2022-02-27 16:15:00
Oʻzim bepulga oʻrganaymi yoki pul toʻlab kursga boraymi?
Izoh: dasturlash misolida ko'rib chiqamiz.
Soʻngi 2 yilda dasturlash, dizayn, umuman IT sohasiga qiziquvchilar soni keskin ortib ketdi. Bunga asosiy sabab real talabdan koʻra shu sohaga ixtisoslashgan oʻquv markazlari va ularning marketing yondashuvlari, xususan, reklamalar orqali jamiyatga tarqatayotgan katta-katta umidlari va tashviqotlari sabab bo'ldi.
Buni bilish uchun juda aqlli boʻlishga hojat yoʻq. Hozirda kurslarni bitirgan, ammo ishsiz, ishga kirolmasdan qiynalib yurgan yuzlab insonlarni shaxsan bilaman. Ularning xatosi kursga borganida emas, albatta.
Oʻzim ham 2 yildan berib IT sohasining u yoki bu yoʻnalishida ishlayman. Bu davrda birorta oʻquv markaz yoki universitetda o'qimagan oʻnlab kuchli dasturchilar bilan aloqa qildim, baʻzilari bilan ishladim va hozirda ham ishlab kelyapman.
Bu kabi dasturchilarning umumiy 3 oʻxshashliklari bor.
1. Ular eng kamida Rus yoki Ingliz tilini yaxshi bilishadi;
2. Oʻzlari oʻrganish koʻnikmasini shakllantirishgan va bunda chet tilidan foydalanishadi;
3. Oʻzlaridan bir pogʻona boʻlsa ham kuchliroq, ularga yoʻnalish beruvchi mentorlari bor.
Agar siz ham yuqorida keltirilgan chet tillaridan birini yaxshi oʻzlashtirgan boʻlsangiz unda koʻplab kasbiy koʻnikmalarni, xususan, dasturlash, dizayn kabi sohalarni oʻzingiz oʻrganishga harakat qilishingiz lozim.
Chunki, oʻquv kursi sizga boshlangʻich nazariy bilimlarni va qisman ular ustida mashq qilishni oʻrgatadi, xolos. Lekin, siz real proyektlarda nazariy bilimlaringizni qoʻllash va davomiy rivojlanish uchun doimiy izlanishingiz va oʻrganishga majbur boʻlasiz.
Agar til bilmasangiz tez rivojlanishdan, balki butunlay rivojlanishdan toʻxtaysiz. Shuning uchun hozirdanoq chet tillarini oʻrganishni boshlang.
Sizda til muammosi yoʻq boʻlsa, dastlab, youtube'dan, soʻngra udemy, skillshare yoki linkedin learning kabi xalqaro platformalardan kurslar sotib olib o'rganishni boshlang. Udemy'da top kurslar narxi o'rtacha $10-12 dollar.
Masalan, Full stack veb dasturlash bo'yicha Angela opani kursini tavsiya qilaman.
Fundamental bilimlarni o'zingiz o'rganib bo'lganingizdan keyin, endi biror mentor toping. Qaysi kurs va kitoblarni, ularni ketma-ketligini aniqlash uchun eng avval soha mutaxassislaridan maslahat olishni unutmang. To'g'ri yo'nalish tanlash muhim.
O'rganish davomida o'nlab loyihalarni o'zingiz bajarib ko'ring, sinashdan to'xtamang. Shundan so'ngina biror kompaniya, firmaga ishga kirish yoki tajriba olish haqida o'ylash mumkin. Ungacha erta, ikki tomon uchun ham qiymati juda past bo'ladi.
1.1K views13:15