САМАРҚАНДДА ТАДБИРКОРЛАР СОНИ БИР ЙИЛДА 10 МИНГ 500 ТАГА КАМАЙ | 🇺🇿Банкир кундалиги
САМАРҚАНДДА ТАДБИРКОРЛАР СОНИ БИР ЙИЛДА 10 МИНГ 500 ТАГА КАМАЙИБ КЕТГАН.
Сенатнинг Бюджет ва иқтисодий ислоҳотлар масалалари қўмитаси бошчилигидаги ишчи гуруҳ Самарқанд вилояти маҳаллаларида тадбиркорликни ривожлантириш ва янги иш ўринларини яратиш бўйича ишлар ҳолатини ўрганди.
Ўрганиш жараёнларида амалга оширилган ижобий ишлар билан бирга қатор камчилик ва муаммолар ҳам мавжудлиги аниқланди:
Вилоятда 2024 йилнинг 1 январ ҳолатига фаолият кўрсатаётган тадбиркорлик субъектларининг сони 2023 йилга нисбатан 10,5 мингтага камайган. 3 497 та тадбиркорлик субъекти иқтисодий қийинчиликлар сабабли ўз фаолиятини тўхтатган.
Эслатма: Ўзбекистон Республикаси Президентининг 03.12.2021 йилдаги ПФ-29-сонли Фармонига кўра, Ҳоким ёрдамчиларининг асосий вазифалари ва фаолият йўналишлари этиб белгилансин:
- маҳаллада тадбиркорликни ривожлантиришнинг ички имкониятлари, тадбиркорлик бўйича ихтисослашув ва меҳнат ресурсларини инобатга олган ҳолда, уни ривожлантиришга туртки берадиган омиллар ва йўналишларни белгилаш, уларни ишга солиш орқали маҳалланинг иқтисодий ривожланишини таъминлаш;
- тадбиркорлик фаолиятини амалга оширишга тўсиқ бўлаётган муаммоларнинг тегишли ташкилотлар томонидан ҳал этилишини ташкил этиш - белгиланган).
Ҳоким ёрдамчилари томонидан оилавий тадбиркорлик учун кредит ажратиш сўралган мурожаатларни кўриб чиқишда белгиланган муддатлар бузилган.
Вилоятда тадбиркорликни ташкил этиш ва янги иш ўринларини яратиш бўйича мавжуд имкониятлардан тўлиқ фойдаланилмаган.
Назорат қилувчи органлар томонидан тадбиркорлик фаолиятига асоссиз аралашув ва эркин рақобат муҳитини бузиш ҳолатларига йўл қўйилган.
Вилоятда тадбиркорлар мурожаатларини ўз вақтида кўриб чиқишда ҳам камчиликлар мавжуд.
P.S.: Самарқанд вилоятида айни кунда 1126 та МФЙда ҳоким ёрдамчилари фаолият юритаётган бўлса, уларнинг асосий вазифалари тадбиркорликни ривожлантириш бўладиган бўлса, бир йилда 10,5 мингтага камайиб кетиши ҳеч қайси қолипга сиғмаяптику!
Эслатиб ўтамиз, 2024 йил март ойида Сирдарё вилоятида ҳам шу борадаги кўрсаткичларда бир қатор камчиликлар қайд этилган эди. Маҳаллабай ишлаш агентлиги бу борада нима дейиши бизни ҳамон қизиқтирмоқда.
Ҳоким ёрдамчиларига нима иш қилдинг деб сўрашса, бир гала жадвалларни кўрсатиб, бир қанча кўрсаткичларни олдингизга қалаштириб ташлайди. Аслида-чи! Мана ҳақиқий рақамлар! Ҳақиқат ҳайрон!
@bankirkundaligi
