#ибрат Эй китобга мукка тушиб ўқиётган укагинам! Сенинг бунча | Ansor | blog

#ибрат

Эй китобга мукка тушиб ўқиётган укагинам! Сенинг бунчалик кўп китоб ўқишингдан ота-онанг хавфсираши мумкин, ҳатто, "Ўқигандан фойда йўқ, одамларни кўнглини олишни ўрган!" деб бемаза маслаҳат бериши ҳам мумкин. Лекин, сен бу фалсафадан йироқ бўл.

Тўғри, бугунги жамиятимиз ўқимишлиларники эмас, югурдакларники бўлиб қолди. Лекин, шуни унутмагинки, келажак юқори заковат эгалариники бўлади. Югурдаклар даври тугаяпти. Қайси жамият югурдаклик асосига қурилган бўлса, алалоқибат, ақллиларга хизматкор бўлади.

Сен муҳитни ўзгартир. "Бир ўзим нима ҳам қилардим!" дема. Чунки, ҳар ким ўзини ислоҳ қилса, албатта, ўзгариш бўлади. Ўзгаришни ўзингдан бошла. Раҳбарларга ёқиш эмас, янги-янги ғоялар пайида бўл!

Биз хунрез совет мафкурасига қорилган бир авлодни бой бериб қўйдик. Сен эса бу каби қолипланган мафкуралардан холи бўлиб ўсяпсан. Кўз ўнгингда янги давр, янги эра шаклланмоқда. Ота-бобларимиз эртакларда айтган мўжизалар бугунги кунда ихтиро қилинмоқда. Олдингда иккита йўл турибди: ё югурдаклик қилиб, осонликча юқори мартабага эришасан ва бутун умр қайсидир турқи совуқ амалдорга қуллуқ қилиб яшайсан, халқингни эса қулликка етаклайсан, ё мансабию лавозимига тупуриб, тинмай ўқийсан, изланасан ҳамда ўз жамиятингни юксакликка олиб чиқасан, натижада, амалдорлар сенга қуллуқ қилиб келади.

Танловинг ўз қўлингда!!!

Девонайи Ҳақгўй

@Ansor_blog