Туркия президенти Владимир Зеленский билан гаплашди Туркия п | ELTUZ

Туркия президенти Владимир Зеленский билан гаплашди

Туркия президенти Ражаб Тоййиб Эрдўғон ва Украина президенти Владимир Зеленский телефон орқали мулоқот қилди, дея хабар бермоқда Anadolu агентлиги.

Туркия томонига кўра, президентлар Украина ва Россия ўртасидаги инқирозни, шунингдек, дон экспорти учун Қора денгизда хавфсиз йўлакларни яратишни муҳокама қилганлар.

Эрдўғон уларнинг энг катта орзуси украиналикларнинг тинчликда бўлиши эканини таъкидлади.

Анқара БМТ томонидан Украина ғалласини жаҳон бозорига олиб чиқиш бўйича тайёрланган режа устида ишлашда давом этмоқда, деди Туркия президенти.

Эрдўғон Москва ва Киев ўртасида тинчлик ўрнатиш бўйича музокаралар учун Истанбул жараёнига ёрдам ва воситачиликни ўз ичига олган барча турдаги ёрдамни кўрсатишга тайёрлигини билдирди.

Ўз навбатида, Зеленский Эрдўғон билан суҳбатда портларни блокдан чиқариш ва дон экспортини қайта тиклаш муҳимлигини муҳокама қилганини айтди. Украина президенти, шунингдек, босиб олинган ҳудудлардан озиқ-овқат экспорт қилинишининг олдини олиш зарурлигини айтди.

Бугун аввалроқ Эрдўғон Россия президенти билан ҳам телефон орқали гаплашганди.