2022-07-04 16:07:27
#Rektor | #Munosabat | #UrDU
JANNATMAKON YURTNING YAGONA OILASIMIZ!
Ma’lumki, ayni kunlarda O‘zbekiston Respublikasi Konstitutsiyasini isloh qilish bo‘yicha muhokamalar jarayoni ketmoqda. Konstitutsiyaga kiritilayotgan o‘zgartirishlar loyihasi ommaviy muhokamaga qo‘yildi. Asosiy Qonunimizga zamon talablaridan fuqarolarimiz istak va xohishlaridan kelib chiqqan holda o‘zgartirish va qo‘shimchalar kiritish bo‘yicha takliflar berilmoqda.
Aslini olganda, amaldagi qonunchiligimizga ko‘ra, parlamentning o‘zi ham Konstitutsiyaga o‘zgartish kiritish vakolatiga ega ekanligi maʼlum. Shunga qaramay, Prezidentimiz bu boradagi qonun loyihasini umumxalq muhokamasida ko‘rib chiqishni hamda referendum o‘tkazish yo‘li bilan qabul qilishni taklif etganligi mamlakatimizda
“Inson qadri uchun”, “Inson-jamiyat-davlat” kabi ezgu gʻoyalar hamisha, hamma narsadan ustunligi ekanidan dalolatdir.
Ming afsuski, ayrim joylarda masalaning mohiyatini talqin qilishda tushunmovchilik holatlari ham uchramoqda. Kuni kecha Qoraqalpog‘iston Respublikasida bo‘lib o‘tgan voqealar barchamizni havotirga soldi.
Ushbu jarayonlar o‘zbek va qoraqalpoq elining azaliy qon-qardosh, doʻst-birodar ekanligiga ziyon yetkazmasdan, bir mamlakat fuqarolari sifatida jannatmakon O‘zbekistonimiz tinchligi va osoyoshtaligi yoʻlida bir yoqadan bosh chiqarib, birlashib harakat qilishimiz zarurligini anglatmoqda.
Buning uchun Muhtaram Prezidentimiz Shavkat Mirziyoyev bor kuch va imkoniyatdan foydalanib, tinimsiz harakat qilayotgan bir paytda, qoraqalpoq va o‘zbek xalqi azal-azaldan bir-biriga qardosh boʻlgan xalq sifatida tashqi kuchlar aralashuvini anglagan holda hamisha davlatimiz rahbarini qoʻllab-quvvatlashni chuqur his qilmoqdamiz.
Oʻz oʻrnida davlatimiz rahbari Nukusga o‘z vaqtida yetib borib, siyosiy irodasini namoyon qildilar. Xalq bilan muloqot chogʻida qoraqalpoq eli takliflari, fikrlariga ko‘ra, Konstitutsiyaning o‘zgartirish kiritish nazarda tutilgan tegishli moddalari o‘zgarishsiz qolishini va loyihadagi oʻzgarishlar faqatgina xalqning fikrini bilish uchungina taqdim etilganligini taʼkidladi. Davlatimiz rahbarining bu soʻzlari mamlakatda tinchlik va barqarorlik bo‘lishi uchun qabul qilingan muhim qaror boʻldi.
“Men har safar g‘urur bilan aytaman, men ham O‘zbekiston, ham Qoraqalpog‘iston farzandiman deb. Yuragimdan aytaman buni doim. Hayotimni qo‘yganman bu masalaga. Men baribir, qanday og‘ir bo‘lmasin, qonun ustuvorligini, jazo muqarrarligini ta’minlayman”- deya kuyunib aytgan gaplari, bugun barchamizni yuragimizni larza keltirmoqda.
Oʻzbek xalqi va koʻp ming sonli ziyolilar nomidan shuni ayta olamanki, O‘zbekiston Respublikasi Prezidentining oqilona siyosatini qo‘llab-quvvatlaymiz va yurtimiz tinchligi, mamlakatimizning hududiy yaxlitligi, qardosh qoraqalpoq xalqi va o‘zbek xalqining baxt-u saodati, abadiy doʻstligi uchun olib borilayotgan islohotlarni qo‘llab-quvvatlaymiz.
Zero, o‘zbek va qoraqalpoq xalqini azal-azaldan o‘zaro do‘stlik rishtalari, tarixi va madaniyati, tili, urf-odati, an’analari mushtarak bogʻlab turadi.
Urganch davlat universiteti jamoasi Yangi O‘zbekiston va Yangi Qoraqalpog‘istonni barpo etishda Prezidentimiz boshlagan muhim va istiqbolli islohotlarni qoʻllab-quvvatlagan holda, mazkur xayrli tashabbuslarni amalga oshirishda hamisha hamjihatlikda kamarbastda boʻlib turadi.
Baxrom Abdullayev
Urganch davlat universiteti rektori, fizika-matematika fanlari doktori
UrDU Matbuot xizmati
@urdu_pressa
407 views𝑺𝒉𝒂𝒉𝒛𝒐𝒅 𝑶𝒕𝒐𝒋𝒐𝒏𝒐𝒗, 13:07