Hamma boshqacha “-Buni qara shirinligini” deb 3 oylik bolasin | Aziz Rahimov

Hamma boshqacha

“-Buni qara shirinligini” deb 3 oylik bolasini rasmini ko’rsatadi. Boladaka bola deb o’ylaysiz. Odob jihatidan “vuuy” deb qo’yasiz.

Yaqini vafot etgan odamga: “hamdardman” deysiz. Dardini his qila olmasligingizni bilib aytasiz.

Shu kitob/kino hayotimni o’zgartirdi deydi, sizga ta’sir ham qilmaydi.

Odamlar dunyoda yashashidan tashqari, o’z mental dunyosida ham yashaydi.

Mental dunyo - genetika, xotiralar, bolalikdagi og’riqlar, o’ylar kombinatsiyasi. Har bir odam uchun unikal. Bir dona. Mental dunyosidan kelib chiqib bir ish kimgadir yomon, kim uchundir yaxshi.

Menga mos ish degani sizga mos degani emas. Hammaga yoqadi degani, sizga yoqadi degani emas. Menga qadrli inson, sizga hech kim.

Mental dunyoyingizga qarshi chiqsangiz siqilishni boshlaysiz. Yolg’on o’rab olgandek bo’ladi.

"Nega boshqachaman?, meni tushunishmaydi" demang. Hamma boshqacha. Ko’rsatishga uyalib, bir xil tutishadi xolos.

@azizrakhimov_blog