2022-05-01 16:34:50
Қизилқум — Навбаҳор ўйинини Наманган телевидениесида ҳамда YouTube платформасида трансляция қилинадиган бўлди. Ўша вақтда Спорт-ТВ Милан — Фиорентина учрашувини намойиш қилади.
Бунга ажабланим йўқ. Чунки Италияда чемпионлик кураши даҳшат кетяпти. Қолаверса, МТРК А серияни катта пулга харид қилгани сир эмас. Суперлига бозори эса ҳозирча бунинг яқинига бора олмайди. Шундан келиб чиқиб, икки йилдан буён каналим орқали тақвим масаласида мухлисларга тушунтириш бераман. Оддий мисол — шу февралнинг бошида ҳам мана шундай чиқиш қилганман.
Минг марта тушунтирсанг ҳам, барибир саволлар келаверади. Чунки ҳамма ҳам чемпионатингни сен истагандек кузатмайди. Сабабини излаб жавоб топишдан кўра, келган жойидан савол бериш осонроқ албатта. Менимча, бугун ўша фикрларни ҳамма онгли равишда тушунади: биз кучли бешлик билан шанба-якшанба кунларида рақобат қила олмаймиз, улар билан ҳисоблашганимиз учун ҳам ўйинлар асосан иш кунида ўтади.
Аммо кўряпсиз, қўл силтаб ўтирилгани йўқ. Иш кунлари иш вақтида ўйинларни бошлашдек аҳмоқона одатдан кечиб бўлдик. Мана шу давр давомида биз Спорт-ТВ ва Футбол-ТВ ёрдамида Суперлига, Про лига каби турнирларни катта қийинчилик билан оммалаштириш пайидамиз.
Албатта кейинги режалар ҳам бор, чунки биз ҳам ўйинлар дам олиш куни ўтишини тўғрироқ деб биламиз. Бунинг учун биз биринчи галда ўз платформамизга эга бўламиз, кейин ўйинларни шу орқали босқичма-босқич тўлиқ онлайнга олиб чиқамиз. Бу орада Спорт-ТВ, Футбол-ТВ деган каналлар ҳам ҳар бир томошабиндан пул ишлаш йўлига ўтади. Сиз бунгача истаган футболингизни уйингизда бепул томоша қилиб келган бўлсангиз (кабель ёки бошқа антеннага тўланадиган пул ҳисоб эмас), кейинчалик футбол томоша қилиш учун ойига маълум миқдорда пул тўлашга ўтасиз. Борамиз барибир ўша даврга.
Ана ўшандагина саралашни, танлашни мухлислар ҳам конкретлаштиради. Бозор куни футболга борган маъқулми ёки уйда футбол кўрган маъқулми. Футболни пул тўлаб кўрган маъқулми ёки умуман кўрмаган маъқулми ва ҳоказо, ва ҳоказо. Ҳозирча эса А серия қиммат товар — Суперлига шунчаки ўзимизники. Милан неча йил деганда чемпион бўлмоқчи, ўзимизда эса чемпионлик пойгаси ҳали узоқ давом этади.
9.6K views13:34