𝗔𝗱𝗮𝗯𝗶𝘆𝗼𝘁 𝗢𝗹𝗮𝗺𝗶

2022-09-01 12:41:21 УЛУҒИМСАН ВАТАНИМ!        

Мен дунёни нима қилдим,
Ўзинг ёруғ жаҳоним,
Ўзим хоқон,
Ўзим султон,
Сен тахти Сулаймоним,
Ёлғизим,
Ягонам дейми,
Топинган кошонам дейми,
Ўзинг менинг улуғлардан
Улуғимсан, Ватаним…

Шодон куним гул отган сен,
Чечак отган изимга,
Нолон куним юпатган сен,
Юзинг босиб юзимга.
Синглим дейми,
Онам дейми,
Ҳамдарду ҳамхонам дейми,
Офтобдан ҳам ўзинг меҳри —
Илиғимсан, Ватаним.

Сен Машрабсан,
Халқда тумор,
Балхда дорга осилган,
Навоийсан, шоҳ ёнида
Фақирни дуо қилган.
Яссавийсан, меники деб,
Кўринган даъво қилган,
Минг бир ёғи очилмаган
Қўриғимсан, Ватаним.

Сен Хўжандсан,
Чингизларга
Дарбозасин очмаган,
Темур Малик орқасидан
Сирдарёга сакраган,
Муқаннасан қорачиғи
Оловларга сачраган,
Широқларни кўрган чўпон
Чўлиғимсан, Ватаним.

Ким Қашқарни қилди макон,
Ким Энасой томонда,
Жалолиддин — Курдистонда,
Бобуринг — Ҳиндистонда,
Бу қандай юз қаролиғ деб,
Ётарлар зимистонда,
Тарқаб кетган тўқсон олти
Уруғимсан, Ватаним…

Ўғлим, десанг осмонларга
Ғирот бўлиб учгайман,
Чамбил юртда Алпомишга
Навкар бўлиб тушгайман,
Падаркушдан пана қилиб
Улуғбегинг қучгайман,
Ғичир-ғичир тишимдаги
Сўлиғимсан, Ватаним…

Ўтган кунинг — ўтган кундир,
Ўз бошингга етган кун,
Қодирийни берган замин,
Қодирийни сотган кун.
Қўлин боғлаб,
Дилин доғлаб,
Етаклашиб кетган кун,
"Воҳ болам" деб айтолмаган
Дудуғимсан, Ватаним.

Ёнингда қон йиғлаган бир
Шоирингга қараб қўй,
Гар Қўқонга йўлинг тушса,
Детдомларни сўраб қўй.
Ҳеч бўлмаса Усмон хокин
Келтирмоққа яраб қўй,
Олисларда қуриб қолган
Қудуғимсан, Ватаним…

Сен — шохлари осмонларга
Тегиб турган чинорим,
Ота десам,
Ўғлим деб, бош
Эгиб турган чинорим,
Қўйнимдаги ифтихорим,
Бўйнимдаги туморим,
Ўзинг менинг улуғлардан
Улуғимсан, Ватаним!

Муҳаммад Юсуф
t.me/Adabiyot_olami
t.me/Adabiyot_olami Ochish/sharhlash

2022-09-01 07:26:26 “…Эркимни бермайман, то тирикдурман,
Шу Ватан бор экан, мен йирикдурман...”

А.Сувонов

Байрамларнинг энг улуғи мустақиллик байрами муборак бўлсин азизларим!

t.me/Adabiyot_olami
t.me/Abduvohid_Suvonov Ochish/sharhlash

2022-08-27 11:50:02 Marhabo Karimovadan navbatdagi hajviyaviy she'r "Men o'zimni sevaman"
t.me/Adabiyot_olami
t.me/Abduvohid_Suvonov Ochish/sharhlash

2022-08-27 11:49:45 МАСЛАҲАТ

Мен ўзимни севаман,
Менга ўзим ёқади,
Энди менга барибир,
Ким қанақа боқади.

Нуқсонлими, қорами
Юзим — менинг юзимдир.
Дунёда энг чиройли
Битта одам — ўзимдир!

Қўлим калта ва лекин
Йўқдан кўра, шукур, бор.
Бу дунёда ҳеч одам
Эмас мендек бахтиёр.

Гап эшитсам жилмайиб,
Калтак есам куламан.
Чап юзимга уришса,
Ўнгин тутиб бераман.

Юрак деган қабрга
Армонимни кўмганман.
Ва устида боламга
Ўйин тушиб берганман.

Ҳар тонг қараб ойнага
Дейман: менинг ғамим йўқ.
Мен соғломман! Мен зўрман!
Ташвишим йўқ, камим йўқ.

Нохушликлар — ёв, лекин
Мен улардан қарз эмас.
Ҳеч қайсиси жонимни
Тикишимга арзимас.

Хомуш бўлар баъзилар
Сочин оқин санашиб.
Менга эса турибди,
Ажинлар ҳам ярашиб.

Тикан — тикан, гул — гулдир,
Ҳар нарса ўз ҳолича.
Азизларим, дунёни
Қабул қилинг борича.

Осон яшай десангиз,
Маслаҳатим олволинг.
Ўзингизни озгина
Жинниликка солволинг.

Не кун кўрсам барига
Оллоҳ рози — мен рози.
Яратганнинг қўлида
Энг тўғри тош-тарози.

Яшашга эмас, бизни
Имтиҳонга ташлабдур.
Пирим — ўша ковушсиз
Девонайи Машрабдур.

Кўйлагимни сўрашса,
Тўнимни ҳам берайин.
Тиканларнинг ичидан
Лолаларни терайин.

Қизим қайтиб кептими?
Ажаб бўпти, хўп бўпти!
Бугун яна бойибман,
Битта ташвиш кўп бўпти.

Нархи қанча, опкелинг,
Ғамингизни оламан.
Бор пулимга ташвишу
Камингизни оламан.

“Ғам” сўзидан ўзимга,
“Шодлик” сўзин ясайман.
Ман шунақа, ўзимни
Хурсанд қилиб яшайман.

Телба экан-ку, дея,
Кулмангиз Марҳабога.
Барча ҳисоб-китобни
Қўйиб қўйдим Оллога.

Марҳабо Каримова
t.me/Adabiyot_olami
t.me/Abduvohid_Suvonov Ochish/sharhlash

2022-08-24 14:19:43 t.me/Adabiyot_olami
t.me/Abduvohid_Suvonov Ochish/sharhlash

2022-08-24 14:15:30 ОПА

Опа мени йўқлаб келинг,
Ярим кўнглим тўқлаб келинг.
Соғинганман она меҳрин,
Сиз онамга ўхшаб келинг!

Юраккинам кетмай нураб,
Жигарингиз холин сўраб,
Шойи рўмолларин ўраб,
Сиз онамга ўхшаб келинг!

Гоҳ музлайман тошли тандай,
Эркалатар эди қандай,
Болам денг бир адашгандай,
Сиз онамга ўхшаб келинг!

Дўст-ёр вафо қилмаганда,
Бахту омад кулмаганда,
Дунё йўқлаб келмаганда,
Сиз онамга ўхшаб келинг!

Мирзо тўкар кўздан қонин,
Ғаниматдир ҳар бир оним,
Жоним берай опажоним,
Сиз онамга ўхшаб келинг!

Опа мени йўқлаб келинг,
Ярим кўнглим тўқлаб келинг.
Соғинганман она меҳрин,
Сиз онамга ўхшаб келинг!

Мирзо Карим
t.me/Adabiyot_olami
t.me/Abduvohid_Suvonov Ochish/sharhlash

2022-08-22 19:17:41 КАЪБАТУЛЛОҲ

Ҳануз бири икки бўлмаган элдан
Келдим, нажот излаб, ё Каъбатуллоҳ.
Бағри хун, толеи кулмаган элдан
Келдим, нажот излаб, ё Каъбатуллоҳ.

Бир замон унинг ҳам бўлган қудрати,
Дунёни ёритган зеҳни, фикрати.
Ҳатто қирғоқларни бузган шиддати,
Келдим, нажот излаб, ё Каъбатуллоҳ.

Тегирмон тошидек айланди тақдир,
Карвонлар тўзғиди, сарбонлар басир.
Банди бўлган эди улуғ юрт, ахир,
Келдим, нажот излаб, ё Каъбатуллоҳ.

Авж олди иғвою фириб, разолат,
Йиғлади бир четда етим адолат,
Борми саодатга, ахир, кафолат,
Келдим, нажот излаб, ё Каъбатуллоҳ.

Дуч келган санамга сиғиндик гоҳи,
Бизга кенг очилди Шайтон даргоҳи.
Ахир, нима эди элнинг гуноҳи,
Келдим, нажот излаб, ё Каъбатуллоҳ.

Хор бўлди Ватанда кимки илми бор,
Бировлар зар билан топди эътибор.
Ҳийлагар кўпайди, кўпайди маккор.
Келдим, нажот излаб, ё Каъбатуллоҳ.

Магар бўри экан одамга одам,
Бир-бирин бошини егай дамодам,
Инсоф, диёнатни унутдик биз ҳам,
Келдим, нажот излаб, ё Каъбатуллоҳ.

Ҳаргиз айнимасин томирдаги қон,
Мудом таъзим қилгай асли қул Инсон.
Ҳақиқат йўқ жойда яшнагай ёлғон,
Келдим, нажот излаб, ё Каъбатуллоҳ.

Қай замон одамлар бад феълин сездим,
Вафоли дўст излаб дунёни кездим.
Топмадим, топмадим, баридан бездим,
Келдим, нажот излаб, ё Каъбатуллоҳ.

Қошингда тиз чўкиб турибман шу дам,
Дилимда илтижо, қўлимда қалам.
Шафқатинг аяма мендан ҳам, Эгам,
Келдим, нажот излаб, ё Каъбатуллоҳ.

Шукрона айтурман ўзингга, ё Раб,
Юз бурдик ҳидоят йўлига қараб.
Ҳақ деган юртимнинг бахтини сўраб
Келдим, нажот излаб, ё Каъбатуллоҳ

Абдулла Орипов
t.me/Adabiyot_olami
t.me/Abduvohid_Suvonov Ochish/sharhlash

2022-08-20 19:44:26 БОЛАЛИГИМ...

Абдувоҳид Сувонов
Абдувоҳид Сувонов
t.me/Adabiyot_olami
t.me/Abduvohid_Suvonov Ochish/sharhlash

2022-08-20 19:44:26 БОЛАЛИГИМ...

Қизғалдоқлар қирларимда қолиб кетдинг,
Беғуборлик унут бўлди, толиб кетдинг,
Сен бевафо, бевафолик қилиб кетдинг,
Тушларимга кирсанг эди, болалигим,
Қани қайтиб келсанг эди, болалигим.

Қайлардасан, эй шодонлик, меҳрибонлик,
Йироқлардан хаёл унган, бахтиёрлик,
Ўзи жасур, ўзи хонлик, паришонлик,
Тушларимга кирсанг эди, болалигим,
Қани қайтиб келсанг эди, болалигим.

Дунёлари сенда эди, менда эди,
Куним ўтар, тупроқларда, қумда эди,
Орзуларим қўл етмаган жойда эди,
Тушларимга кирсанг эди, болалигим,
Қани қайтиб келсанг эди, болалигим.

Тонгда онам иссиқ нонни тутган дамлар,
Қуёшдан ҳам мағрур ёнган тунги шамлар,
Дилни эзар, бугун тортган ғам-аламлар,
Тушларимга кирсанг эди, болалигим,
Қани қайтиб келсанг эди, болалигим.

Энг ёмони - соғинганим билмаслигинг,
Билсанг ҳамки, сира парво қилмаслигинг,
Армон бўлди энди қайтиб келмаслигинг,
Тушларимга кирсанг эди, болалигим,
Қани қайтиб келсанг эди, болалигим.

Баҳор келса сени, мендек кутган борми,
Қадринг сезиб, ардоқлаган дилозорми?
Қумсадим-да сочда кўриб, оқ қировни,
Тушларимга кирсанг эди, болалигим,
Қани қайтиб келсанг эди, болалигим.

Абдувоҳид Сувонов
t.me/Adabiyot_olami
http://t.me/Abduvohid_Suvonov Ochish/sharhlash

2022-08-16 19:00:21 ОТАБЕК ҚЎШИҒИ

Сен Ширину мен ҳам Фарҳод эмасман,
Сен аччиғу мен ҳам наввот эмасман.
Зайнаб, Зайнаб, менга айтма зорингни,
Сен дилхуну мен ҳам дилшод эмасман…

Бошга неки тушса кўкдан атомиш,
Биз бир қафас аро гирён бир жуфт қуш.
Бир гўшада сен хомушсан, мен хомуш —
Сен вайрону мен ҳам обод эмасман.

Биз бир динда муридлар икки пирга,
Йўлатмасман сени мен билган сирга,
Биз на дўстмиз, биз на ғаним бир-бирга,
Сен жайрону мен хам сайёд эмасман.

Сенга қўйсин суймаганни суйишни,
Шундай яшаш айтгил, кўнглингга хушми?..
Сени қучиб, соғинаман Кумушни;
Жон омону ўзим ҳаёт эмасман.

Эй гул, суйиб не топдинг мен ёмондан,
Бекман, сенга ёр тилайман султондан,
Кўз узмасман мен Марғилон томондан,
Сенга кет ҳам, сенга қол ҳам демасман..

Сен Ширину мен ҳам Фарҳод эмасман,
Сен аччиғу мен хам наввот эмасман,
Зайнаб, Зайнаб, менга айтма зорингни,
Сен вайрону мен ҳам обод эмасман!

Муҳаммад Юсуф
t.me/Adabiyot_olami
t.me/Abduvohid_Suvonov Ochish/sharhlash