдир, қароғларингда,
Ғам-аламли оқизоқ ашкинг.

Меҳрим сенга армуғон этиб,
Аллоҳимдан тилайман соғлик.
Бошгинангдан нурларин сочиб,
Пойингда тиз чўксин бор борлиқ.

РАҲИМА МЎМИНОВА 18.08.2022 Ochish/sharhlash

2022-08-16 07:57:11 Катта компания директори ўз ўринбосарига гап уқтирмоқда:
— Сизни табриклашим мумкин. Бундан олти ой илгари оддий ходим сифатида иш бошлагандингиз. Бир ой ўтиб бўлим бошлиғи бўлдингиз.
— Тўғри.
— Икки ой ўтиб, омборхона бошлиғи бўлдингиз.
— Бунисиям тўғри.
— Ҳозир эса, кўз тегмасин, бош директор ўринбосари лавозимида ишлаяпсиз. Бунинг учун нима дейиш керак?
— Раҳмат, дада! Ochish/sharhlash

2022-08-16 07:56:27 Сизнингча энг мукаммал илм қаерда?
Шарқдами ёки қутубдами..?

Ochish/sharhlash

2022-08-16 07:55:18 Бир ўзбек хорижга меҳмонга борса, ундан сўрашибди:
— Сизларда кўпроқ қандай овқатлар қилишади?
— Сомса.
— Нима ўзи у?
— Хамирни ичида гўшт, пиёз солиб пиширилади.
— Яна нима ейишади?
— Чучвара.
— У қанақа пиширилади?
— Хамирни ичида гўшт, пиёз солиб пиширилади.
Хорижликлар ҳайратланиб:
— Бундан ташқари яна нима овқатларни севиб истеъмол қиласизлар?
— Бизда яна манти бор...
Ochish/sharhlash