Ateist Uz

2021-02-13 08:13:58 ​​"Biz nega evolutsiyani ko'rmayapmiz?"
(2-qism)

Keling xuddi mana shu jarayonni bir analogiya bilan tushuntirib berishga harakat qilay.

E'tiboringizni quyidagi 1-rasmga qaratsangiz. Bu yerda ranglar spektri keltirilgan. Ranglar qizildan to siyohranggacha o'zgarganini yaqqol ko'rish mumkin. Sababi biz butun boshli holatga (jarayonga) umumiy nigoh bilan qarab turibmiz. Bu rasmda chetki ranglar aniq farqlanishini ko'rsak ham, lekin ranglar qanday va qaysi chegarada o'zgarayotganini ko'ra olmaymiz.

Keling endi rasmning qizil va sabzirang qismini kattalashtirib ko'ramiz. E'tiboringizni 2-rasmga qaratsangiz. Biz ushbu rasmda qizil rang sabzirangga o'zgarganligini ko'rishimiz mumkin. Lekin bunda ham yaqqol o'zgarish chegarasini sezmaymiz. Rasmga e'tibor bilan qarang, chap tomondagi qizildan bir millimetr o'ngga qarab siljing, rang farqlanishni boshlaydi, lekin buni siz amalda sezmaydi. To o'ng burchakka kelguningizgacha yaqqol farqlanuvchi chegarani sezmaysiz, lekin tasvirga umumiy nigoh bilan qarasangiz chapdagi qizil rang o'ngda sabzirangga aylanganiga guvoh bo'lasiz.

Keling endi mana shu 2-rasmning o'rta qismidan kattalashtirib ko'ramiz. E'tiboringizni 3-rasmga qaratsangiz. Xo'sh, siz biror chegara yoki farqni ko'ryapsizmi? Yo'q albatta, sizga barchasi sabzirang bo'lib ko'rinmoqda. Shundaymi?

Ha, evolutsiya, jumladan makroevolutsiya ham xuddi mana shunday kechadi. Siz uni o'zingizning atrofingizda, siz yashayotgan vaqtda sezmaysiz, ko'ra olmaysiz, amalda bu imkonsiz narsa. Lekin siz butun boshli jarayonga teparoqdan, uzoqroqdan umumiy nigoh bilan qarasangiz jarayon qanday kechayotganligini yaqqol ko'rasiz, sezasiz. Ana shunda siz butun boshli evolutsiya degan jarayonda ishtirok etayotganingizni his qilasiz.

Mavzuga hozircha mana shu yerda tanaffus beraman. Siz yuqoridagi yozganlarimni o'qib, hazm qilishga harakat qilib ko'ring. Tez orada sizga yana bir ajoyib, siz har kuni ko'radigan analogiya bilan qaytish qilaman. Ko'rishguncha)))

@hujayrauz Ochish/sharhlash

2021-02-13 08:13:57 "Biz nega evolutsiyani ko'rmayapmiz?"
(1-qism)

Darvinning tug'ilgan kuni haqida post qo'yganimdan keyin uni ostida izohlar yomg'iri boshlandi. Shunday bo'lishi tabiiy edi, chunki aksariyatimiz, hatto aksariyat biologlarning o'zi ham Darvin haqida umumiy omma gapiradigan gapdan boshqa narsani bilmaydi. Uning biror asarini boshdan oyoq o'qimasdan, uning geologiya, biologiya, botanika va boshqa sohalardagi fikrlari bilan yaqindan tanishgan bo'lmasdan turib bemalol Darvinni muhokama qilaveradilar. Tarki odat amri mahol)))

Xullas mana shu savollar ichida menga bir savol berildi: "Agar evolutsiya chindan ham mavjud bo'lsa, nega biz uni ko'rmayapmiz?" Chindan ham haqli savol! Biz nega evolutsiyani ko'rmayapmiz, agar turlar o'zgaradigan bo'lsa, nega biz ular orasidagi oraliq turlarni ko'rmayapmiz? Mantiqan olib qaraganda nihoyatda to'g'ri savol. Men ushbu savolga alohida post tarzida javob berishimni aytdim.

Avvalo shuni aytishim kerakki, evolutsiya ikkita katta qismga bo'linadi: mikroevolutsiya va makraevolutsiya.

Mikroevolutsiya - bu tur ichidagi tadrijiy rivojlanishdir. Bunda o'zgarishlar bir tur doirasida kechadi. Jarayon bir necha yuz yildan ming, hatto million yillar davomida sodir bo'ladi. Mikroevolutsiya jarayonini yuksak tuzilgan organizmlar, jumladan umurtqali hayvonlar, murakkab tuzilgan umurtqasizlar, masalan, hasharotlar, o'rgimchaklar; yuksak o'simlik (yuksak o'simlik degani - ildizi, poyasi va bargi bor har qanday o'simlik) turlarida bevosita kuzatishning imkoni mavjud emas. Chunki jarayon juda ham sekin va uzoq davom etadi. Jarayonni payqash uchun odamning umri yetmaydi. Lekin mikroevolutsiyani sodda tuzilgan bir hujayrali organizmlarda yoki viruslarda bevosita kuzatish imkoni mavjud. Chunki ushbu organizmlarda genom miqdori juda ham oz va ular oqsil bilan birikmaganligi bois shiddatli tarzda tez mutatsiyaga uchray oladi. Oddiy misol bilan tushuntirsam, o'tgan yili sizni uyingizga qamab qo'ygan SARS-CoV-2 virusining yangi Britancha shtammi ana shu mikroevolutsiyaga yorqin misol bo'la oladi.

Makroevolutsiya esa turdan yuqori bo'lgan taksonomik birliklar ichidagi tadrijiy rivojlanishdir. Bunday rivojlanishlar million yillar bilan o'lchanadi va buning aqalli biror nuqtasini odamzot bevosita bo'lsa ham kuzata olmaydi. Chunki jarayon juda juda sekin, juda juda uzoq va juda juda katta masshtabda kechadi. Makroevolutsiyani faqatgina ilmiy metodlar asosida "ko'rish" mumkin. Men maktabda o'qiyotganimda 6-sinfda geografiya o'qituvchim Avstraliya qit'asini o'tganimizda, ushbu qit'a tirnoq o'sish tezligida shimolga tomon harakatlanayotganligini aytgani hamon yodimda turibdi. O'shanda domlamiz "bu hozir men bilan sizga sezilmaydi. Lekin ushbu qit'aning harakatini modellashtirib, deylik mln yildan keyin u qayerda bo'lishini bevositada ilmiy bashorat qilish mumkin" degan edi.

Keling odam evolutsiya haqida qisqacha to'xtalamiz. Hozirgi kunda biologiyadagi mavjud dalillarga quloq tutadigan bo'lsak, hozirgi zamonaviy uquvli odam (𝐻𝑜𝑚𝑜) urug'ining kelib chiqishi 4.2-1.8 mln yillar avval hozirgi Afrika hududida yashagan avstrolopiteklar (𝐴𝑢𝑠𝑡𝑟𝑎𝑙𝑜𝑝𝑖𝑡ℎ𝑒𝑐𝑢𝑠) ga borib taqaladi. Fan qo'lida mavjud bo'lgan dalillarni taqdim etadigan bo'lsa 4,2 mln yil avval yashagan avstrolopitek bilan hozirgi odamning bir-biridan keskin farq qilishini ko'rishimiz mumkin. Chunki bu ikki urug' bir evolutsiya jarayonining ikki chekkasi bo'lib, ularni umumiy holatda ko'rganda jarayon qanday kechganligini ko'rish mumkin bo'ladi.

@hujayrauz Ochish/sharhlash

2021-02-12 06:40:15 Ochish/sharhlash

2021-02-04 11:44:30 Ochish/sharhlash

2021-02-03 14:03:55 Rus tilida Ochish/sharhlash

2021-02-03 14:03:49 Ingliz tilida Ochish/sharhlash

2021-02-03 14:03:31 Ochish/sharhlash

2021-02-03 12:59:56 Kanalga anchadan beri kitob yuklamagan edik. Sizlarga "Ilm-Fan, Evolyutsiya va Kreatsionizm" nomli kitobni taqdim etaman. Ushbu kitob ustida Amerika Fanlar Akademiyasi hamda Amerika Tibbiyot Instituti olimlari birgalikda ishlashgan. Kitobda tirik organizmlarning kelib chiqishini qandaydir ilohiy kuchlar bilan bog'lashga urinadigan, kreatsionizm deb nomlanmish diniy ta'limot haqida ham biroz so'z boradi, ammo bosh maqsad sifatida, o'z oldiga, keng ommaga sodda til bilan evolyutsiyani tushuntirishni hamda uning dalillari bilan tanishtirishni qo'yadi. Hajmi ham katta emas. Ochish/sharhlash

2021-02-03 10:50:16 ​Файласуф Эрик Ҳоффернинг
"The True Believer: Thoughts On The Nature Of Mass Movements" китобидан икки шингил.

Китоб оммавий оқимларнинг вужудга келиш сабаблари, мақсадлари ҳамда ўз мафкурасига бўлган ишонч ҳақида. Кўр-кўрона фанатизм илдизи ва оқибатлари, ирқчилик, миллатчилик, радикал сиёсий ва диний ҳаракатлар китоб таҳлилининг предметлари. Ижтимоий фалсафа.




"Муқаддас мақсад" га бўлган ишонч қисман ўзимизга бўлган йўқолган ишонч ўрнини босади."

* * *
"Инсон ўзининг устунлиги ҳақида гапиришга асослари қанча кам бўлса, шунчалик устунлик унинг мамлакати, дини, ирқи ёки "муқаддас мақсади"да эканлигига даъво қилишга тайёр бўлади."

* * *
"Инсон ўз ишида маъно бўлганида, у билан кўпроқ шуғулланади; акс ҳолда, у ўзининг маъносиз бўлган ишларини ташлаб, бегоналар ишига аралашишни бошлайди.

Бошқаларнинг ишларига аралашиш ғийбатларда, керак бўлмаган жойда бурнини тиқишида, шунингдек жамоат, миллий ёки ирқий ишларга қизғин қизиқиш билан ифодаланади. Ўзимиздан қочиб, биз ё қўшнимизнинг бўйнига ўзимизни ташлаймиз, ёки унинг бўғзидан оламиз."

* * *
"Бошқалар олдида "муқаддас" бурчимиз борлигига қаттиқ ишониш кўпинча чўкиб кетаётган "мен"имизни қутқаришнинг бир усули ҳисобланади: биз олдимиздан сузиб кетаётган қайиқга илинишга ҳаракат қиламиз. Бошқага ёрдам бериш учун чўзилган қўл деб атайдиган нарсамиз - амалда, аксар ҳолларда бор-йўғи ўзимизнинг қимматбаҳо ҳаётимизни сақлаб қолишлик учун ушлашга уринаётган қўлдир. Ушбу "муқаддас вазифаларни" биздан тортиб оладиган бўлсангиз, бизнинг ҳаётимиз аҳамиятсиз ва маъносиз бўлиб қолади. Шубҳасиз, эгоцентрик ҳаётни фидойи ҳаётга алмаштириш орқали биз шараф ва ҳурмат нуқтаи назаридан ғалаба қозонамиз. Фидойиларнинг, ҳатто чинакам камтаринликни намойиш қилаётганларининг ҳам, шухратпарастликлари чексиздир."

@ateist_uzb Ochish/sharhlash

2021-02-03 06:52:22 Dunyoni boshqaruvchi yovuz kuchlar qayerda?

Telegram kanalimda bir kuzatuvchim bor. Amerika haqida nimadir yozsam, hujumga o'tadi. Unga ko'ra, AQShda siyosatchilarning hammasi qo'g'irchoq. Ularni qandaydir ko'rinmas kuch boshqaradi. Barak Obamani hokimiyatga olib kelgan ham "Illuminati" ekan.

"Facebook"da undan battari bor. Uning yozishicha, Ilon Maskning orqasida ham, "Twitter"ning boshida ham rotshildlar, qanaqadir qabbala turadi. G'arbda yashab ko'zimiz ko'r bo'lgani uchun shuni ham bilmas ekanmiz.

Masonlarni "sevadigan" xalqimiz

Umrida na gazga, na elektrga yolchigan vatandoshim olis bir qishloqda, loysuvoq va guvalakdan bitgan kulbasida oyog'ini tanchaga tiqib, moy lampa yorug'ida yonida o'tirgan og'aynilariga siyosatshunoslik fanidan ma'ruza o'qiydi: hamma muammoga masonlar va yahudiylar aybdor. Baraka topsin, yaxshiyam Putin bor ekan; hammasini nazorat qilib turibdi.

"Shapka"sini berib, buning ustiga yana bir yil kutib olgan "Spark" mashinasida 10 yildan beri kirakashlik qiladigan amakiga quloq tutsangiz, iqtisodiyot va siyosatni "suv qilib" ichib yuborgan. Dunyoni kimlar boshqarayotganini, har bir voqea-hodisa ortida aslida yahudiylar turganini; agar Rossiya bo'lmasa, Amerika bir kunda dunyoning rasvosini chiqarib yuborishini undan o'rganasiz.

Bunday ekspertlar faqat "qora xalq" orasida emas. Xorijda o'qigan, bir paytlar ilmi va g'ayratini o'zim uchun o'rnak deb bilgan bir akamiz yaqinda aytib qoldi: koronavirus yo'q narsa ekan. Lol qoldim. Qizig'i, u bilan hamfikrlar oz emas.

Qahraton qishdan tirik chiqish uchun choponi bilan uxlaydigan, sifatli tibbiy xizmatga qurbi yetmaydigan millionlab odamlar virusdan o'lib ketmasin, deb milliardlab dollar pulini sarflayotgan Bill Geyts ular uchun dunyodagi eng yozuv odam. Chunki uning maqsadi vaksina orqali chip o'rnatib, odamlarni boshqarish.

Fitna nazariyalari faqat bizdami?

Amerikada ham fitna nazariyasi ixlosmandlari bor. Masalan, ultra o'ng siyosiy qarashdagi "Qanon" guruhi izdoshlariga ishonilsa, Amerikani shaytonga sig'inuvchi elita boshqaradi; Demokratik partiya ularning xizmatkori. Hillari Klintonning yerto'lasida qullikda saqlanadigan bolalar bor; chunki hukmron elita pedofiliya bilan shug'ullanadi.

Mana, bor ekan-ku! Moydek yoqib ketdimi?

Ezgulik va yovuzlik urushi

Xudo hidoyat berib, ibodatga kirgan ba'zi yosh yigitchalar hali namozning farzini o'rganib ulgurmasdan "Illuminati"ga qarshi urush e'lon qiladi. Iblisga sajda qiluvchi elitani fosh etib, ummatni undan ogohlantirishni ozining muqaddas vazifalaridan biriga aylantiradi.

Birodari aziz, o'zingizni bosing. G'ayratingiz juda jo'shib ketayotgan bo'lsa, kitob o'qing. Nafaqat dinni, balki siyosat, iqtisodiyot, huquqshunoslik va chet tillarini ham o'rganing. Ilmni "YouTube" yoki "Facebook"dan emas, kitoblardan, mutaxassislardan oling.

Qurbingiz yetsa, boshqa davlatlarga sayohat qiling. Boshqa madaniyat va dindagi odamlar bilan ko'proq muloqot qiling. Dunyoni, unda yashayotgan rang-barang odamlarni qanchalik ko'p tanisangiz, dunyo bizning mahallamiz va shahrimizdan ko'ra ancha kengroq va murakkabroq ekanini anglaysiz.

Unday qila olmasangiz, namozingizni o'qib, halol-haromga diqqatli bo'lib, taksida kirakashligingizni qilib yuravering.

Xulosa

Konspiratsiya nazariyalari hamma joyda bor, hamma davrda bo'lgan va bundan keyin ham bo'ladi. Dunyoda hukmronlik o'rnatishni istovchi yovuz kuchlar mavjudligi ehtimoli ham yo'q emas.

Ammo bunday kuchlarni Amerikadan emas, ilmsizlik va mutaassiblik urchigan, erkinlik bo'g'ilgan jamiyatlardan qidiring. Chunki fikrlash erkinligi, fikrni erkin ifoda etish huquqi berilgan jamiyatda hech qachon yolg'on asosiga qurilgan tizimni, ya'ni yagona yovuz elita hukmronligini o'rnatib bo'lmaydi.

Erkin jamiyatda, erkin bahs-munozaralarda haq har doim botildan ustun keladi. Erkinlik mavjud bo'lmagan jamiyatlarda esa botilni haqiqat deb ko'rsatuvchi rejimlar hukmron bo'ladi.

"Illuminati" deganlari balki shudir?

@bmamadiev Ochish/sharhlash