2021-02-08 16:36:21
YOMGʻIRPOʻSHYomgʻir maydalab yogʻib turgan kunlarning birida juma namoziga oshiqar edim. Shoshilganimdan yomgʻirpoʻsh ham olmabman. Ostonada chogʻim yomgʻirpoʻsh tutgan ayolim ortimdan yetib keldi.
– Shoshmang, dadasi, – dedi u. – Mana buni oling.
– Xoʻp, yaxshi oʻtiringlar, – dedim shoshgancha uni olib.
– Shoshmang, – dedi yana ayolim.
– Yana nima? – dedim ovozim sal balandlab.
– Bizni ham duo qiling, – dedi ayolim tabassum bilan.
– Butun dunyoni duo qilaman, – dedim men ham tabassum qilib.
Vaqt tez oʻtadi. Navbatdagi hafta va yana juma namozi ham tezda kelib qoldi. Kiyimlarimni saranjomlab, ozoda qilib qoʻygan ayolim:
– Bizni ham duo qiling, – dedi koʻzlari javdirab.
– Yoʻq, butun dunyoni duo qilaman, – dedim men yana.
Koʻzlarida hayratni koʻrgan boʻlsam-da, u boshqa soʻz demadi.
Yana bir juma kuni edi. Bu gal ayolim savollariga toʻliq javob olishni istadi chogʻi, odatdagi savoliga qoʻshimcha qilib:
– Nega faqat butun dunyoni? – deb qoldi.
– Nima, seningcha, faqat oʻzini oʻylash yaxshimi? – dedim.
– Yoʻq, lekin bizni ham duo qiling-da! – dedi u.
– Shu butun dunyoning ichida sen va farzandlarimiz – barchamiz bormiz-ku! – dedim.
– Ha... toʻgʻri aytasiz... – dedi u birdan chehrasi yorishib. Men qoʻshimcha qildim:
– Axir Alloh taologa duo qilmasak boʻladimi?! Paygʻambarimiz alayhissalom: “Duo moʻminning quroli, dinning ustuni va yeru osmonlarning nuridir”, deganlar. Alloh taolo bir lahza ham bizni oʻz holimizga tashlab qoʻymasin, nafsimizni oʻzimizga qul qilib bersin. Barchamizga ikki dunyo saodatini nasib qilsin!..
– Omiyn! Omiyn! – deb turardi ayolim duolarimga.
– Sen ham barchamizni duo qil, onasi. Farzandlarimiz bilan duo qilinglar. Begunoh bolalarning duolari ijobat boʻladi, – dedim.
– Xoʻp, – deb meni mamnun holda kuzatib qoldi u.
Oradan kunlar, oylar oʻtdi. Men malaka oshirish uchun xorijga oʻqishga ketdim. Juma namoziga yoʻl olar ekanman, telefonimga ayolimdan xabar keldi: “Butun dunyoni duo qiling...” Qalbim sururga toʻldi.
Telefonimning yuziga yomgʻir tomchilar edi...
Feruz Muhammad
@hubbuna
85 viewsShoirakhon Makhamadjanova, 13:36