𝐀𝐛𝐫𝐨𝐫 𝐌𝐮𝐱𝐭𝐨𝐫 𝐀𝐥𝐢𝐲

2023-03-07 13:49:56 ЙЎЛОВЧИ

(Абдурроҳим Каракўчдан ўзлаштирма)

Қирқ санадир ҳаммамиз бир кемада,
На уммон ўзгарди, на биз ўзгардик.
Тузли сув ичамиз, балиқ емакда,
На даврон ўзгарди, на биз ўзгардик.

Очкўзимиз қора қозон бошида,
Дўст юз ёшда, душман юз ўн ёшида,
Азияту, исканжанинг ташида,
На макон ўзгарди, на биз ўзгардик.

Сабримиз тугади, салвон қолмади,
Маслаҳатчимиз кўп, ишчан қолмади,
Қўлимизда қилич-қалқон қолмади,
На мезон ўзгарди, на биз ўзгардик.

Қуюқ туман қоплади, босди фалокат,
Кўз кўзга тушмаса қилди ҳиёнат,
Бурчакда ётибди етим ҳақиқат,
На бурҳон ўзгарди, на биз ўзгардик.

Уч-беш сўм пул учун хоинни мақтаб,
Мазлумни калака қилар атайлаб,
Сохта обрўсини асраб, авайлаб,
На фармон ўзгарди, на биз ўзгардик.

Маҳбубий иймонга ҳиёнат қилма,
Номардга аҳволинг шикоят қилма!
Ҳамма ўзгарса ҳам, лек сен ўзгарма!
На виждон ўзгарди, на биз ўзгардик.

Маҳбубий Ochish/sharhlash

2023-03-05 19:30:33 Қолмасин

Тур фато* мақсадга юргин, динда нодон қолмасин!
Маърифат гулзорларида кизбу бўҳтон қолмасин!
Кўпчилик даъвоси мўъмин, қилмиши кофирсифат,
Зоҳири ораста лекин қалби вайрон қолмасин!

Ҳақ тараф бўл, бандадан қўрқма ҳидоят сан билан!
Рост Калом бирла амал қил, шунда нусрат сан билан!
Аҳли Сунна ҳофизи бўл, эҳтимол бордир яна,
Фосиқу, БЕСУННАТУ, беюзда имкон қолмасин!

Маърифатни тут, Худонинг орифи бўл аввало,
Ҳам садоқатда сафо-ю, қил адолатга вафо!
Мустафонинг йўли ҳақдир, ғайрига қилма ҳавас,
Дин ғами бирла фиғон қил, ўзга афғон қолмасин!

___
*Фато - йигит.

Аброр Мухтор Алий Ochish/sharhlash

2023-03-05 19:29:38 ЧОРА

Ғурурланма ожиз банда,
Ўлмасликка чора борми,
Куз ҳазон қилган гул каби,
Сўлмасликка чора борми?!

Ҳаёт давру даврон ўтар,
Ҳар кимсани ҳисоб кутар,
Ёғи битган чироқ тутар,
Сўнмасликка чора борми?!

Шошиб кирма эгри йўлга,
Жон фидо қил тўғри йўлга,
Ширин жонинг Азроилга,
Бермасликка чора борми?!

Дўст кўринган ҳамма дўстмас,
Ибодат қил, умр кутмас,
Ётиб кўр гўрда ҳам бир пас,
Ётмасликка чора борми?!

Ўйламай қўйдинг ўлишни,
Тарк қилмадинг ҳеч кулишни,
Эслатай: кафан кийишни,
Киймасликка чора борми?!

Ботил билан камолотга,
Етмай қолурсан уятга,
Тобут деган ёғоч отга,
Минмасликка чора борми?!

Туриб мазлум томониди,
Савоб ишла замонида,
Содиқ дўстлар армонида,
Кетмасликка чора борми?!

Кўтарилар кўздан парда,
Кўражаксан ким қаерда,
Уй қазилмиш қаро ерда,
Кирмасликка чора борми?!

Мункар Накир келар албат,
Роббинг ким, деб сўрар албат,
Мўъмин жавоб берар албат,
Бермасликка чора борми?!

Таржимон Аброр Мухтор Алий Ochish/sharhlash

2023-03-03 20:04:56 (Ўзлаштирма)

ЕТМАГАЙ

Йиғлама беҳуда кўнгул,
Севгининг ўзи етмагай,
Севсада булбул сўлар гул,
Севгининг ўзи етмагай.

Сабаблар бор оғир келар,
Саналар бор унуттирар,
Севдим дейишга уялар,
Севгининг ўзи етмагай.

Олди баҳор, орқаси қиш,
Меваси шубҳа ё ташвиш,
«Етар» деб ўйлама, миш-миш,
Севгининг ўзи етмагай.

Қозон-товоқ, кўрпа керак,
Тўйга етар сарпа керак,
Яна шунча нарса керак,
Севгининг ўзи етмагай.

Ишқ деймизу, қани недир?!
Бўйи қанча, эни недир?!
Синалмиш юз-минг санадир,
Севгининг ўзи етмагай.

Баъзан вафодорлик керак,
Гоҳо фидокорлик керак,
Севги нафратла муштарак,
Севгининг ўзи етмагай.

Қониқмайсан маънога ҳам,
Эга бўлсанг дунёга ҳам,
Маҳбубийдек дарёга ҳам -
Севгининг ўзи етмагай...

Аброр Мухтор Алий Ochish/sharhlash

2023-03-03 20:03:59 (Ўзлаштирма)

ВАСИЯТ

Унутма, ўтажак золим даврони,
Сабр этмоқни билажаксан...
Тушундинг?!
Ор эмас қоқилса йигит карвони,
Ҳақ учун тик туражаксан...
Тушундинг?!

Чекиниш йўқ қуёш ғарбдан чиққунча,
Иймондан сипқоргин қалбга сиққунча,
Ҳақ йўлда ботилни тамом йиққунча,
Керак бўлса ўлажаксан...
Тушундинг?!

Енгилмас мусулмон кучли иймони,
Ҳақиқат мана шу, йўқдир гумони,
Келса золимларнинг ҳисоб замони,
Уддасидан чиқажаксан...
Тушундинг?!

Йўлимиз ҳар замон Аллоҳ йўлидир,
Бу йўлда собитлар ўғил боладир,
Ҳақ мазлумнинг энг муқаддас молидир,
Бермасалар олажаксан...
Тушундинг?!

Етимнинг дуоси ижобат ахир,
Ким уни йиғлатса йиғлайди охир,
Миллатни сотганни ушлаб бирма-бир -
Мўрдасига солажаксан...
Тушундинг?!

Лоқайдлик бедаво, разил иллатдир,
Қўрқоқлик ундан ҳам баттар зиллатдир,
Адолат нақадар гўзал неъматдир,
Адолатли бўлажаксан...
Тушундинг?!

Хоинга қўшилма, ҳасад оғир дард,
Йиғласанг йиғла лек мужодала шарт,
Нариги дунё бор, унутма албат,
Ўша Кунда кулажаксан...
Тушундинг?!
Ўша Кунда кулажаксан...
Тушундинг?!

Маҳбубий

Ўқиган Акмалхон Хакимов Ochish/sharhlash

2023-03-03 20:02:59 ҲАҚ ИСЛОМДИР!

Кўр дунёнинг қоқ кўзига,
Ҳақ Исломдир, деб ёзамиз.
Қушларнинг қанот юзига,
Ҳақ Исломдир, деб ёзамиз.

Йўлга, дарахтга, деворга,
Эсган шамол, ёққан қорга,
Ёмғир юкли булутларга,
Ҳақ Исломдир, деб ёзамиз.

Арслон буржи, ёй буржига,
Гўдакларнинг ҳовучига,
Минораларнинг учига,
Ҳақ Исломдир, деб ёзамиз.

Қир-адирга, тоғу-тошга,
Тандир, ўчоқ, кул, оташга,
Юлдузга, ойга, қуёшга,
Ҳақ Исломдир, деб ёзамиз.

Мард йигитнинг навкарига,
Қизлар пари-пайкалига,
Ҳатто Будда ҳайкалига,
Ҳақ Исломдир, деб ёзамиз.

Ҳар ҳовлининг эшигига,
Ҳар таомнинг қошиғига,
Гўдакларнинг бешигига,
Ҳақ Исломдир, деб ёзамиз.

Барча билар ҳақни албат,
Яширолмас - бу ҳақиқат,
Қарич-қарич ва қатма-қат,
Ҳақ Исломдир, деб ёзамиз.

Абдурроҳим Қаракўч
Таржимон Маҳбубий Ochish/sharhlash

2023-03-03 20:01:11 РАНЖИМАСИН

Соясида майли ўтир,
Япроқ сендан ранжимасин.
Покланиб, сўнг қабрга кир,
Тупроқ сендан ранжимасин.

Бу йўл нозикдир, омон бўл,
Нафсинг учун энг ёмон бўл,
Исмоилча ёт қурбон бўл,
Пичоқ сендан ранжимасин...

Ҳаволанма қўрисалар,
Тўғри сўзла сўрасалар,
Ўлсанг кафан ўрасалар -
Матоҳ сендан ранжимасин...

Ошиғинг кўчгани маҳал,
Дод десин кечганинг маҳал,
Сувидан ичганинг маҳал,
Булоқ сендан ранжимасин...

Маҳбубий ҳар мудом тик тур,
Душманга қарши тетик тур,
Фақат рукуъда эгик тур,
Халлоқ сендан ранжимасин...

Соясида майли ўтир,
Япроқ сендан ранжимасин.
Покланиб, сўнг қабрга кир,
Тупроқ сендан ранжимасин...

Маҳбубий Ochish/sharhlash

2022-11-05 10:34:18 Кўнглим нақадар дардли,
Ва нақадар бахтиёр,
Гоҳо бегона-ёлғиз,
Гоҳо ошиғи бедор,

«Ўзингни топ!» десалар,
Ўйлаб ўтирмасдан ҳеч -
Маҳбубийни ахтариб,
Кезгим бор диёр-диёр...

Маҳбубий Ochish/sharhlash

2022-10-27 17:57:25 • Ўткинчи, давом эт!
• Ўтгунча давом эт!

Ғолиб Сафо Ochish/sharhlash

2022-10-18 20:42:01 https://t.me/abrormuxtoraliyrasmiy Ochish/sharhlash