Улуғ аждодларимизга таъзим Бугун буюк темурий саркарда, Бобу | Madaniyat.uz I Rasmiy kanal
Улуғ аждодларимизга таъзим
Бугун буюк темурий саркарда, Бобурийлар сулоласининг асосчиси, шох ва шоир, улкан салоҳият ва юксак маданият соҳиби Заҳириддин Муҳаммад Бобур таваллудининг 538 йиллиги кенг нишонланланмоқда.
Бобурнинг ҳаёти ва ижоди ҳақида тўхталар эканмиз шу ўринда машҳур муаррих Мирзо Ҳайдарнинг айтганлари ёдимизга келди ” Туркий шеърни Амир Алишердан кейин ҳеч ким Бобур ёзган даражада ёзган эмас.” 18-19 ёшидан бошлаб ёзган ғазал ва рубоийлари, илмий-бадиий асарлари ва айниқса 35 ёшида ёзиб тугатган бебаҳо “ Бобурнома”си билан дунё адабиёти оламини забт этди.
Аслида улуғ шоиримизнинг ғазаллари, ҳар бир сатридан ажиб бир оҳанг таралиб тургандек, умри адоқсиз Ватан соғинчи, дардию алами билан ўтган озурда жоннинг нидолари янграб тургандек бўлаверади:
“ Хатинг аро узоринг сабза ичинда лола,
Ул чашми пурхуморинг лоладағи ғазола
Барча парилар, эй жон, гирдингда зору ҳайрон,
Гўё эрур намоён ой теграсида ҳола...”
Биз шундай ҳар томонлама мукаммал сифатларга эга, ўзи Андижонда туғилиб, Ҳиндистонда яшашга мажбур бўлган, лекин ўзининг улуғ инсоний фазилатлари билан ҳиндистонликларнинг меҳри-ишончига сазовор бўлган, деярли уч ярим аср давом этган Бобурийлар давлатчилигига асос солган аждодимиз Мирзо Бобур билан ҳақли равишда фахрланамиз.
Унинг қатъияти, жасорати, матонати,ғайрат-шижоати, айни пайтда беқиёс илмий салоҳияти, чуқур тафаккури, юксак маънавият, маданияти билан бизга ҳамиша ибрат бўлиши керак.Самимий туйғулар куйчиси, Ватан соғинчининг дардли аламларини бетакрор сатрларга жавоҳирлардек жойлаган буюк қалб эгаси халқимизнинг фахри, ғурури бўлиб қолаверади.
Озодбек Назарбеков, Маданият вазири
https://t.me/ozodbek_axmadovich
