2021-12-02 16:50:18
Ипотека кредитлари учун давлат субсидияларининг ажратилиши янада соддалаштирилади
Юртимизда аҳолини уй-жой билан таъминлаш энг муҳим вазифага айланди. Чунки, мунтазам равишда аҳоли ва янги оилалар сонининг кўпайиб бораётганлиги сабабли уй-жойга бўлган эҳтиёж ҳам ортиб бормоқда.
Шу боис, ипотека тизими тубдан ислоҳ қилинди. Ўтган йилларда ипотека кредитлари учун давлат субсидияларининг ажратилиши, ипотека фоизларининг бир қисмини компенсация тарзида қоплаб берилиши билан кўплаб масалалар ўз ечимини топмоқда.
Президентимиз бошчилигида ўтказилган йиғилишда айнан шу мавзу, уй-жой қурилиши ва ипотека соҳасини янада соддалаштиришга оид бир қатор ижобий ўзгариш ва янгиликлар эълон қилинди.
Хусусан, келгуси йили ипотека дастурлари доирасида 50 мингга яқин хонадонли уй-жойлар қуриш учун 13 триллион сўм мақсадли кредит ва 1,3 триллион сўм субсидия ажратилади.
- ипотека кредитлари ва субсидия олишда, уй-жой майдони ва нархи билан боғлиқ чекловлар ипотека кредитлари шартларидан чиқариб ташланади.
- эҳтиёжманд аҳолига дастлабки бадалнинг бир қисмини қоплаш учун 32 миллион сўм субсидия тўланади;
- субсидиялар якка тартибдаги уй-жой қуриш ва таъмирлаш учун олинган кредитлар учун ҳам берилади;
- ипотека кредитини олишда қариндош бўлмаган фуқароларнинг кафил бўлишига рухсат берилади;
Бундан ташқари, аҳоли маблағларини қурилишга жалб қилишни рағбатлантириш бўйича янги “мақсадли ипотека омонати” механизми жорий этилади.
Аҳолига қулайликлар яратиш мақсадида янги қурилган уйлар тўғрисидаги маълумотлар, уларни расмийлаштириш, субсидия ва кредит ажратиш хизматларини битта жойда кўрсатиш марказлари ташкил этилади.
Ушбу янги тизим жорий этилиши, аҳолини соҳада қийнаб келаётган бир қатор муаммоларни ҳал этиши билан бирга, уй-жой қурилиш соҳасини ривожланишига ҳам катта хисса қўшади. Жумладан, қурилиш материалларининг ишлаб чиқарилишини ўсиши, соҳада савдо айланмаларининг ҳажми ошиши, қурилиш ишларига жалб қилинганлар ҳисобига маълум бир даражада ишсизлик даражаси камайиши, кредит-молия тизими янада ривожланишига эришилади.
@farxod_zayniyev
1.4K views13:50
F
