БУХОРХУДОТЛАР ДАВЛАТИ VI-VIII асрларда Бухорода ҳукм сурган | БУХОРО ТАРИХИ

БУХОРХУДОТЛАР ДАВЛАТИ

VI-VIII асрларда Бухорода ҳукм сурган сулола. Пойтахти Бухоро шаҳри. Ҳудуди ҳозирги Бухоро вилоятининг Бухоро, Вобкент, Когон, Ромитан, Жондор ва Қоракўл туманлари ерларидан иборат бўлган. Араблар Бухорони фатҳ этгандан кейинги дастлабки йилларда ҳокимиятни бухорхудотлар билан биргаликда бошқарганлар. 715 й. Хуросон ноиби Қутайба ўлдирилгач, Бухорхудотлар давлатни бир йил давомида мустақил идора қилганлар. VIII асрнинг 3-чорагида араблар бутун Мовароунаҳрни фатҳ этиб, бухорхудотларни расман ўз ўрниларида қолдирган бўлсалар-да,
ҳокимиятни амалда тўлалигича ўзлари бошқарганлар. 782 й. сўнги Бухорхудот Бунёд Муқанна қўзғолонини қўллаб-қувватлагани учун араблар томонидан қатл этилган ва Бухорхудотлар ҳукмронлиги тугатилган.
Бухорхудотлар давлати ҳудуди археологик жиҳатдан мукаммал ўрганилмаган. Тарихий манбаларда келтириган маълумотларга қараганда, мазкур давлат ҳудудида бир қанча мустаҳкам қалъали шаҳарлар бўлган, уларда маданият, ҳунармандчилик, савдо-сотиқ тараққий этган. Бу даврда ҳукмдор тасвири ва унинг остига «Бухоро ҳокими» деган ёзув зарб қилинган кумуш тангалар (дирҳамлар) чиқарилган. Бундай тангалар археологик қазишмалар вақтида кўплаб топилган.

Бидун Бухорхудот (...-680)
Малика Бидун (680-695)
Тағшода (695-727)
Сукон (727-734)
Қутайба (735-741)
Бунёд(741-782)

“Бухоро токи худо раҳмат қилгур амир Исмоил Сомоний давригача Тағшоданинг фарзандлари, хизматчилари ва набиралари қўлида бўлди”. (Наршахий)

@uzbtarixkanal