Abdurahmon Meshayan

2022-09-01 21:25:09 ​​БАДБАХТ ЎҒИЛ

(Собиқ доҳийға)

Бир пайтлар хўп бой эди бу онахон,
Жигарлардан ортиб ётга тутарди нон.
Лек йигирма тўрт йил аввал бўлдию хон,
Ўз онасин хор айлади бадбахт ўғил.

Жигарларин юрагига қўрқув солиб,
Иблис-ла тил бириктириб келди ғолиб.
Бағридаги олтинларин тортиб олиб,
Ўз онасин хор айлади бадбахт ўғил.

Э вох ўғил кундан-кунга хаддан ошар,
Опа-ука, ака-синглин қамаб яшар.
Бечоралар либосларин ямаб яшар,
Ўз онасин хор айлади бадбахт ўғил.

Онасига рахми келмас ўхшар тошга,
Дард тунини, ит кунини солди бошга.
Кўпнинг куни у деб қолмиш гўштсиз ошга,
Ўз онасин хор айлади бадбахт ўғил.

Не-не қизлар Дубай ёқда у сабаб хор,
Не-не йигит дунё бўйлаб қул, мардикор.
Анинг учун Аллоҳ йўқдир, бир нафси бор,
Ўз онасин хор айлади бадбахт ўғил.

Онасининг юрак бағрин айлаб вайрон,
Андижонда юзларидан оқизди қон.
Қилмишидан замин карахт, фалак хайрон,
Ўз онасин хор айлади бадбахт ўғил.

Хар қадамда учрасада тилло дўкон,
Унга кириб не ололар фақир деҳқон?
Бу онанинг исми-шўрлик Ўзбекистон,
Ўз онасин хор айлади бадбахт ўғил.

@A_meshayan
1-сентябр 2015-йил.
Абдураҳмон Мешаян Ochish/sharhlash

2022-09-01 16:29:25 ​​АТО ЭТ!

Ё Раб тўлиб тошди сабримнинг жоми,
Тилимда бир Сен-у, Пайғамбар номи.
Муқаррар ботгайдир умрим қуёши,
Бир куни келган пайт умримнинг шоми:
Менга ўз юртимдан қабр ато эт!
Менга ўз юртимдан қабр ато эт!

Қолар мен тотмаган шарбатлар яҳна,
Қолади менданда дунёдек саҳна.
Мени кўмсалар бас Ўзбекистонга,
Азроил жонимга солганда раҳна.
У дунёингда хам қадр ато эт!
Менга ўз юртимдан қабр ато эт!

Чиқарган хукмингга кўнсинлар дўстлар,
Ибрат олиб ўйга чўмсинлар дўстлар.
Ажнабий юртларда хор қилмай таним,
Мени ўз юртимга кўмсинлар дўстлар.
Бор жигарларимга сабр ато эт!
Менга ўз юртимдан қабр ато эт!

Руҳимга бермасин дўстим азият,
Тақазо этсада гарчи вазият.
Ортимдан ғийбатмас тиловат қилсин,
Қуръони Каримдан шудир васият.
Ҳеч қачон демасман: жабр ато эт!
Менга ўз юртимдан қабр ато эт!

Менга муқаддасдир юртимда хар хас,
Тақдирим боғлиқдир унга чамбарчас.
Ер устида менга кун бермаганлар,
Ер остига кирсам тинч қўйсалар бас!
Лаъинга нисбатан қахр ато эт!
Менга ўз юртимдан қабр ато эт!

Ё Раб юрак дардим ўзингга аён.
Қилмасамда буни тил бирла баён.
Кўмилай онамнинг пойига ёки,
Отажоним бирла ётай ёнма-ён.
Тушимга хайрли таъбир ато эт!
Менга ўз юртимдан қабр ато эт!

Не-не ХУДОман деб хайқирган гумроҳ
Кўрганман тобутда жим ётганин ох.
Мени жаннатингда қул қил майлига,
Фақат айламагин жаханнамда шоҳ
Амалларим учун ажр ато эт!
Менга ўз юртимдан қабр ато эт!

Юрт қадри ўлчанмас асло тиллода,
Халқ қадри ўлчанмас асло тиллода.
Хаж қилган чоғимда ё Умра пайти,
Жоним узилган чоғ Маккатиллода:
Менга тор эмас кенг қабр ато эт!
Сўнгра жаннатингдан шаҳр ато эт!

@A_meshayan
октябр-2015
Абдураҳмон Мешаян Ochish/sharhlash

2022-09-01 08:58:13 ​​ЎЗБЕКИСТОНИМ МЕНИНГ...

Бағрингда кўп  зурриёд бор,
Сен беминнат онасан.
Фусункор-у ҳам бетакрор- 
Хуснинг сен кошонасан.
Туғилдим қучоғинг очдинг,
Ўлсам қабрим бўласан.
Сени севмасам айт ўзинг,
Борми виждоним менинг. 
Ҳақ дин бирла шарафланган 
Ўзбекистоним менинг

Тупроқларинг бўса олмиш 
Хоразмий товонидан 
Хақиқатдек бол тўкилмиш 
Навоий забонидан 
Фаришталар жилмагандир 
Бухорийнинг ёнидан 
Бари сенинг зурриёдинг 
Энг қадрдоним менинг 
Хақ дин бирла шарафланган 
Ўзбекистоним менинг

Бир замонда вайрон қилса 
Мадрасалар Чингизлар, 
Бир замонда масжид қурмиш 
Улуғбекдек тенгсизлар.
Қуриб битди ман-ман деган 
Дарёлар-у денгизлар, 
Лек сен ҳамон бағри бутун 
Боши осмоним менинг 
Хақ дин бирла шарафланган 
Ўзбекистоним менинг

Топмоқлик мумкин экандир 
Ватанда зар бирла пул 
Лек пул бирла сотиб олиб- 
Бўлмас Ватанни буткул 
Менман мадҳинг куйлагувчи- 
Тўтимас сайроқ булбул 
Бағрингдадир Мусҳафи- 
Усмондек Қуръоним менинг 
Хақ дин бирла шарафланган 
Ўзбекистоним менинг!

Нечун қилмайин шукрона,
Мустақилсан Ватаним.
Сени мақтасалар бахтдан 
Музлаб қолар баданим.
Чорак асрлик ўтмишинг 
Кўз олдимдадир маним 
Сени асрасин Аршдаги 
Мутлоқ Султоним менинг 
Хақ дин бирла шарафланган 
Ўзбекистоним менинг

Битта дарахт кессам ўрнин 
Қоплагум юзта экиб 
Сен волидам омонсанки 
Яшамайман ғам чекиб 
Инимдан айрилиб қолсам 
Чидайман оғам борку 
Сендан айрилсам чидолмам 
Онам хам бермас туғиб 
Хатто мехрибон онам хам 
Сени беролмас туғиб 
Сенга достон бағишларман 
То бор имконим менинг 
Хақ дин бирла шарафланган 
Ўзбекистоним менинг

Хар ким ўз Ватанин алқар 
Ўзин тилинда мангу 
Арман-" Ес кес сирумем" дер, 
Рус дер: "Я тебя люблю", 
Турк: "Бан сени севиёрум" 
Инглиз дер: "I love you" 
Менчи ўзбекчада дейман 
Севдим сен жоним менинг 
Хақ дин бирла шарафланган 
Ўзбекистоним менинг

2014-йил
@A_meshayan
Абдурроҳман Мешаян Ochish/sharhlash

2022-09-01 08:40:57 ​​​​ЯХШИЯМКИ ТУҒИЛМИШАМ ШУ МАКОНДА...

Хайратдаман баланд тоғлар виқоридан,
Димоғим маст настаринлар ифоридан.
Фаришталар буйруқ олгач юқоридан,
Жам бўлишган онам тўлғоқ тутган онда,
Яхшиямки туғилмишам шу маконда...
Ўзбекистонда...

Ереванда оттирсайдим агар тонгим,
Инжил томон талпинарди балки онгим?
Севармидим азоннимас черков бонгин,
Бўлмасада энг муҳташам бир замонда,
Яхшиямки туғилмишам шу маконда.
Ўзбекистонда...

Музаффарман эришмишман хидоятга,
Арш султони олмиш мани химоятга.
Юрак ошиқ Фурқондаги хар оятга,
Шодман гарчи Севганимдир ломаконда,
Яхшиямки туғилмишам шу маконда.
Ўзбекистонда...

Бу миллатсиз ўзни нобуд этармидим,
Ҳидоятнинг қуёшига етармидим?
Балки мушрик бўлиб ўлиб кетармидим,
Қулга қийин, Ҳаққа хар бир иш осонда
Яхшиямки туғилмишам шу маконда
Ўзбекистонда...

Бу юрт ҳалқин Помпей каби ер ютмаган,
Ё сигирдан Бомбейликдек бахт кутмаган.
Яратган-у Яйратганни унутмаган,
Золимлар минг чирансада дин омонда,
Яхшиямки туғилмишам шу маконда...
Ўзбекистонда...

@A_meshayan
10:00-22/02/2016/
Абдураҳмон Мешаян Ochish/sharhlash

2022-08-31 21:53:19 Ochish/sharhlash

2022-08-31 13:21:01 ​​СЕНГА "ПАХТА" ҚЎЙМАЙ СЕВАМАН ВАТАН!

Азонсиз қўйдилар минорларингни,
Кесдилар минг йиллик чинорларингни.
Ўмардилар олтин динорларингни,
Лек шунда хам сени севсам найлайин?
Юртим, бу ишқними нобуд айлайин?

Қўйганингдан буён қўлдан қуролинг.
Гарчи хар қадамда учрар қаролинг.
Денгизинг бор у хам қуруқ Оролинг...
Лек шунда хам сени севсам найлайин,
Юртим, бу ишқними нобуд айлайин?

Сенга қўйибдида бу юрак ихлос,
Ўзи қучоғингда кулбам бор холос.
Кўмиб қўймаганман бағрингга олмос,
Лек шунда хам сени севсам найлайин,
Юртим, бу ишқними нобуд айлайин?

Боғинг эгаллаган бир тўда қарға,
Кеча хоин эди, бугунмиш дарға.
Қилишсада бир кун сендан бадарға,
Шунда хам мен сени севсам найлайин,
Юртим, бу ишқними нобуд айлайин?

Иттифоқ даврида қўрқиб "мўйлов"дан,
Хеч бери келмадик қўйдек яйловдан.
Гарчи бездиргансан сохта сайловдан,
Лек шунда хам сени севсам найлайин,
Юртим, бу ишқними нобуд айлайин?

Бўлмаса бағрингда қасрим бормиди?
Бағринг қайтишимга ғаним зормиди?
Ёҳуд Швеция менга тормиди?
Лек шунда хам сени севсам найлайин,
Юртим, бу ишқними нобуд айлайин?

Қўйларнинг тўдаси ортидан қувлаб,
Қишлоқда юрардим калишим судраб.
Таёққа суяниб гох қолиб мудраб...
Лек шунда хам сени севсам найлайин,
Юртим, бу ишқними нобуд айлайин?

Гарчи каззобларинг чорлови сохта.
Хақ отин айтганга тўлган авахта.
Мен сени севаман қўймасдан пахта,
Мен сени самимий севсам найлайин?
Юртим, бу ишқними нобуд айлайин?

Хижронинг зўрайиб бўлгунча касал,
Оғу тут, ичаман сўрмайман асал.
Бир куни топсамда хижратда ажал,
Дегайман юртимни севсам найлайин,
Тирик ишқни нечун нобуд айлайин?


19:37-24022019
@A_meshayan
Абдураҳмон  Мешаян Ochish/sharhlash

2022-08-31 13:16:30 Ochish/sharhlash

2022-08-31 10:51:15 ​​ЖУРЪАТЛИ КАМПИР

Ўтмишда бир подшони доим,
Қарғар экан бутун халқ. Аммо,
Бир кампир бор экан мулойим,
У подшони қиларкан дуо.

Энг қизиғи пошонинг ўзи,
Золимлигин яхши биларкан.
Бир кун дебди чорланг кампирни,
Сўрай нечун дуо қиларкан.

Чорлашганда кампирни охир,
Подшо унга ташлабди савол.
Мени хамма қарғайди ахир,
Сиз дуода не учун? мен лол.

Кампир бормай виждонга қарши,
Дебди: "Сендан олдинги султон.
Золим эди, лек сендан яхши,
Сен унданда чиқдинг кўп ёмон.

Шунга сени токи бор холим,
Дуо қилгум то бергунча жон.
Тахт бошига ўлсанг эй золим,
Келмасин деб сендан баттар хон"

@A_meshayan
2015-йил
Абдураҳмон Мешаян Ochish/sharhlash

2022-08-31 09:43:32 ​​#ЎЗБЕКИСТОН

Бисмиллаҳир Роҳманир Роҳимни айтиб,
Юрагимга шодликлар ҳам келди қайтиб.
Қилаверсин тўйлар халқим гумбурлатиб,
Эй довруғи осмоним-ей, донғи достон,
Tинчлигингга кўз тегмасин Ўзбекистон!

Бешигида тинч ухласин чақалоқлар,
Жони эрта узилмасин қизғалдоқлар.
Бомба сасин эшитмасин бу қулоқлар,
Ул ғанимлар қилолмаслар сени яксон,
Тинчлигингга кўз тегмасин Ўзбекистон!

Пок Хожилар Аллоҳимга қилиб сажда,
Асли сенга тинчлик сўраб келар хажда
Мен хам Хаққа ёлворурман шеър авжида:
Эй ўттиз бир миллион юлдузи бор осмон,
Тинчлигингга кўз тегмасин Ўзбекистон!

Юртлар бордир унда халқ хор эл норози,
Саҳардан то оқшомгача ўқ овози.
Юракларга ваҳм солур қишин-ёзин,
Эй ўттиз миллион бахтли сузган уммон.
Тинчлигингга кўз тегмасин Ўзбекистон!

Oта-маҳзун,
Она-маъюс,
Бола-хомуш,
Кўзларига кўринмайди олтин-кумуш.
Бахт татирми юртда бўлса қонли уруш?
Ай меҳрибонимей, отамдек қадрдон,
Тинчлигингга кўз тегмасин Ўзбекистон!

Гўдак она сийнасидан оқ сут эма-
Улғайгандек, ўсдим нонинг еб, лоф дема.
Эй дунё уммонида мен минган кема,
Уруш бўлиб ош егандан тинч ей ёвғон,
Тинчлигингга кўз тегмасин Ўзбекистон!

Сен ўттиз бир миллион япроғи бор дарахт,
Агар синсанг жоним чиқар, бошим карахт.
Ушбу халқ пешонасин доим ўпса бахт,
Бу дунёдан ўтар эдим мен беармон,
Тинчлигингга кўз тегмасин Ўзбекистон!

Биз қилсакда дунё бўйлаб истироҳат,
Бағрингга қайтдик қилгани истиқомат.
Тангрим бизни қилгунгача аҳли жаннат,
Бемор бўлган юракка, юрт ишқи дармон.
Тинчлигингга кўз тегмасин Ўзбекистон!

"Булутлар" йўқ қуёш каби нур соч балқи,
Сахийлигингдан бахраманд ўзбек халқи.
Сени жондан севадирмиз Худо хаққи,
Тангрим сенда туғилмоққа берди имкон.
Тинчлигингга кўз тегмасин Ўзбекистон!

Гарчи сендан чиқмагандир анбиёлар,
Анбиёга эргашган чин авлиёлар-
Кўп етишган бағрингдан, ким не деёлар?
Банда кўнар, Мусҳафдадир олий фармон,
Тинчлигингга кўз тегмасин Ўзбекистон!

Сотқинлар бор сендек юртдан кечдим деган,
Эх қушларга ўхшар улар эсин еган.
Ёз-у кузда яйраб, қишда учиб кетган,
Гарчи қилмас хоин зоти кўп пушаймон,
Тинчлигингга кўз тегмасин Ўзбекистон!

Омон бўлсин ёнса агар халқ дардида,
Мўмин султон султонларнинг энг мардида.
Эх бу дунё урушлар деб ўзгардида,
Бағрингдадир ноним бутун бошим омон.
Тинчлигингга кўз тегмасин Ўзбекистон!

Масжидлардан азон куйи янграйверсин,
Буни тинглаб лаъин зоти инграйверсин.
Хар султонга чиндан Умар йўлин берсин!
Орзуларим дард қўлида бермасин жон,
Тинчлигингга кўз тегмасин Ўзбекистон!

Қадамларин пойлаб юрган пойлоқчидан,
Халқин мудом гиж-гижгижлаган айғоқчидан.
Пахтасини ташиб кетган қароқчидан,
Йигирма беш йил олдин қутилган карвон,
Тинчлигингга кўз тегмасин Ўзбекистон!

Ёлвораман дуом қабул қилсин маним,
Арш султони хор қилсин тош отса ғаним.
Она юртим, Маккада хам соғинганим,(соғинадиганим)
Ушбу шеърни йиғлаб ёзди Абдураҳмон,
Тинчлигингга кўз тегмасин Ўзбекистон!

@A_meshayan
14:01-23-07-2016-йил
Абдурроҳман Мешаян Ochish/sharhlash

2022-08-30 16:47:30 ​​Ё РАБ СЕНДАН БОШҚА КИМИМ БОР МЕНИНГ?

Мен нечун Инжилни очиб варақлай,
Ўқисам "алиф", "лам",  "мим"им бор менинг.
Нур бергин юзимга шамсдек чарақлай,
Ё Раб Сендан бошқа кимим бор менинг?

Суянаман десам отам ҳам ўлар,
Жон волидамнинг ҳам паймони тўлар.
Болам боласига парвона бўлар.
Ё Раб Сендан бошқа кимим бор менинг?

Ён атрофим тўла ашаддий душман,
Дўстдан вафо кўрмай бугун хомушман.
Мерганлар мўлжалга олган оққушман,
Ё Раб Сендан бошқа кимим бор менинг?

Биров етиб, биров етмас қадримга,
Ўлим ҳамла қилгач ҳаёт қасримга.
Бир кун битта ўзим киргач қабримга,
Ё Раб Сендан бошқа кимим бор менинг?

Шунча йил зиндондан сақладинг омон,
Йўқса бўлар эди ҳолим кўп ёмон.
Савобларим томчи айбларим уммон,
Ё Раб Сендан бошқа кимим бор менинг?

Ким узажак ўзинг узмасанг қарзим?
Бошқа Илоҳим йўқ қилмоққа арзим.
Қабул қилмоғингга муштоқдир фарзим,
Ё Раб Сендан бошқа кимим бор менинг?

Ўттиз бир йил яшаб англадим шуни:
Таҳажжудсиз увол мўминнинг туни
Соялантиргани қиёмат куни,
Ё Раб Сендан бошқа кимим бор менинг? Ochish/sharhlash