"NASR" maktabi

2023-05-09 17:24:13 Нутқ уч хил бўлади:

1. Таъсирли.

Бу каби нутқ рост бўлиши ҳам, ёлғон бўлиши ҳам мумкин. Аммо шуниси аниқки, у сизни таъсирлантиради: хавотирга солади, йиғлатади, хурсанд қилади, кулдиради. Айнан мана шу таъсирлари орқали сизни ҳаракатга чорлайди.

2. Аниқ маълумот берувчи.

Бу турдаги нутқ ўзида аниқ фактларни жамлаган бўлади. Йиллар, кунлар, ўлчамлар, нарх, манзил ва ҳоказо. Бу нутқнинг камчилиги шундаки, у одамни зериктиради, чарчатади.

3. Таъсирли ва аниқ маълумот берувчи.

Ҳа, тўғри англадингиз. Учинчи турдаги нутқ юқоридаги иккитасининг бирлашмасидир. Бу нутқ орқали сиз ҳам аниқ маълумотлар бериб ўтишингиз, ҳам одамларни таъсирлантиришингиз мумкин.

***

Юқоридаги сифатлар ёзма нутққа ҳам тегишли.

Хўш, сизнингча, инсонларда ишонч уйғотиш ва уларни маълум ҳаракатга чорлаш учун қайси нутқдан фойдаланиш афзалроқ?

@gavhar_nasrulloh Ochish/sharhlash

2023-05-08 09:49:59 Копирайтер бўлишнинг 5 сабаби:

1. Ҳар бир бизнесга матнлар керак.

Айнан сиз ўша матнлар ёзувчиси бўлишингиз мумкин. Бу биринчи сабаб.

2. Шахсан менга энг ёқадиган сабаб шуниси: эркин графикда ишлаш имкониятига эга бўласиз.

Фарзандингизнинг тоби қочганида, уйингизга меҳмон келадиган бўлиб қолганида ёки бошқа сабаблар туфайли ҳеч кимдан жавоб сўраб юришингиз шарт эмас. Албатта, агар офисга ишга жойлашиб олмаган бўлсангиз.

3. Ҳамиша дунёқарашингиз кенгайиб боради.

Турли хил буюртмалар олишингиз ва иш доирасида маълумотлар излашингиз баробарида, мавзу бўйича анча-мунча билимга эга бўлиб қоласиз.

4. Нафақат ёзма, балки оғзаки нутқингиз ҳам ривожланиб боради.

Атрофингиздагилар учун турли мавзуларда суҳбатлашиб кета оладиган шинаванда инсонга айлана бошлайсиз.

5. Ваниҳоят, бешинчи сабаб — даромад.

Шахсан ўзимдан келиб чиқиб айтсам, айни пайтда учта лойиҳада ишлай оляпман. Бирида маркетолог, иккинчисида копирайтер, учинчисида ёзма таржимон сифатида. Булар доимий ишларим.

Бундан ташқари, маркетинг бўйича консультацияларга чақириб туришади, копирайтинг ва таржима бўйича ҳам вақтинчалик буюртмалар келиб туради. Ва мана шу вақтинчалик ишларим ҳам маълум мунтазамликка эга. Яъни ҳеч қачон янги бир буюртмасиз қолиб кетганимни эслай олмайман.

Хўш, қандай хулосага келдингиз? Копирайтингни ўрганишни бошлайсизми?

@kopirayrting_maktabi Ochish/sharhlash

2023-05-07 20:07:55 Копирайтинг қонунияти:

1. Ёзилган матн ёзилмаган матндан яхшироқ.

2. Юборилган матн юборилмаган матндан яхши.

3. Мазмунли ёзилган ва вақтида юборилган матн — копирайтер интилиши керак бўлган мўлжалдир.

@kopirayting_maktabi Ochish/sharhlash

2023-05-05 18:18:44 Яхши ёзадиган муаллифларни ўқир экансиз, чиройли сўзлашни ўрганасиз.

Таржима

@kopirayting_maktabi Ochish/sharhlash

2023-05-04 18:56:19 Бугун сизларга бир воқеани айтиб бермоқчиман. Тўғрироғи, ёзиб))

Копирайтинг орқали кўпроқ пул топиш мумкинлигини тушуниб етишимга сабаб бўлган воқеа:

Карантин пайтлари. Бир компания маркетологи билан онлайн ишлардик. Ўшанда битта тилда битта пост ёзиб берсам, 50 000 сўм тўлашарди. Иккита тилда ёзсам, табиийки, қимматроқ ҳақ олардим.

PR-мақолаларни эса бошқача ҳисоб-китоб қилардик.

Бир куни ўша маркетолог бир мактуб ёзиб беришимни илтимос қилиб қолди. Вазиятни тўлиқ тушунмай ёза олмаслигимни билдирдим.

Хуллас, биринчи марта ўша мижоз билан телефон орқали суҳбатлашдик:

Айтишича, уларнинг компанияси брендинг ва логотип хизматлари учун онлайн тарзда тендер эълон қилган экан. Шу эълон доирасида айнан мана шу хизматни кўрсатувчи фирма ва компаниялар уларга тижорий таклифлар юбора бошлаган.

Уларга энг маъқули Белорусияда фаолият юритувчи компаниянинг таклифи бўлган. Фақат кўрсатилган бандлардан биттасини истисно қилганда.

Улар ўзаро қўнғироқлашишган ва шартнома тузаётганда ўша бандни олиб ташлашга оғзаки келишишган. Бир-икки соатдан сўнг юборилган шартномани ўша банд олиб ташланган деган гумон билан имзолаб юборишган.

Муаммо кейинроқ, пул тўланадиган вақтдагина аён бўлган. Талаб қилинаётган сумманинг мўлжалдагидан анчагина баландлиги буларни ҳайратга солиб, шартномани варақлай бошлашган. Ана ўша пайтда бояги банд олиб ташланмагани аён бўлган.

Бу томондан нақ иккита қўнғироқ ва учта мактуб юборилган бўлишига қарамай, нариги томон шартномани бузишга розилик бермаган. Аксига олиб, жаримаси ҳам анчагина бўлган.

Шундай қилиб, бу ерда менинг вазифам, чиқмаган жондан умид тарзида янги мактуб ёзиб беришдан иборат эди.

Масалани обдон тушуниб олган бўлсангиз, одатда, ишингиз тез бажарилади. Фикримни жамлаб, мактубни ёзиб жўнатгунимча, ярим соат вақт ўтди холос.

Мактуб матни битта кичик постчалик эди. Ҳозир ўқиётган матнингиздан нақ уч-тўрт баробарга кичик.

Менга буюртма берган маркетолог аввалига эътироз билдирди. Яна бироз узайтиринг, деди. Йўқ, шуни юборинг, деб туриб олдим. Бироз тортишувдан кейин жимиб қолган буюртмачим, йигирма дақиқалардан кейин, мактуб жўнатилганини айтди.

Шу билан жимлик. 5-6соатдан сўнг картамга пул тушгани ҳақида хабар келди. Қарасам, 1 миллион сўм туширилган. Ўша куни ҳеч кимдан бунақа суммада пул тушишини кутмаётганим учун бироз ҳайратландим.

Бояги мактуб ўта қисқа бўлгани учун, ўзимча битта пост сифатида 50 минг сўм хизмат ҳақи кутгандим.

Шошиб телеграмга кирдим. Бояги маркетолог иш битганини айтиб, пул ташлангани ҳақида скрин юборибди.

Содда бўлмай кетай, адашиб кетибсиз шекилли, 50 минг ўтказишингиз керак эди, деб ёзиб юборибман.

Ўшанда ўша маркетолог яхши сабоқ берганди манга. Айнан сизнинг мактубингиз туфайли биз анчагина кераксиз харажат, яъни зарардан қутулиб қолдик, деб ёзди у. Боз устига, нариги томон ҳам мактубимни эътироф этганини билдирди.

Масалага чуқурроқ ёндашиб, англаган ҳолда бажарилган вазифанинг нархи анчагина қимматроқ бўлишини англаб етдим ўшанда.

Ушбу пост мабодо, соҳада ишлаётган бўлсангиз ёки келажакда ишласангиз, сиз учун фойдали бўлади деган фикрда ёзилди.

Айтгандай, айнан мана шу воқеадан икки кун ўтиб, онлайн маркетинг курсида ўқишни бошлагандим.)


@kopirayrting_maktabi Ochish/sharhlash

2023-05-02 19:29:27 #савол_жавоб

Шу кунлар мобайнида шахсий хабар орқали бир нечта саволлар юборишган экан. Бугун шулардан баъзисига жавоб бериб ўтсам.

Савол: копирайтингни масофадан туриб ўрганса бўладими? Яъни онлайн?

Жавоб: ҳа, бўлади.

Савол: копирайтингни ўргансам, иш топа оламанми?

Жавоб: Ҳа, топа оласиз. Копирайтер қидираётган компаниялар ёки агентликлар орасида ҳам масофадан ишловчи, ҳам офисга келиб ишлайдиган ходимга эҳтиёж сезаётганлари бор. Сиз ўзингизнинг хоҳиш-истакларингиз, вазиятингиздан келиб чиқиб, иккисидан бирини танлаб, ишлайверасиз.

@kopirayting_maktabi Ochish/sharhlash

2023-05-01 19:40:19 Ассалому алайкум!

Орада бўлиб ўтган танаффус пайтида зерикиб қолмадингиз деган умиддаман.

Эҳтимол, танаффусни сезмагандирсиз ҳам.

Ахир озмунча воқеалар бўлдими? Рамазон ҳайити муносабати билан нақ 4 кунлик дам олиш куни. Референдум.

Хуллас, бу ёғига канал фаолияти келган жойидан давом этади, иншааллоҳ!

@kopirayting_maktabi Ochish/sharhlash

2023-04-18 18:41:55 Сўз — ҳамма нарсанинг асоси. Энг зўр фильмлар, мультфильмлар, видео — хуллас, ҳар қандай контент, аввало, сўз шаклида ёзилади.

Сўзлаш, сўзларни ёзиш учун фикр керак.

Ие, у ҳолда, ҳамма нарсанинг асоси сўз эмас, фикр экан-да, деб эътироз билдиради кўпчилик.

Эҳтимол. Аммо фикри бўлса-да, уни тўғри сўзлар билан ифода эта олмаса-чи?!

У ҳолда, фикр ўз эгасининг миясида қолиб кетиб, ўз актуаллигини йўқотиши ёки эгаси билан бирга бу дунёни тарк этиши ҳам мумкин.

Шунинг учун ҳам асосни фикр эмас, сўз ташкил қилади.

@kopirayting_maktabi Ochish/sharhlash

2023-04-17 18:59:50 Копирайтингда йўл қўйиб бўлмайдиган 5 та "М" қоидаси:

1. Мижғовлик.
2. Манманлик.
3. Муғомбирлик.
4. Масъулиятсизлик.
5. Мураккаблик.

P.S. Мана шу қоидани ўйлаб топиб, жорий қилганимдан кейин ишим сифати ортган. Табиийки, хизмат ҳақим ҳам кўтарилган. Анчагина.

@kopirayting_maktabi Ochish/sharhlash

2023-04-16 18:44:38 Бугун бир савол-жавоб қилишга нима дейсиз?

Агар саволларингиз бўлса, изоҳларда ёки @GavxarUmarova профилига шахсий хабар тарзида ёзишингиз мумкин.

Соддароқ саволларга бугун, мураккаброқларига ҳафта давомида жавоб бериб борилади.

Агар саволингиз бўлмаса, шунчаки лайк босиб кетишингиз ҳам мумкин. Шунга кўра янги постлар режалаштирилади.

Хуллас, бу ёғига қандай постлар ўқиш ўзингизга боғлиқ.)

@kopirayting_maktabi Ochish/sharhlash