2022-12-22 11:44:08
36 turdagi mahsulot narxi ustidan doimiy nazorat o‘rnatiladi
O‘zbekiston hukumatining 19 dekabr kungi qarori bilan, “Asosiy turdagi oziq-ovqat va zarur mahsulotlar narxlarining keskin tebranishi davrida asossiz oshirilmasligi bo‘yicha tizimli nazorat o‘rnatish va zarur choralar ko‘rish tartibi to‘g‘risida”gi nizom tadiqlandi.
Nizomga ko‘ra, narxlarning keskin tebranishi yoki bozorda ajiotaj talab yuzaga kelganda vakolatli organ (Monopoliyaga qarshi kurashish qo‘mitasi) tomonidan tahlil o‘tkaziladi. Bunday davr Vazirlar Mahkamasi tomonidan 6 oygacha muddatga belgilanadi.
Keskin tebranish deganda, narx 30 kun ichida MB asosiy stavkasi (hozir 15 foiz)ga teng yoki undan yuqori darajada oshgani tushuniladi. Ajiotaj talab deganda esa bozordagi shov-shuv va vahima ta’sirida sun’iy ravishda paydo bo‘lib, shiddat bilan ortib boradigan, bozor muvozanati buzilishi va tovarlar taqchilligi kuchayishi bilan kechadigan talab tushuniladi.
Bozorda mahsulotlar (tovarlar)ning sun’iy taqchilligini keltirib chiqargan alomatlar aniqlanganda, Aksilmonopol qo‘mita xo‘jalik yurituvchi sub’yektlarning binolariga bevosita kirib, ombordagi mavjud zaxiralarni xatlovdan o‘tkazadi (qo‘mitaga bu vakolat prezidentning 2022 yil 31 maydagi 145-son farmoni bilan berilgan).
Nizom qoidalari quyidagi ijtimoiy ahamiyatga ega asosiy oziq-ovqat mahsulotlariga nisbatan tatbiq etiladi:
1. Bug‘doy va un
2. Qolipli non
3. Mol go‘shti
4. Parranda go‘shti
5. Tuxum
6. Paxta yog‘i
7. Kungaboqar yog‘i
8. Guruch
9. Shakar
10. Sut (qadoqlangan)
Shuningdek, nizom talablari quyidagi yuqori likvidli va monopol turdagi mahsulotlar, xomashyo va materiallarga ham taalluqli:
1. Avtomobil benzini
2. Ekstraksion benzin
3. Dizel yoqilg‘isi
4. Texnik kerosin
5. Polipropilen
6. Polietilen
7. Texnik sera
8. Ko‘mir
9. Mineral o‘g‘itlar
10. Kalsiylashtirilgan soda
11. Katodli mis
12. Misli katanka
13. Ikkilamchi alyuminiy
14. Qora metallar prokati
15. Metal sink
16. Tsement
17. Tsementli klinker
18. Qurilish shishasi
19. Shakar (yuqoridagi ro‘yxatda ham bor)
20. Yem-xashak bug‘doyi
21. Arpa
22. Paxta-tolasi
23. Paxta linti
24. O‘simlik yog‘i (paxta, yuqoridagi ro‘yxatda ham bor)
25. Paxta chigiti sheluxasi
26. Paxta chigiti shroti
27. Texnik chigit
Nizomga asosan, Aksilmonopol qo‘mita asosiy turdagi tovarlar narxlarining o‘zgarish dinamikasini kuzatib borish maqsadida quyidagilarni muntazam monitoring qilib boradi:
bozorlar, savdo komplekslari, chakana savdo tarmoqlari va birjalardagi narxlar;
statistika va bojxona organlari ma’lumotlari (ma’lumot, byulleten va boshqalarni);
OAV hamda ijtimoiy tarmoqlardagi ma’lumotlar;
qonunchilik hujjatlarida taqiqlanmagan boshqa manbalar.
Kun.uz
@BostonliklarUz
401 views08:44