2021-02-22 07:01:07
CHIVINBOY
CH'ivinboy uchib bordi-da, yantoq ustiga qo'ndi. Yantoqning tikani uning tumshug'iga kirdi. Chivinning qahri
kelib, echki akasining oldiga bordi.
— Echki aka, echki aka, shu yantoqni yesangiz-chi, —
dedi.
Echki:
— Qoch, o'shanga meni ro'para qilma! Ko'm-ko'k barra
maysa turganda, endi sening gapingga kirib, yantoqni
yeymanmi? — dedi.
Chivin:
— Hap senimi, shoshmay tur, bo'ri akamga
borib, seni unga yedirmasam, xo'p yurgan ekanman, — dedi. Chivin bo'ri oldiga bordi:
— Bo'ri aka, bo'ri aka, ana shu echkini yesangizchi! — dedi.
Bo'ri:
— Ko'p meni laqillatma, qo'y go'shti turganda, shayton echkining go'shtini
yeymanmi? — dedi.
Chivin:
— Hap senimi, mergan akamga aytib seni o'ldirtirmasam, toza chivin
bo'lib yurgan ekanman, — dedi-da, to'g'ri uchib merganning oldiga bordi.
— Mergan aka, mergan aka, — dedi Chivinboy. — Shu bo'rini otib tashlasangiz-chi, echkini ye, desam, yemayman, — dedi.
Mergan:
— Mening bo'ridan boshqa otadigan ovim ko'p. Sening gapingga kirib,
bo'rini otib yuramanmi? — dedi. Chivinboy:
— Hap senimi, qarab tur, sichqon akamga aytib, sening dori soladigan
xaltangni teshdirmasam, yurgan ekanman, — deb sichqon oldiga uchib bordi.
— Sichqon aka, sichqon aka, ana shu merganning dori xaltasini teshing, u
ko'p jonivorlarga zarar yetkazadi, — dedi.
Sichqon:
— Bug'doy, arpa turib, menga endi merganning xaltasini teshish qoldimi?
Chivinboy:
— Hap senimi, shoshmay tur, mushuk akamga aytib, seni yedirmasam,
toza yurgan ekanman, — dedi-da, to'g'ri mushuk oldiga uchib bordi.
— Mushuk aka, mushuk aka, ana shu sichqonni yesangiz-chi, merganning
dori xaltasini tesh desam, yo'q deydi, — dedi.
Mushuk:
— E, qo'ysang-chi, mening yeydigan narsalarim ko'p, qo'yning go'shti
turganda, sichqon poylab yurarmidim.
Chivinboy:
— Hap senimi, shoshmay tur! Seni kuchuk akamga aytib, bir talatmasam
yurgan ekanman, — deb to'g'ri kuchukning oldiga uchib bordi:
— Kuchuk aka, kuchuk aka, ana shu mushukni bir o'xshatib talang! Sichqonni ye, desam yemaydi, — dedi.
Kuchuk:
— Sening gapingga kirib, bekordan-bekorga mushukni talaymanmi? — dedi.
Chivinboy:
— Hap senimi, shoshmay tur! Bolalarga aytib, bir urdirmasam, qonga
bulatib yasatmasam, yurgan ekanman, — deb uchib bordi. Chivin yo'lda bir
to'da bolalarga yo'liqdi.
— Hay, bolalar, shu kuchukni bir boplab uringlar, mushukni tala desam,
talamaydi, — dedi.
Bolalar:
— Bizning boshimizni ko'p aylantirma, o'zimizning o'yinimiz ko'p. Endi
o'yinni qo'yib, ovora bo'lib, kuchukni quvlab yuramizmi? — deb javob
berishdi.
Chivinboy:
— Hap senlarnimi, shoshmay turinglar, onalaringga aytib, bir o'xshatib
savalatmasam, yurgan ekanman! — dedi.Chivin charx yigirib o'tirgan momoning oldiga borib:
— Hoy, onajon, shu bolalaringizning bir adabini berib qo'ying, kuchukni
uringlar, desam, urishmaydi, — dedi.
Momo:
— Mening ishim boshimdan oshib yotibdi, hali paxtalarim savaqsiz, endi
men hamma ishimni tashlab, biror sababsiz bolalarni quvib, urib yuraymi? —
dedi.
Chivinboy:
—Hap senimi, shoshmay tur! Men borib shamol akamga aytib, sening
paxtalaringni uchirib yubormasam, yurgan ekanman, — dedi.
Chivin shamolga qarab shunday debdi:
Shamol, bag'ri kamol,
Bolalarga qo'yningni och.
Ota-onang o'libdi,
Cho'loq ketmoningni olib qoch!
Shu payt bir qattiq shamol turibdi. Shamol momoning paxtasini uchiribdi.
Momo qo'liga kaltak olib, bolalarni quvlabdi, bolalar kuchukni ura ketishibdi, kuchuk mushukni talay ketibdi, mushuk sichqonni quva ketibdi, sichqon
xaltani tesha ketibdi, mergan bo'rini otibdi, bo'ri echkini quvlabdi, echki
yantoqni yeb qo'yibdi.
Shunda Chivinboyning vaqti xush bo'lib, murod-maqsadiga yetibdi.
3.1K views04:01
B
