2022-01-10 18:00:48
#book_review #китобхон_фикри
Биз уларни китоблар ва ботаникадан бир умрга халос қиламиз!
Хакслининг «Ажиб янги дунё» асарида назарда тутилган бир нарса этимни жунжиктириб юборган. Бу нафақат ҳақиқат, энг ёмони бу ҳақиқатни ҳозир, мана шу замонда кўряпман, ҳис қиляпман.
Асарда одамлар сунъий яратилиб, бир нечта даражага кўра шакллантирилади. Юқори, ўрта, паст, ундан ҳам паст: бета, альфа, гамма, дельта ва эпсилон одамлар яратилади. Уларнинг онги раҳбарларнинг хоҳиши ва режасига қараб шакллантирилади. Юқори даражадаги одамлар онгига уларни қанчалик олий насаблиги синдирилса, энг паст даражадаги эпсилонларга қуллик стереотипи сингдирилади. Келажакда фақат қора меҳнат қилиб қул вазифасини бажарадиган паст кастага мансуб болаларнинг онгида китоб ва гулга нафрат уйғотилади. «Улар гул ва китобга нисбатан руҳшунослар қачондир «инстинктив» дея атаган нафрат билан улғаяди. Биз уларни китоблар ва ва ботаникадан бир умрга халос қиламиз», — дейди раҳбар. Шунда ёш талабалардан бири савол беради: “ қуйи кастадагилар китоб ўқиб , жамият вақтини исроф қилишларига йўл қўймаслик керак, лекин кейинчалик китоб ўқиб унинг таъсирида ҳозир шакллантирилган рефлексларнинг йўқолиб кетиш хавфи бор. Аммо паст кастадагиларга гулларни севишни руҳий жиҳатдан имконсиз қилишга вақт ва куч сарфлашнинг нима кераги бор?» Шунда раҳбар «гуллар ва табиатдаги эътиборга молик қусур шунда-ки, улардаги гўзаллик ва ифор бепул. Табиатга нисбатан севги фабрикаларни тўлдирмайди. Шунинг учун нима қилиб бўлса ҳам паст кастадагилар учун табиатга бўлган муҳаббатни бекор қилишга қарор қилинди», — дейди.
...яқин-яқинларда шунчаки сайр қиладиган, бепул дам оладиган, яшиллик ва гўзалликдан баҳра оладиган боғлар кесилиб, кўллар қуритилиб ўрнига пул келтирадиган дўконлару «city»лар қурилаётганини тасаввур қилдим. Сизнинг гўзалликдан баҳра олишингиз кимларгадир пул келтирмайди, одамлар эса бизнес учун ялтиратиб қўйилган «Magic City» ва бошқа «city»ларга бостириб боради. Бир вақтлар оромбахш ва ям-яшил, сокин боғлар ўрнини манфаат, пул, фойда эгаллаб бормоқда. Халқ эса дельта ва эпсилонлар — паст кастадаги (асардаги ҳолатга ўхшатма) лар сингари режа бўйича ҳаракат қилади. 20 йилда 90 фоизга камайиб кетган кутубхоналар ҳақида ҳам шу гап. Сизнинг китоб ўқишингиз ва табиатдан баҳра олишингиз бепул, сиз фойда келтиришингиз керак... Ўзингизни эпсилонлардек ҳис қилмаган бўлсангиз, эпсилонсиз.
semechkagulingiz
5.0K views15:00