Японияда ҳаммаси бошқача... Бугунги сомса нархини эшитганим | Ulug‘bek Po‘latov
Японияда ҳаммаси бошқача...
Бугунги сомса нархини эшитганимдан бери ҳалиям ўзимга келмаяпман. Мактаб қурса бўладиган пулга тушлик қилиб юборадиганлар бор экан. Қойил.
Японияда эса ҳаммаси бошқача. Ўтган йили япониялик вазир ўринбосари йирик компания вакиллари унинг тушлиги учун пул тўлашгани сабабли ишдан бўшатилганди.
Ясухико Таниваки коммуникациялар бўйича вазир ўринбосари бўла туриб, йирик коммуникация компанияси вакиллари билан 2 йил ичида 3 марта бирга овқатланган. Ҳар сафар овқатланиш пулини компания вакиллари тўлаган. Шу сабабли у ишдан бўшатилган. Аввалроқ япониялик бир амалдор ҳам ички ишлар ва коммуникация вазирлиги вакиллари билан бирга овқатлангани учун узр сўраганди.
Бирга овқатланишни қўйиб туринг. Япония қонунчилигига кўра, давлат амалдорлари ўзлари назорат қиладиган компаниялар вакилларидан совға олишлари ҳам тақиқланган экан.
P.S: Агар бизда Япониянинг шунга ўхшаш қонунлари қабул қилинса, жуда кўп амалдорлар ишдан кетиб қолиб, кадрлар тақчиллиги юзага келса керак.
