Собиқ энергетика вазири Алишер Султонов 19 май куни Тошкентда иш бошлайдиган учинчи Халқаро энергетика конференциясида президентнинг нефть-газ, кимё ва энергетика масалалари бўйича маслаҳатчиси сифатида иштирок этади. “Газета.uz” нашрининг хабар беришича, бу ҳақда конференция расмий дастуридан маълум бўлган.
2019 йилда энергетика вазири этиб тайинланган Алишер Султонов 2022 йил апрелида “саломатлиги туфайли бошқа ишга ўтгани муносабати билан” лавозимидан озод этилган эди. Шу кунгача унинг қайси лавозимга тайинлангани тўғрисида расман билдирилмаган.
Султонов ҳақида президент расмий сайтининг Администрация ижро аппарати тўғрисидаги бўлимида ҳам ҳеч қандай маълумот берилмаган.
Озодлик радиоси 2023 йил 9 февралда эълон қилган “Ўзбекларни газсиз қолдирган махфий келишувлар” суриштирувида Алишер Султонов номи ҳам тилга олинади. Суриштирувда ўзбек газига оид йирик контрактлар оффшордаги ширкатларга Алишер Султонов 2018 йил 9 август куни ўтказган ëпиқ мажлисда тасдиқлангани қайд этилган.
