ҚУЛУПНАЙНИНГ РЕМОНТАНТ НАВЛАРИ ВА УЛАРНИНГ АФЗАЛЛИКЛАРИ Ремон | AGROBLOGER
ҚУЛУПНАЙНИНГ РЕМОНТАНТ НАВЛАРИ ВА УЛАРНИНГ АФЗАЛЛИКЛАРИ
Ремонтант қулупнайнинг оддий қулупнайдан фарқли томони шундаки, гул чиқарувчи шохларининг баҳордан то кеч кузги совуқ тушгунгача узлуксиз равишда пайдо бўлиб туришидир. Ремонтант қулупнай кўкламги изғиринлардан кам зарарланади, кузда эрталаб бўладиган совуқ гул ва мева тугишни тўхтатиб қўя олмайди.
Шикастланганлари ўрнига икки-уч ҳафта ўтгач янги шона ва гуллар пайдо бўлади, ер тути май-июнь бошларида мева тугишдан тўхтайди, ремонтант нав эса (суғориш, озиқлантириш ва юмшатиш ўз вақтида ўтказилса) август, сентябрь, октябрь, баъзан ноябрь бошларида ҳам мева беришда давом этади.
Томорқада ремонтант қулупнай етиштириб, резавор мева истеъмол қилиш муддатини анча узайтириш мумкин. Оддий қулупнайнинг мева бериш даври 25-30 кун бўлса, ремонтантники 150-190 кунни ташкил қилади. Шундай қилиб, бу турнинг афзаллиги ҳўл қулупнай мевасини истеъмол қилиш муддатининг узоқ давомийлигидир.
Ремонтант қулупнай худди оддий қулупнайга ўхшаб, кўп йиллик ўтсимон ўсимликдир. Унинг барглари 60-70 кунгача тўкилмайди, бутун ўсиш даври давомида янгиланиб туради. Қишга бу экин яшил барглари билан киради. Қор қоплами яхши бўлганда ўсимлик кўкламга ям-яшил барглари билан чиқади. Сўнгра барглари қурий бошлаб, ўрнида янгилари пайдо бўлади.
Гулкуртаклари ёз ойлари совуқ тушгунча ривожланади, улар 16-20 кунда ўсиб чиқаверади. Бутун ёз бўйи ва кузда ўсимликда ҳам гул, ҳам мева бўлади. Мева тугиш даврининг давомийлиги ва юқори ҳосил (ҳар тупидан 1100 граммгача) бериш қобилияти асосан агротехника тадбирлари тўғри қўлланилганда намоён бўлади.
Бунинг учун кўчатни экишдан олдин 100 кв.м майдонга 600-1000 кг ёки 1 кв.м ерга 6-10 кг ҳисобидан гўнг солиб, экиб бўлингач туплар чиринди билан мульчаланади, меваси етила бошлагач, айниқса, тез-тез қондириб суғорилади. Ремонтант қулупнайнинг кейинги парвариши худди оддий қулупнайникига ўхшаш. Кейинги йилларда республикамизда қулупнайнинг ремонтант навлари иссиқхоналарда ўстирилиб йил давомида ҳосил олинмоқда.
