2022-09-30 09:17:08
МЕН УСТОЗМАН...
Шовқинли синфда бир қучоқ бола...
Ҳатто кирганимни билмай қолишар.
Кимдир кўриб қолар тўсатдан, шу он
Бари ўз жойига туриб олишар.
Қўллари кўксида, жўровоз бўлиб,
Ўттиз бола бирдай беради салом.
Ўттизта фаришта соғлик тиласа,
Борми менга бундан ортиқ эҳтиром.
Бир қучоқ дафтарни босиб кўксимга,
Қуриган лабларим пичирлар секин.
Бирма-бир қарайман, ўттизта тақдир
Тушунаман менинг қўлимдалигин.
Илм чашмасига ташна юраклар
Қаршимда термулар, менга умидвор.
Ўзингга минг шукр, ўзинг мадад бер,
Мени устоз қилган эй Парвардигор.
- Салом, ўтиринглар, дарсни бошлаймиз.
Навбатчи ким?
Ҳамма дарсга тайёрми?
Дафтар-китобларни олинглар. Қани!
Ҳамма 100 фоизми?! Ҳамма ҳушёрми?! -
Дея одимлайман қатор оралаб,
Кўздан кечираман шошмай, бирма-бир.
Камига камчилик излайман атай,
Эътиборим найза, нигоҳим шамшир.
- Мен, Давлетов Лочин бугун навбатчи,
Дарсга ҳамма тайёр. Биз ўтган дарсда..... -
Дея бошланади қизғин жараён,
Киришиб кетади ҳамма бирпасда.
Аста варақлайман синф журналин,
Кимлар илинади бугун қармоққа?!
Сув қуйгандек жимлик чўкади яна,
Қани, ким тутилар экан сўроққа?!
Ким қўлини баланд кўтарган, аммо
Кимдир ердан уза олмайди нигоҳ.
Уйга вазифани бажармаган-да,
Қилиб қўйган, ахир, энг оғир гуноҳ.
Ниҳоят, ғалвирни кўтариб сувдан,
Қозонда борини олиб чўмичга.
Доскага ёзаман кун, сана, мавзу,
Бутун маҳоратим соламан ишга.
Қўлимда бўр: - Янги мавзу қийинроқ,
Диққат қилмасангиз, доғда қоласиз, -
Дея огоҳликка қиламан даъват,
- Йўқса, яна икки баҳо оласиз.
Дарс тугар, синфдан чиқаман базўр,
Шу он эшитилар бир таниш овоз.
Дейди бир шогирдим ортимдан келиб,
- Мен сиздай муаллим бўламан, устоз!!!
Қандай бахт! Етти қат осмон пойимда.
10 йилга яшариб кетаман шу дам.
- Насиб, омадингни берсин, - дейман-у,
Барча чарчоқларим топади барҳам.
Қиммат машиналар минолмам балки,
Тилла узук учун эмас қўлларим.
Қўш қаватли уйлар кирмас тушга ҳам,
Аммо жаннат томон бошлар йўлларим.
Пардоз учун фурсат қаёқда дейсиз,
Канда бўлар ҳатто тўйлар, ҳашамлар.
Менинг умрим ўтар шу зайл, бироқ
Билмадим, одамлар қандай яшарлар.
Ҳар оқшом ёстиғим ёнида китоб,
Кино, сериаллар қолади бўзлаб.
Кимда нима ҳасрат, нима ташвиш, ғам,
Яшаяпман фақат эртани кўзлаб.
Мактаб, дарс, болалар - умрим мазмуни,
Таълим-тарбиядир касбим, одатим.
Ўқитувчи бўлиб туғилгандекман,
Вазирдан кам эмас асло ҳурматим.
Қўллари кўксида, тавозе билан
Шогирдларим менга беришар салом.
Фариштадай соғлик тилаб туришса,
Борми бундан ортиқ ҳурмат-эҳтиром.
226 views06:17
K
