Бузғунчи рус пропагандистлари Президент Шавкат Мирзиёевнинг жа | Gorizont

Бузғунчи рус пропагандистлари Президент Шавкат Мирзиёевнинг жадидлар ҳақидаги гапларини бузиб талқин қилмоқда. Мирзиёев нутқида асло ортиқча гап йўқ, бўлган тақдирда ҳам Мустақил Республика раҳбари сифатида мамлакатининг қонли тарихи ҳақида фикр билдиришга ҳақли. Буни ҳар ким онгли равишда тушуниши керак.

Мен Мирзиёев гапларига нисбатан билдирилган рус империалистларининг муносабатини ўқидим (айрим ўринларда қорақалпоқдаги воқеаларни ҳам илова қилиб кетилгани тушунарсиз). Уларнинг бари бир тийинга қиммат сафсата гаплардир. Бу даражада катта эътиборга арзимайди. Аммо уни кўпроқ ўзбек сиёсатчиларимиз шов-шувга айлантираётгани, Мирзиёевнинг гапларини империалистларга "тўғри тушунтиришга" ҳаракат қилаётгани ғалати. Ўзбекистон Мустақил Республика ва унинг амалдорлари йўқ бўлиб кетган давлат (СССР)нинг қонли қилмишлари ҳақидаги фикрлар учун кимларгадир тушунтириш бериш, ўзини оқлаш мажбуриятини олмаган. Бундай ҳолатлар давом этаверса, андишанинг отини қўрқоқ ҳисоблайдиган пропагандистлар янада авжига чиқиши ва яна ҳар бир айтган сўзимиздан "айб" қидириб, изоҳ талаб қилишни ўзига одат қилиб олиши мумкин.

Ташқи сиёсатда давлатнинг сўзи баъзида кескин бўлиб туриши лозим. Оқни оқ, қорани қоралигини айта билиш, бунга куч топа олиш катта жасорат ва сиёсий иродадан дарак беради. Империалистларнинг кўнглини оғритиб қўймаслик учун оқни оқишроқ, қорани кулранг дейиш нариги тарафнинг ҳаддидан ошишига олиб келади.

Истаймизми, йўқми, бундан кейин постсовет давлатларига ахборот ҳужуми ортиб бораверади. Уларга қарши фақат ва фақат кескинлик билан жавоб бериш лозим. Эсингизда бўлса, Тўқаев Путиннинг олдида рус депутатларининг фикрларини қоралаб, ДХР ва ЛХР каби давлатларни тан олмаслиги ҳақида қатъий айтган ва ўша ҳаракати орқали анча ҳурмат топганди. Ваҳоланки, бундан аввалроқ биз ҳам юмшоқлик билан шунга ўхшашроқ баёнот берган эдик. Иккита ҳолатни солиштирса, албатта, қатъий айтилган гап ва ҳаракат ўз ўрнини топишини кўрсатди.

Биз ҳеч қайси давлатга 31 йилдан буён ўз позициямизни "тўғри тушунтиришга" мажбур эмасмиз. Мажбур бўлмайлик ҳам.

Fayzbog’

@gorizont_uz