2011 йилда чиққан 'Вирус' (русчаси 'Заражение', оригинал номи | Jakhongir Turayev | JR

2011 йилда чиққан "Вирус" (русчаси "Заражение", оригинал номи "Contagion" бўлган) филм бор. Уни кўпчилик кўрган: америкалик бир аёл Хитойга хизмат сафари билан бориб, у ердан шу пайтгача фанга номаълум касалликни юқтириб келади ва қайтганидан икки кун ўтмай вафот этади. Кейин бу вирус у билан мулоқотда бўлганларга тарқалади ва тез суръатда атрофдагиларни зарарлаб, уларнинг катта қисмини ҳалок қила бошлайди. Вирусга MEV-1 деб ном берилади, унга қарши вакцина (эмдори) ишлаб чиқаришга киришилади. Унгача ўтган бир йилдан ортиқ вақт давомида бу вирус бутун дунёга ёйилиб, миллионлаб кишиларнинг умрига зомин бўлади. Охири эмдори (вакцина) топилади ва эмлаш бошланади...

Филм илмий жиҳатдан ишончли ва аниқ ишланган. Балки шунданми, ўтган йил бошида коронавирус авж олар экан, ушбу филм билан боғлиқ фитна назариялари урчиб кетди. Аммо ҳозир филм сюжетини ҳам, ўтган йили туғилган фитна назарияларини ҳам муҳокама қилмоқчи эмасман.

Мавзумиз бошқа.

Ушбу филмда қизиқ бир лавҳа бор: MEV-1 вируси пайдо бўлиб, биринчи одамни зарарлаши биланоқ титрда "Зарарланишнинг 1-куни" деган ёзув билан маълумот берилади. Кейин кунларнинг рақами юқорига ўсиб боради: 2-кун, 3-кун, ... 15-кун, ... 257-кун, ... ва ҳоказо.

Эмдори ишлаб чиқарилиб, одамларни эмлашга киришилиши билан ҳисоб янгидан бошланади: "Зарарсизланишнинг 1-куни", 2-кун, 3-кун ва ҳоказо.

Яъни, филм ижодкорлари шу оддий лавҳа билан кўпчилигимиз эътибор бермайдиган бир ҳолатни эслатиб қўйган: ҳаётимиз доимий равишда ўзгариб, бир-бирининг ўрнини мунтазам алмаштириб турадиган босқичлардан иборат – бир босқич тугаши билан янги босқич бошланади, ҳеч қачон бир хилликда, турғунликда қотиб қолмайди.

Бугун Шаввол ойининг 2-куни. Кечагина бир ойлик рўзани – Рамазон ойини якунлаб, ҳайитни нишонладик. Ўтган ойда қолдирмай рўза тутдик, кечалари таровиҳ ва таҳажжудда турдик, беш вақт намозимизни имкон қадар масжидда адо этдик, закот ва эҳсонларимизни ҳақдорларга етказдик, одамларга яхши муомалада бўлдик. Ва буларнинг ҳаммасидан кейин умримиздаги муҳим босқич – фазилатли ибодат мавсуми (Рамазон ойи) якунланди. Шу якун сабабли кечаги кунни байрам қилдик.

Бугундан эса ҳаётнинг янги босқичи бошланди: "Рамазондан кейинги 1-кун", 2-кун... ва ҳоказо. Яъни, бугундан бошлаб яна рўза тутиш (бу сафар нафл – ихтиёрий), Рамазонда одатланган кун тартибини қайта бошлаш мумкин (Рамазон ҳайити фақат бир кун – ҳайитнинг эртасидан яна рўза тутиш мумкин).

[Таъкидлаш керакки, намоз – умр давомида тўхтамайдиган ибодат, шунинг учун у Рамазон амаллари қаторида алоҳида зикр қилинмайди.]

Шундай қилиб, ҳаётнинг янги босқичи – "Рамазондан кейинги 1-кун"дамиз. Кетдик!